Agbalin a Saniata ti Dati a Bato

Babaen ti koresponsal ti Agriingkayo! idiay Belgium

MAYSA daytoy a paborito a saniata iti nabayagen a panawen gapu iti ekstraordinario a kinapintasna. Gapu iti kinatangkenna​—dayta pay laeng ti katangkenan a natural a substansia a naammuan ti tao​—nasaknap ti pannakausarna kadagiti remienta ken makinaria. Daytoy makaallukoy a bato isu ti diamante.

Napnuan makaay-ayo a sarsarita ti dadduma kadagiti nalalatak a diamante. Ti maysa a napanaganan iti Koh-i-noor, a kaipapananna, “Bantay ti Lawag,” ket nasarakan idiay India, pito a siglon ti napalabas. Idi damo, 191 ti kilatis ti intero a bato, ngem idi agangay, natabas dayta a nagbalin a 109 ti kilatisna.a Sa adda met ti Cullinan, a nagbalin a paset a saniata iti korona ti Britania ket dayta ti kadakkelan pay laeng a diamante a nasarakan ken natabas.

Agbalin a Saniata ti Dati a Bato

Saan a sigud a napipintas a saniata dagiti diamante. Kaaduan ket rumbeng a makabakab iti daga. Iti promedio, 250 a tonelada ti rugit ti masapul a makabakab ken mayakayak tapno magun-odan ti maysat’ kilatisna a puro a diamante. Kadagiti 40 agingga iti 50 a milion a kilatis a maminas iti kada tawen, bassiusit laeng ti maitutop nga agbalin nga alahas.

Masapul a malasinlasin pay laeng dagiti nagubal a diamante sigun iti kadadakkel, kasin-aw, kolor, ken sukogda. No nagubal, dandani tunggal diamante ket napnuan rugit. Ngem no dadduma, nakadaldalus ti maysa a pasetna. Maisina dagitoy nadalus a paset babaen ti panangtabas. Kadagiti dadakkel ken nangingina a bato, no dadduma aguray dagiti artesano iti sumagmamano a bulan sakbay a tabasenda. Nainkalintegan daytoy ta uray no adda la maminsan a panagkamali iti panagtabas, nagdakkelen ti maksay iti balor ti diamante wenno madadael pay ketdi ti intero a bato.

Kamaudiananna, ti panangpasileng pagminarenna dagiti parupa ti diamante, a rumbeng a maibagay iti sukogna. Gapu kadagitoy a parupa, ti lawag ket mayanninaw ti saniata, isu nga agrimatrimat ti diamante. Daytat’ gapu nga agdindinamag unay dayta.

Inton sumaganad a maallukoyka iti maysa a diamante gapu iti kinarimat ken kinapintasna, laglagipem ti bannog dagiti minero ken ti kinasigo ken kinalaing dagiti artesano. No awanda, ti diamante ket pulos a saan nga agbalin a napintas a saniata manipud iti dati a naalas a kasasaadna kas kristal a bato.

[Footnote]