Manipud Kadagiti Agbasbasa

Gistay Naungawen ti Morse Code? Di umiso nga impresion ti impaawat ti benneg a “Gistay Naungawen ti Morse Code iti 150 a Tawen,” a nagparang iti “Panangmatmat iti Lubong.” (Agosto 8, 1997) Maus-usar pay laeng ti Morse code kadagiti transmitter ti radio iti eroplano ken kadagiti short wave radio transmission.

H. K., Netherlands

Pagyamanan iti panangdakamatyo iti daytoy. Kas iti siuumiso a maawatan ti managbasami, ti ‘pannakaungaw’ ti Morse code nga impadamagmi espesipiko a tuktukoyenna ti us-usaren dagiti marino.​—ED.

Tuberculosis Apresiarek dagiti serye ti “Tuberculosis​—Ti Panagsubli ti Mammapatay.” (Disiembre 22, 1997) Nakaptanak iti TB idi 1988 ket naimbaganak. Umisokayo iti panangipaganetgetyo a masapul a “regular” nga agtomar dagiti pasiente iti agasda.

Y. L., Francia

Ti katugangak a babai, a saan unay nga interesado iti relihion, nakitana ti artikulo iti lamisaanko ket binasana dayta. Dinamagna no mabalin nga iyawidna. Naipaimaak iti dua pay a ruar ti Agriingkayo! Pagyamanan iti amin a gagetyo a mangpataud iti tunggal magasin.

L. N., Estados Unidos

Nakaptanak iti TB 11 a tawenen ti napalabas. Umiso unay ti naisalaysay nga impormasion. No dadduma, ti panagbasa iti dayta ket kayarigan ti pananglagip iti bukodko a kapadasan. Agyamanak ken Jehova iti sagut a biag ken ti regular a balakad a maaw-awatmi iti Agriingkayo! a mangsaluad iti salun-atmi.

G. B., Italia

Nakaptanak iti daytoy a sakit ket nagagasak iti innem a bulan. Tinulongannak ti artikuloyo a mangammo iti ad-adu pay maipapan iti daytoy mammapatay a sakit. Napatpateg pay, nakatulong a nangpatibker iti pammatik a risutento ti Pagarian ti Dios daytoy a parikut iti sangalubongan.

P. P., Indonesia

Pakasaritaan ti Biag Napikapikak unay iti artikulo a “Kanayon a Husto ti Kustomer.” (Disiembre 22, 1997) Agpadakam ken ni Wei Tung Chin nga addaan iti innem nga annak. Timrem dagiti luak bayat a binasak ti pakasaritaanna. Ammok nga ipagpannakkelna dagiti annakna ken pampamiliada. Saan pay nga inawat ti uppat nga annakko ti Kristianidad kas dalan ti biagda. Nalabit addanto aldaw a mapasarak ti rag-o a nalak-amanna.

E. H., Estados Unidos

Para kaniak, kanayon a makaparegta dagiti pakasaritaan ti biag iti Agriingkayo! Napikapikak iti pakasaritaan ni Wei Tung Chin. Anian ti ragsakko ta dagita nga indibidual ket karaman kadagiti tattao nga um-ummongen ni Jehova.

I. T., Alemania

Di Umiso a Nagan! Kayatko ti agyaman iti makapainteres nga artikulo a “Ti Kinapintas Dagiti Parke Nasional iti Kabambantayan.” (Nobiembre 22, 1997) Agsipud ta pagay-ayatko ti kabambantayan ken panagretrato, naragsakanak a nakakita ken naretratokon dagiti amin nga animal a nadakamat ditoy. Nupay kasta, iti panagkunak ket kamali ti kapsion ti retrato iti ngato ti panid 15. Saan sa ketdi a chamois dagiti animal a naipakita, no di ket kabaian nga ibex.

M. D. M., Italia

Kayatmi ti agyaman iti managbasami iti pannakakitana iti daytoy a kamali.​—ED.

Moscow Pagyamanan iti artikulo a “Moscow​—Ti Maika-850 nga Anibersariona.” (Disiembre 22, 1997) Naisangsangayan unay ti kinamanagpadagus ken kinanainggayyeman dagiti Ruso. Napasarak a mismo daytoy idi 1989, idi tinabunuan ti 3,000 a Ruso ti maysa a Nakristianuan a kombension idiay Poland. Makapikapik met ti maudi a panid dayta a ruar, a nangipakita iti retrato ti maysa a Ruso a sister a mangaskasaba iti away ti Russia. Sapay koma ta palubosan ni Jehova nga adu pay nga umili a Ruso ti pagsasaoda ti agbalin a managdaydayaw kenkuana!

I. L., Alemania