Agsalsalimetmetka Kadi iti Koriente Wenno Saysayangem?
BABAEN TI KORESPONSAL TI AGRIINGKAYO! IDIAY BRITANIA
TI KORIENTE a katupag ti mapattapatta a $1 a bilion, nga umdas a mangsuplay iti koriente ti maysa a siudad a kas iti kadakkel ti Chicago, ti masaysayang idiay Estados Unidos iti kada tawen. Kasano? Mabaybay-an a naka-standby mode (nakasaksak iti koriente ngem saan a maus-usar) dagiti alikamen a kas kadagiti computer, fax machine, VCR, telebision, CD player, ken uray pay dagiti coffee maker. Maaramid daytoy tapno agandar dagiti reloda, mamantener ti memoriada, ken mai-display dagiti setting-da—wenno tapno sisasaganada laeng a mausar a dagus.
Mapattapatta a ditoy Britania, ti koriente a makonsumo dagita a naka-standby nga alikamen iti kada tawen ket mangpataud iti kagudua a milion a tonelada a greenhouse gas, babaen ti produksion ti planta ti koriente. Mapan dagitoy a gas iti atmospera ken mabalin a mangnayon kadagiti epekto ti panagbara ti globo. “Kasano man kalatak ti ideolohia a pannakasalaknib ti aglawlaw para kadagiti agtutubo nga agus-usar iti koriente, manmano ti makaawat iti nakainaigan ti pannakapataud ti elektrisidad ken ti panagbara ti planeta,” kuna periodiko ti London a The Times.
Saan a maamiris ti kaaduan a ti adu nga elektroniko nga alikamen a naka-standby ket makakonsumo iti adu a koriente a kas iti makonsumoda no maus-usarda. Ti satellite TV system, kas pagarigan, mabalin a makakonsumo iti 15 a watt no maus-usar idinto ta 14 a watt no naka-standby. Ti saan a nasayaat a pannakadisenio adda met maaramidanna. Ti maysa a CD player a nasubok ti nakakonsumo iti 28 a watt idi naka-standby, idinto ta 2 laeng a watt ti kinonsumo ti maysa pay a modelo nga addaan kadagiti isu met laeng a maaramidan. Ngem ita, adda nadisenion a kabbaro a chip ti computer a kunada a mangkissay iti makonsumo a koriente no naka-standby manipud iti 10 a watt agingga iti 1 a watt wenno uray 0.1 laeng a watt. Manamnama nga iti agtultuloy a panangparmek iti polusion, dagiti agpatpataud iti produkto iti intero a lubong mabalin nga usarendanton daytoy a chip nga aggatad iti $2.50 kas pangkaaduan a piesa. Kabayatanna, ania ti maaramidam?
Kastoy ti kunaen ti environment minister ti Britania: “Mabalin a kasla bassit ti koriente a makonsumo ti tunggal alikamen. Ngem agsipud ta 60 a miliontayo nga agnanaed kadagitoy a puro [ti Britania] talaga nga umadu pay dayta.” Talaga a saan a maiddep dagiti alikamen iti balay a kas kadagiti refrigerator. Ngem nasayaat no iyugalitayo nga iddepen dagiti silaw a saan a kasapulan ken dadduma pay nga appliance imbes a baybay-an dagitoy a naka-standby mode. Saanka laeng a makasalimetmet iti kuarta no di ket makatulongka pay a mangsalbar iti planetatayo manipud iti di kasapulan a polusion.