Napatpateg Ngem Kuarta

BABAEN TI KORESPONSAL TI AGRIINGKAYO! IDIAY CANADA

Kastoy ti binigbig ti komento ti editorial iti The Monitor a periodiko ti Bridgetown, Nova Scotia: “Inikkan[na] ti balasangna iti napatpateg a sagut ngem ti aniaman a gatad ti kuarta.” Ania ti sagut? Dayta ti “nakaskasdaaw a pagwadanna iti kinamapagpiaran.”

Dimmagas da Anna ken ti balasangna a ni Tanya iti paglakuan ti baratilio (yard sale) ket gimmatangda ti puraw a pitaka a pangikargaan ni Tanya iti Bibliana. Idi nakaawiddan, linuktan ni Tanya ti zipper iti uneg ti pitaka ket nasdaaw a nakakita iti $1,000 a papel de banko. Dagus a nagsubli ti agina iti paglakuan ti baratilio ket intedda ti kuarta iti babai a nangilako kadakuada iti pitaka. Nabatad a ti manmano a nausar a pitaka ket kukua ti natayen a nanangna, a nagsakit idi iti Alzheimer’s, ket saan a nasukimat a naimbag sakbay a nailako. Gapu iti napalaus a panagyamanna, kinuna ti babai: “Dayta ti nangisubli iti panagtalekko kadagiti tattao . . . Makaparegta a maammuan nga adda pay la mapagpiaran a tattao.”

Maysa a parupa a panid nga artikulo maipapan iti insidente nga impablaak ti periodiko dayta a lugar ti nangadaw ken Anna a kunkunana: “Kas Saksi ni Jehova, natural dayta a reaksion. Adda naibatay-Biblia a [konsiensia]mi. Kayatmi met nga isuro ti naimbag ken Tanya.” Para ken Tanya, ti kabarbaro a puraw a pitaka ket maysanto a naisangsangayan a mangipalagip iti leksion maipapan iti kinamapagpiaran.