Tutuoken Dagiti Phobia
“Masansanen a tema a pagaangawan dagiti phobia. Ngem pudno a saanda a ‘nakakatkatawa.’”—Jerilyn Ross, direktor iti pagpaagasan kadagiti sakit maigapu iti danag
TI SAO a “phobia” tukoyenna ti nakaro, saan a pudno a panagbuteng iti maysa a banag, pasamak, wenno rikna. Ngem ti laeng depinasion dina maipaawat ti aligaget ken ladingit a mangipasimudaag iti kastoy a kasasaad. Kuna ni Raeann Dumont, a naagasan iti phobia iti nasurok a dua a dekada: “Dagiti tattao nga addaan iti phobia nalabit liklikanda ti nagadu a kasasaad ta agyanda laengen iti balay, wenno mabalin nga agbiagda a mangibtur iti kanayon, di agressat a danag, wenno mabalin a bang-aranda ti danagda babaen iti panaginum iti arak, a mabalin a mangpataud kadagiti kanayonan a parikut.”
Dagiti phobia mairamanda kadagiti an-annayen a naawagan saksakit a maigapu iti danag.a Napattapatta a 12 a porsiento kadagiti adulto idiay Estados Unidos ti mangsaranget iti phobia iti maysa a kasasaad ti panagbiagda. Adu kadagitoy ti agsagaba a siuulimek iti adu a tawen. “Daksanggasat ta agarup tallo a kakapat kadagiti indibidual nga addaan phobia ti pulos a di agpatulong,” kuna ti Anxiety Disorders Association of America. “Adu a tattao nga addaan iti phobia ti agkedked nga agpatulong gapu ta mabainda. Di maawatan dagiti dadduma no ania ti marikriknada wenno sadino ti pagpatulonganda, ket mabuteng dagiti dadduma iti panangagas a mismo.”
Adda ginasut a naammuanen a [kita ti] phobia, ngem tallo laeng ti pangklasipikaran dagiti eksperto kadakuada. Dagiti simple phobia maipamaysada iti maysa a banag wenno kasasaad, kas kadagiti insekto, animal, panagpatayab, ken ti kaadda kadagiti nakaserra a lugar. Ti agoraphobia gagangay a mapasamak a mainaig iti pannakataranta. Ti agsagsagaba mabuteng a mataranta agingga a liklikanna ti amin a lugar ken kasasaad a dati a nakatarantaanna. Ti social phobia madlaw babaen iti panagbuteng a mapabainan iti publiko, kas iti panagsao iti tallaong.
Usigenyo ti maysa laeng kadagiti tallo—dagiti social phobia. Kuna ti The Washingtonian: “Uray no pagtitiponem amin dagiti simple phobia, kas iti panagbuteng kadagiti uleg wenno ti panagpatayab, ti social phobia pay laeng ti kadawyan a pakaigapuan ti pakariribukan.” Pudno kadi daytoy? No pudno, apay? Usigentayo.
[Footnote]
a Dagiti dadduma a sakit a maigapu iti danag iramanna ti pannakataranta, obsessive-compulsive disorder, posttraumatic stress disorder, ken kaaduan a sakit maigapu iti danag. Para iti ad-adu pay nga impormasion, kitaenyo ti Agriingkayo! a Pebrero 8, 1996, “Di Mapakpakadaan a Kababalin—Tengtenglenna Kadi ti Biagyo?” ken ti Hunio 8, 1996, “Panangsaranget iti Pannakataranta.”