Nasapa Unay Wenno Naladaw Unay?

ITATTA, adu ti masao maipapan iti pangrugian ti maika-21 a siglo ken ti maikatlo a milenio kalpasan ti pannakaipasngay ni Jesu-Kristo. Kinuna ti magasin a Newsweek a “ti maika-20 a siglo a nangrugi a kas ti Siglo ti Naan-anay a Gubat ken nagbalin a Panawen ti Atomika, ket kasla agpatingga a Panawen ti Panaglinglingay.” Kastoy ti naipadamag iti ruarna nga Enero 22, 1997: “Iti intero a lubong, awanen ti bakante a hotel” para iti selebrasion iti Karabiyan ti Baro a Tawen, inton Disiembre 31, 1999.

Nupay kasta, kuna ti dadduma a tattao a nasapa unay dagiti selebrasion. Ipatuldoda a maisupadi iti pammati ti adu, ti maika-21 a siglo ken ti baro a milenio ket saan a mangrugi inton Enero 1, 2000, no di ket inton Enero 1, 2001. Tangay awan ti tawen a 0, ti umuna a siglo nangrugi iti tawen 1 agingga iti 100, ti maikadua a siglo nangrugi iti 101 agingga iti 200, ken agtultuloyen. Isu nga agrasonda a ti maika-20 a siglo a nangrugi idi Enero 1, 1901, ken ti maikadua a milenio a nangrugi idi Enero 1, 1001, ket agpatingganto laeng inton Disiembre 31, 2000.

Adda pay punto a mausig. Bingbingayen ti kalendariotayo ti tiempo maibatay iti kasakbayan wenno kalpasan ti pannakaipasngay ni Kristo. Bigbigen itan dagiti eskolar a naipasngay ni Jesus a nasapsapa ngem ti naipagarup idi, isu a saanen nga umiso ti napateg a petsa iti kalendario. Agduduma dagiti opinion maipapan iti pannakaipasngay ni Jesus, ngem ipatuldo ti kronolohia ti Biblia ti tawen 2 K.K.P. Babaen dayta a panangkuenta, ti maikatlo a milenio kalpasan ti pannakaipasngay ni Kristo ket nangrugi idi otonio daytoy a tawen! Masarakan ti ad-adu pay nga impormasion kadagiti ruar ti Agriingkayo! a Mayo 22, 1997, iti panid 28, ken iti Disiembre 22, 1976, iti panid 26.a

Aniaman ti kasasaad, nainsiriban no ditay ipapilit a mangrugin ti maika-21 a siglo ken ti baro a milenio iti sumagmamano laengen a lawas. Nupay kasta, maitutop a salaysayen ti Agriingkayo! ti tema a “Ti Maika-20 a Siglo​—Tawtawen ti Dakkel a Panagbalbaliw,” gapu kadagiti kadawyan a panangmatmat.

[Footnote]