Manipud Kadagiti Agbasbasa
Saan a Kontra-Judio Pagyamanan ta binigbigyo dagiti banag a ladingitenyo ta nakunayo. Nupay kayatko nga adda mabasak a panagpadispensaryo iti daytoy a komento, umdasen ti panangilawlawagyo iti kontekstona. Pangngaasiyo ta itultuloyyo ti nasayaat a trabahoyo, tangay ammoyo nga ap-apresiaren dagiti agbasbasa ti kinanaan-anay ken kinapudno ti Agriingkayo!
W. H., Estados Unidos
Tuktukoyen ti managbasa dagiti nailanad iti “Declaration of Facts,” maysa a resolusion a naadaptar idi 1933 iti maysa a kombension idiay Berlin, Alemania. (Kitaem “Dagiti Saksi ni Jehova—Natured Uray Naipasango iti Peggad Kadagiti Nazi” iti Hulio 8, 1998 a ruar ti “Agriingkayo!”) Kas insalaysay ti artikulo, awan kadagiti naibaga iti deklarasion idi 1933 ti naigagara a mangyebkas wenno mangkonsintir iti pannakabusor dagiti Judio, ket ladingitenmi no ti dadduma a sasao ti mangted iti kasta nga impresion kadagitoy nga aldaw. No adda man nangipaulog iti “Declaration of Facts” idi dekada 1930 a kontra-Judio dagiti Saksi ni Jehova, nalaka a maatur daytoy di umiso nga impresion babaen ti panangpaliiw iti natured ken naasi nga aramid ti tunggal Saksi para kadagiti Judio. Maysa pay, dagiti publikasion ti Watch Tower Society ti maysa kadagiti kaunaan a nangibutaktak ken nangyebkas iti pannakasairna iti pannakatrato dagiti Judio idiay Europa.—ED.
Panangpadakkel iti Pito a Babbaro Diak palabsen daytoy a gundaway tapno agyamanak kadakayo iti artikulo a “Dagiti Karit ken Bendision ti Panangpadakkel iti Pito a Babbaro.” (Enero 8, 1999) Agpayso gayam a makapakarit ti panangpadakkel iti tin-edyer, nangnangruna ta maysaak a balo. Idi laeng nabasak daytoy nga artikulo a naamirisko a makapagballigiak iti daytoy a paset ti biag dagiti annakko.
A. R., Estados Unidos
Dimmakkelak met iti pamilia nga addaan iti pito nga annak. Nabiit pay nga agkaykaysakamin nga agserserbi ken Jehova. Ngem agarup innem a bulanen ti napalabas, nailaksid ti maysa kadagiti adingko a babbai. Idi damo a nakitak ti artikulo, diak kayat a basaen ti pakasaritaan ti maysa a naballigi a pamilia. Nagkararagak ta sapay koma ta magunggonaanak iti artikulo a diak marikna ti umapal. Naparegtaak unay a nakaammo nga adda met gayam pamilia a naaddaan kadagiti kapadasan a kas iti napasaran ti pamiliami ken maseknan ni Jehova iti kasasaadmi. Kayatko ti agyaman iti pamilia Dickman iti panangiburayda iti pakasaritaanda. Masiertok a naparegta ken naliwliwa unay dagiti nagannak kaniak ken dagiti addik manipud iti daytoy nga artikulo.
W. Y., Japan
Marka iti Rupa Agyamanak unay iti artikulo a “Marka iti Rupa—Mapukpukawen nga ‘Identity Card’ ti Nigeria.” (Enero 8, 1999) Adda gagayyemmi ken lakayko idiay Africa nga addaan marka iti rupa, ket pampanunotenmi idi no ania dagitoy. Nasungbatanen ti saludsodmi babaen ti artikuloyo.
M. V., Italia
Dagiti Leon Pagyamanan iti artikulo a “Dagiti Leon—Nadadaeg a Burboran a Pusa ti Africa.” (Enero 22, 1999) Nagpateg daytoy nga artikulo kaniak, tangay adun a tawen a pagay-ayatko dagiti leon. Magustuak unay ida agsipud ta makaay-ayo ken naturedda. Addanto aldaw a kayatko ti makikadua iti “urbon a leon.”—Isaias 11:6-9.
E. A. S., Brazil
Mulmula Kontra Polusion Talaga a nagsayaat ti bassit nga artikulo a “Mulmula Kontra Polusion.” (Enero 22, 1999) Silalawag a pinaneknekan ti impormasion nga adda naayat, nadungngo, nasaririt a Namarsua. Impakitana no kasano a pinarsua ni Jehova ti daga tapno aywananna met la a mismo dayta, uray no agpelpeligro gapu kadagiti gakat ti tao a mangdadael iti daga. Pinabileg met ti artikulo ti namnamak nga agbiag iti Paraiso nga inkari ni Jesus idiay Lucas 23:43.
R. J., Estados Unidos