Manipud Kadagiti Agbasbasa

Dagiti Barkada iti Kalsada Natignayak kadagiti artikulo maipapan iti barkada iti kalsada iti Abril 22, 1998 a ruar ti Agriingkayo! Madama nga ages-eskuelaak iti reformatory school. Saksi ni Jehova ni nanangko, ngem nabayag bassiten a simmardengak a nakigimong. Dakes a gagayyem ti nakibarkadaak ken nakipasetak iti adu a naranggas a panagtakaw. Isu a pinatulodannak ni nanangko iti daytoy nga Agriingkayo! Kinunak iti un-unegko idi damo, ‘Daytoy manen!’ Ngem idi kinitak, nagustuak ket inungpotko a binasa. Apaman a nabasak, nagbalbaliwen ti panunotko. Pulos a diak impagarup a makatulong unay kaniak ti Agriingkayo! Kayatko ti mangabaruan ken makigimong manen. Naawatak a pulos a diak kayat nga ulitenen dagiti nagkamaliak ket kayatkon ti agserbi ken Jehova bayat a sibibiagak.

M. S., Japan

Agsolsoloak nga ina ti 11 ti tawenna a barito ken 9 ti tawenna a balasitang, ket agnanaedkami iti lugar nga aduan iti agsasabali a barkada. Binasak daytoy a magasin ket dagus nga inlawlawagko dayta kadagiti annakko. Babaen ti tulong ti artikulo, naawatanda a pulos a saan a masandian ti pannakibarkada ti ayat wenno natalged a biag iti pamilia.

B. S., Estados Unidos

Naimpusuan nga agyamanak kadagiti artikulo. Masansan a maseknanak kadagiti kaanakak a tin-edyer, ket talaga a nakatulong unay ti impaayyo nga impormasion.

I. M. M., Brazil

Naintiempuan unay dagiti artikulo agsipud ta dadduma kadagiti kaklasek ket mangbubuangay iti barkada. Agpangadua dagiti dadduma no talaga a kayatda ti makibarkada, tangay kayat ti lider a suratanda ti pader iti dakes a sasao maipapan iti prinsipalmi. Pagyamanan iti panangtulongyo kadagiti agtutubo kadagitoy narigat a panawen.

B. C. G., Mexico

Panangkontrol ti Gagayyem Kayatko laeng nga ibaga nga apresiarek unay ti artikulo nga “Agimtuod Dagiti Agtutubo . . . Kasano a Maliklikak ti Panangkontrol Kaniak ti Gayyemko?” (Abril 22, 1998) Nupay nataengan ken naasawaanakon, kanayon a magustuak dagitoy nga artikulo. Nangnangruna a maibagay unay daytoy nga artikulo iti madama a kasasaadmi nga agassawa nga uray la naminliman a binasak sakbay nga indissok. Tinulongannak a mangammo nga uray ni Jesus kasapulanna ti panawen tapno makapagmaymaysa.

P. A., Trinidad

Gapu iti babassit a di pagkikinnaawatan, no dadduma saankami nga agtungtong nga aggayyem, ket maladingitanak unay iti daytoy ta uray la diak maisentro ti panunotko. Kalpasan ti namin-adu a panangbasak iti artikulo, naamirisko a konkontrolek gayam ti gayyemko ken diak ik-ikkan iti tiempona a mangaramid iti dadduma a banag. Patiek a daytoy nga artikulo ket naisurat a para kaniak, ta insurona kaniak ti nagadu a pamay-an a mangpasayaat iti relasionko kadagiti sabsabali.

R. S., India

Orthodontics Iti nabiit pay a panagpadentistak, nangibatiak iti kopia ti Abril 8, 1998 nga Agriingkayo!, nga aglaon iti artikulo maipapan iti orthodontics. Idi agangay, inyebkas ti dentista ti apresasionna, a kunana a makaisuro, ababa, ken nalaka a maawatan ti pannakaisurat ti artikulo. Imbagana pay nga inikkanna ti dadduma a pasiente iti kopia dayta nga artikulo tapno matulonganna ida a mangtarus iti programa a panangagas.

T. P., Inglatera

Pakasaritaan ti Biag ni Grace Marsh Kayatko nga iyebkas ti panagyamanko iti kapadasan ni Grace Marsh iti Agriingkayo! (Abril 22, 1998) Makapabileg ken makaparegta a basaen ti turedna a mangitultuloy a mangasaba iti laksid ti ibubusor. Tinignaynak nga ad-adda a mangapresiar iti wayawayami a mangasaba kas bunga ti panangikagumaan dagiti kakabsat iti napalabas.

C. F., Estados Unidos