Pannakapukol—Mapasamakto Ngata Kenka?
Adda idi iti ruar ni Benjamin a mangtagtagiragsak iti silnag ti init iti primavera a nangpabara iti siudad ti Sarajevo idi a nabaddekanna ti maysa a bomba a naikali iti daga. Naparpar ti kannigid a sakana. “Pinadasko ti bumangon,” nalagip ni Benjamin. “Diak makabangon.” Ni Benjamin ket maysa laeng kadagiti 20,000 a tattao a mapapatay wenno mapukolan iti tinawen babaen kadagiti bomba a naikali iti daga.
TI Angola ket nawarasan iti di kumurang a 15 a milion a bomba a naikali iti daga—nasurok a maysa para iti tunggal lalaki, babai, ken ubing nga adda iti pagilian. Adda itan 70,000 a tattao a napukolan idiay Angola. Tangay adda walo a milion agingga iti sangapulo a milion a bomba a naikali iti dagana, ti Cambodia ti addaan iti kangatuan a porsiento iti lubong kadagiti tattao a napukolan—napattapatta a 1 iti tunggal 236. Naipadamag nga addaan ti Bosnia ken Herzegovina iti nasurok a tallo a milion a bomba a naikali iti daga—59 iti tunggal kilometro kuadrado.
Ngem saan laeng a kadagiti lugar a paggugubatan a mapukolan dagiti tattao. Kas pagarigan, adda ag-400,000 a napukolan idiay Estados Unidos. Iti kaaduan kadagiti adulto iti dayta a bilang, ti pannakapukol ket resulta ti nakaro a sakit a saan nga eksakto a maawagan a “peripheral vascular disease,” wenno PVD. Daytoy ket pangkaaduan a termino a mangsaklaw iti sumagmamano nga an-annayen. Depinaren ti Taber’s Cyclopedic Medical Dictionary ti PVD a di eksakto a termino a mangsaklaw “kadagiti sakit ti dadakkel ken babassit nga urat dagiti saka ken ima, nangnangruna dagidiay kasasaad a manglapped iti nasayaat a panagtaray ti dara kadagiti saka ken ima.” Ti diabetes ti maysa a kangrunaan a pakaigapuan ti PVD. Sigun iti The World Health Report 1998, “nasurokto a doble dagiti adulto nga agsakit iti diabetes iti sangalubongan manipud 143 a milion idi 1997 agingga iti 300 a milion inton 2025.”
Idiay Estados Unidos, ti trauma—agraman dagiti aksidente iti lugan, makina, alikamen a de-koriente, ken dagiti paltog—ti maikadua a kangrunaan a pakaigapuan ti pannakapukol, a nakaigapuan ti 20 agingga iti 30 porsiento kadagiti amin a pannakaputedda. Dadduma pay a pakaigapuan ti pannakapukol ramanenna dagiti tumor (agarup 6 a porsiento) ken dagiti nakayanakan a depekto (agarup 4 a porsiento).
Nakarkaro pay a makariribuk a panunoten ti mapukolan iti nagpateg nga ima wenno saka. Adda kadi aniaman a pamay-an tapno maliklikan dayta? Ket no maysakan a pukol, kasano a matagiragsakmo ti naimbag a kasasaad ti panagbiag? Salaysayen dagiti sumaganad nga artikulo dagitoy ken ti dadduma pay a saludsod.