Manipud Kadagiti Agbasbasa
Panangliput Pagyamanan iti serye ti Abril 22, 1999 nga Agriingkayo! a “No Di Matalek ti Asawam.” Maysaak a biktima ti panangliput. Nupay nakidiborsioak tallo a tawenen ti napalabas, nasaem pay laeng ti riknak. Tinulongannak dagiti artikulo a mangamiris a masapul a diak unay pampanunoten ti nasaem a napalabas, agsubliak iti normal a rutinak, ken itultuloyko ti panagbiagko.
V. B., Trinidad
Nagsirarakak idin maipapan iti daytoy a tema, ngem saan unay a nalawag ti pannakaibuksilna. Nanipud idi damo a nangngegko ti mensahe ti Biblia, naawatakon a dayta ti kinapudno. Ita, inikkannak ni Jehova iti sabali manen a pamkuatan tapno patiek dayta.
G. B., Italia
Ti pannakidiborsiok ti puon ti panagsagabak iti nakaro a panagleddaang, bassit a panagraem iti bagi, ken ti kanayon nga ilulutuad dagiti sakit. Nupay agsagsagabaak pay laeng, maliwliwaak unay babaen ti panamatik iti karkari ni Jehova agraman ti ayat ken ti emosional a panangsaranay ti kongregasionko!
A. B., Canada
Siam a bulan kalpasan a nagsinakami ken ni lakayko, dadaerak pay laeng ti saem ti agsolsolo a panagbiag. Kasano a makapagnaak iti kalsada no awanen ti mangibin kaniak? Siasinon ti katugawko kadagiti Nakristianuan a gimong? Siasinon ti mangkuyog kaniak nga agpadoktor? Pagyamanan iti panangipalagipyo a saan a baybay-an ni Jehova dagiti inosente nga assawa.
E. S., Brazil
Naliwliwaak unay iti kahon a “Siasino ti Mapabasol?” Inkeddengko ti makidiborsio kalpasan a liniputannak ni lakayko. Kas ken Job, no dadduma kayatko idin ti matay. (Job 17:11-13) Ngem ti pannaranay dagiti miembro ti pamilia ken Kristiano a kakabsat ti nangandingay kaniak.
M. O., Argentina
Saanko la a binasa dagiti serye—impasnekko a binasa dayta! Napadasakon ti nakidiborsio, ket sinalaysay dagitoy nga artikulo amin a saludsod ken pakadanagan a pataudenna. Pagyamanan iti pannakaseknanyo kadakami.
E. L., Francia
Pito ti tawenko idi binaybay-an ni tatang ti pamiliami. Nagsaem daydi. Sumagmamano a tawen kalpasanna, kiniddaw ni Tatang nga awatenmi manen. Siak ken dagiti manongko ti kimmontra unay iti dayta, ngem immanamong ni Nanang. Kalpasan ti panangbasak kadagiti artikuloyo, mangrugrugin a maawatak no apay nga inaramidna dayta a narikut a desision.
A. A., Brazil
Pagyamanan, pagyamanan, pagyamanan kadakayo gapu kadagiti serye! Makaliwliwa a maammuan a dagiti rikna ken emosion ti maysa ket umasping kadagidiay dadduma pay a maipaspasango iti isu met laeng a kasasaad. Nupay kasta, kinunayo: “Mabalin a saanmo unay a naipakita ti ayat, kinadungngo, komendasion, ken pammadayaw a kasapulan ti asawam.” Makapasair daytoy a komento kadakami a nangikagumaan a mamagballigi iti panagasawami. No pangpanggepen ti maysa ti makikamalala, isut’ agbalin a makapaluksaw unay, ket nagrigat a dungnguen ti kasta a tao.
L. W., Estados Unidos
Ladingitenmi no nangsair dagitoy a komento kadagiti agbasbasa. Ngem saanmi a panggep nga ipaawat a mabalin nga ipabasol ti nakikamalala ti dakes nga aramidna iti asawana. Impaganetgetmi iti kahon a “Siasino ti Mapabasol?” a ti nakikamalala ti makimbasol iti inaramidna, aniaman “dagiti kinaimperpekto ti inosente nga asawa.” Ti saludsod ket paset ti salaysay maipapan iti panagsinnublianan. Ipagpaganetgetmi laeng ti kinapateg ti nasayaat a komunikasion, tangay parparegtaenmi dagiti agsinnublianan nga agassawa nga ilasinda dagiti parikut iti panagasawada a mabalin nga agkasapulan iti dagus nga atension. Mabalin nga adda met dagiti ing-ingpen a sakit ti nakem a masapul nga ipudnoda iti maysa ken maysa. Gagangay a ti kasta a saritaan ket agresulta iti panangadmitir ti agassawa iti sumagmamano a pagkurkurangan. Total, “maitibkoltayo amin iti adu a daras.” (Santiago 3:2) Ket nupay masansan a makapasair unay ti kakasta a saritaan, kas kinuna ti artikulomi, “napateg dagitoy a paset iti proseso ti panangisubli iti panagtalek.”—ED.