Nailangitan a Kinadayag
Ti nagbubukel a rimmuok dagiti bituen ti maysa kadagiti naisangsangayan unay a nailangitan a kinadayag. Nagtimbukel dagitoy, ket tunggal maysa aglaon manipud pinullo a ribu agingga iti ginasut a ribu a bituen. Adda agarup 100 a pagaammo a nagbubukel a rimmuok iti galaksitayo a Milky Way.
Iti kabangibang ti galaksitayo a Milky Way, adda promedio a distansia dagiti bituen nga uppat agingga iti lima a light-year.a Iti nagbukel a rimmuok, napuspusek dagiti bituen, kaadayo nga agarup maysa a kasangapulo ti light-year.
Ti rimmuok iti retrato ket ti Omega Centauri. Iti mismo a mata, kasla maymaysa a bituen. Nupay kasta, babaen iti dakkel a teleskopio, agbalin a makasisirap a rimmuok ti nagadu a bituen, sangamilion amin. Silalawag unay a makita ti Omega Centauri iti Southern Hemisphere, nupay no kadagiti rabii ti primavera ken kalgaw agingga kadagiti makintengnga a makin-amianan a latitude, makita dayta iti baba ti nagtugmokan ti langit ken daga iti makin-abagatan a langit.
Ti diametro ti Omega Centauri ket agarup 150 a light-year; sapulenna ti mapattapatta a 150 a tawen a panagbiahe ti lawag manipud iti baba ti retrato agingga iti ngato! Ti distansia ti Omega Centauri manipud iti daga ket mapattapatta a 17,000 a light-year.
Nakabaybayagen a naipagarup a maymaysa a bituen ti Omega. Idi maika-17 a siglo, pinanaganan dayta ti Aleman nga agdadamo nga astronomo a ni Johann Bayer iti Griego a letra nga Omega (ω). Nupay kasta, ti Ingles nga astronomo a ni Edmond Halley ti damo a nakakita iti dayta kas nagbukel a rimmuok idi 1677.
Iti Northern Hemisphere, maysa kadagiti kasayaatan a rimmuok a makita ket ti M13, iti konstelasion a Hercules. Aglaon dayta iti agarup sangamilion a bituen ken 4,000 a light-year nga ad-adayo pay kadatayo ngem iti Omega Centauri. Isu nga agparang a basbassit.
No adda gundawaymo a mangkita iti nagbukel a rimmuok babaen iti kalalainganna ti kadakkelna a teleskopio, siguraduem a kitaen. Daytat’ maysa kadagiti makapasiddaaw a parsua a makitam iti langit no rabii.
[Footnote]
a Ti maysa a light-year ket katupag ti 9,460,530,000,000 a kilometro.
[Dagiti ladawan iti panid 31]
Ti Omega Centauri
[Credit Line]
National Optical Astronomy Observatories
[Ladawan iti panid 31]
Ti M13
[Credit Line]
Ti galaksi a Milky Way ken ti M13: Impaay ti United States Naval Observatory