Manipud Kadagiti Agbasbasa

Bagyo a Pauline Kanayon a maragsakanak no maipalagip a maysaak a paset ti organisasion a talaga a maseknan kadagiti tattao. Pagyamanan iti ekselente nga artikuloyo a “Dua nga Aspeto ti Didigra.” (Oktubre 8, 1998) Anian a makaparagsak a maammuan a bigbigen dagiti sabsabali nga “organisado ken napudno” dagiti Saksi ni Jehova!

D. F. S., Brazil

Panagputputong Kasla agaplikar kaniak ti artikulo a “Ti Panangmatmat ti Biblia: Ti Kinapateg ti Panagputputong.” (Oktubre 8, 1998) Napateg ti panagputputong tapno agtultuloyak a rumang-ay iti naespirituan ken iti emosional. Ngem laglagipekto ti punto a ti panagputputong ket “lugar a makagunggona a sarungkaran ngem napeggad no agtalinaedka sadiay.”

L. G., Estados Unidos

Vatican ken Holocaust Adun a tawen nga um-umay dagiti Saksi iti balayko, ket naragsak no kua ti tungtonganmi. Ngem makapasair ti artikuloyo a “Ti Iglesia Katolika ken ti Holocaust.” (Oktubre 22, 1998) Nasantuan a tao ni Pope Pius XII a nangaramid iti amin a kabaelanna a timmulong kadagiti Judio, ket rinibu ti naispal gapu kadagiti panagreggetna!

J. P., Estados Unidos

Ti panggepmi ket saan a sairen dagiti Katoliko a managbasa no di ket mangtedkami iti umiso a report iti kontrobersia maipapan iti dokumento ti Vatican a “We Remember: A Reflection on the Shoah.” Dagiti naisalaysay iti artikulo ket kapanunotan dagiti mapagraraeman a historiador, mannurat, ken hurado​—dadduma ket Romano Katoliko a mismo. Nabatad a makomendaran ti aniaman a naaramidan ti Vatican a nalabit nakatulong a nangispal iti adu a biag. Ngem kaskasdi a maysa a kinapudno a saan a nagtimek ti papa iti publiko maibusor iti rehimen dagiti Nazi. Nalabit minilion pay koma ti naispal no kastat’ inaramidna.​—ED.

Panagiinnayat Dagiti serye nga “Addanto Ngata Tiempo nga Agiinnayat Amin a Tattao?” (Oktubre 22, 1998) ket ekselente! Tinulongannak a mangmedmed iti napigsa a tarigagayko a mangimpen iti sakit ti nakem ken gura. Pagyamanan unay! Sapay koma ta ti pammaregta a maawatko kadagiti publikasionyo ti tumulong kaniak nga agbalin nga adipen ni Jehova a Dios.

G. C., Italia

Dagiti Natured a Misionero Kalpasan a nabasak ti artikulo a “Saankamin nga Agbiag nga Agpaay iti Bagbagimi” (Oktubre 22, 1998), masapul nga agyamanak kadakayo iti makapabileg pammati nga impormasion. Maipaspasangokami ditoy Britania iti nakaro a kinaaleng-aleng. Ngem awan kaimudinganna daytoy no idilig iti napasaran da Jack ken Linda Johansson. Ti artikulo talaga a tinukayna ti pusok ken tinignaynak nga agyaman iti sagsagrapek.

L. J., Inglatera

Amin-tiempo a ministrokami nga agassawa iti sumagmamanon a tawen, ket ammomi a talaga a karit ti makibagay iti kabarbaro a pakaidestinuan. Prangka ti agassawa a Johansson iti panangyebkasda iti panagriknada idi immakarda. Inwardas kadakami ti pakasaritaanda a gagangay laeng dagiti rikriknami ken rumbeng a kanayon nga agtalekkami ken Jehova.

S. E. C., Brazil

Panangtagikua iti Kinapudno Agtawenak iti 12 ket nagustuak ti artikulo nga “Agimtuod Dagiti Agtutubo . . . Kasano a Matagikuak ti Kinapudno?” (Oktubre 22, 1998) Tangay panagseserreken, medio narigat ti agsagana para kadagiti Nakristianuan a gimong. Ngem masapul nga iwayaak. Patiek a daytoy nga artikulo ti tumulongto iti adu nga agtutubo a mangpatanor iti panagayatda ken Jehova ken iti pannakairamutda iti kinapudno.

C. S., Portugal

Makatawenen ti napalabas idi inyimtuodko iti bagik dayta a saludsod maipapan iti kinapudno. Diak idi masigurado no talaga nga ipatpategko ti kinapudno wenno gapu la ngamin iti pamiliak. Ngem inaramidko ti insingasingyo​—pinaneknekak dayta iti bagik babaen ti panagsirarakko iti Biblia. Maragsakanak itan a mangibaga a tinagikuakon ti kinapudno. Segseggaak ti panagbalinkonto nga amin-tiempo a managebanghelio!

H. N., Estados Unidos