Noah​—He Walked With God​—No Kasano a Naaramid ti Video

“ESTORIAENNA apaman a bumangon iti agsapa. Mamitlo wenno mamimpat a buyaenna iti agmalmalem ken agbuya manen sakbay a maturog no rabii.” Ania ti sarsaritaen daytoy nga ina a taga California? Ti dua ti tawenna nga anakna a lalaki ken ti panagayatna iti video a Noah​—He Walked With God.a Kunana pay: “No agay-ayam iti ruar, estoriaenna ti panagaramid iti mangispal-biag a daong bayat nga iggemna ti martiliona.”

Kastoy ti insurat ti maysa pay nga ina: “Masapul nga agyamanak unay iti amin a panagregget, tiempo, ken ayatyo iti pannakaaramid ti video a Noah. Adda anakko a tallo ti tawenna a kabesadona ti dandani intero a video, uray dagiti uni! Dayta ti paboritona a video, ket kiddawenna a buyaenna dayta iti kada aldaw, mamindua wenno mamitlo iti kada aldaw.”

Insurat ti maysa nga ubing a babai a ni Danielle: “Magustuak dayta, ket kayatko a tuladen dagiti inaramid ni Noe. Sapay koma ta mangaramidkayo iti ad-adu pay a video para kadagiti ubbing.”

Siempre, kasapulan ti panawen tapno maaramid dagiti video a naibasar iti Biblia. Apay?

Kasano ti Pannakaaramid ti Video a Noah?

Mabayag pay sakbay a maipelikula ti aniaman nga eksena wenno maipinta ti aniaman a ladawan, nangputaren ti maysa nga scriptwriter wenno mannurat, iti estoria a naibasar iti maysa a salaysay ti Biblia. Idi agangay, daytoy ti nagbalin nga storyboard ket kalpasanna, nagbalin nga script wenno estoria. Ti storyboard ket maysa a serye dagiti babassit ken saan pay a kompleto a drawing a makatulong kadagiti artist tapno matinongda ti panagsasaruno ken disenio ti maysa nga estoria. Nagsasaritaan ti sumagmamano nga indibidual, agraman dagiti artist, no kasano a mayilustrar ti pakasaritaan ni Noe​—ania dagiti paset a pagparangan dagiti aktor ken aktres ken no ania dagiti kasayaatan a maiparang babaen kadagiti lamina. Makatulong dagiti mayakto nga eksena tapno agbalin a napaypayso ti salaysay iti panunot ti ubing. Ipabuyada a sarsaritaen ti Biblia dagiti agpayso a tattao a nagserbi ken Jehova rinibu a tawenen ti napalabas. Ania ti simmaganad nga addang iti produksion?

Napili dagiti nagbalin nga aktor ken aktres a nangirepresentar ken Noe ken iti pamiliana. Nadisenio dagiti aruatenda, ken naikeddeng ti mayanatup a kolor para iti tunggal eksena. Napateg amin daytoy agsipud ta saan a mai-drawing ken maipinta dagiti artist da Noe ken ni baketna ken ti annakna a lallaki ken dagiti manugangna agingga a makitada no ania ti langa dagiti aktor iti mismo nga aruatda. Dagiti ladawan ket masapul a kaasping dagiti agpaypayso nga eksena. Ngem sadino ti nakaipelikulaan dagitoy nga eksena?

Idiay Denmark ti napili, tangay ti sanga nga opisina ti Watch Tower Society iti dayta a pagilian ket addaan iti nalalaing nga agar-aramid kadagiti prop, wenno bambanag a mausar iti pelikula, ken umdas nga espasio ti paktoria a kasapulan kadagiti eksena iti uneg ti balay. Nagbiahe ti maysa a grupo dagiti agar-aramid iti pelikula manipud Audio/Video Services Department ti Watchtower Educational Center sadi Patterson, New York, tapno aramidenda ti pelikula. Nakipaset met dagiti miembro ti sanga idiay Denmark. Naisalaysay ti estoria. Daytoy ti ad-adda a nangpalaka iti panangpataud ti programa iti dadduma pay a lenguahe agsipud ta saanen a kasapulan ti narigat a proseso ti dubbing, kayatna a sawen, ti panangisingit iti naigiddan a patarus ti dialogo. Ngem kasano ti pannakaisagana ti narigat nga artwork wenno dagiti nai-drawing a material?

Arte ken Maysa nga Espesial a Kamera

Nangisagana dagiti artist iti ginasut a lamina a naaramid iti watercolor a naibasar iti storyboard nga insagana ti agparparnuay a timpuyog. Saan a masapul a kuadrado wenno rektanggulo dagitoy a lamina. No dadduma, kurbado wenno sukog itlog, depende iti anggulo ti kamera a nausar. Awan kadagiti lamina ti dakdakkel ngem iti 22 a pulgada por 30 a pulgada, ket kaaduan ti kas kabassit ti 11 a pulgada por 15 a pulgada.

Masapul ti espesial a kamera a mangkontrol iti panaggaraw, wenno motion-control camera, tapno maipelikula dagiti lamina. Tapno kasla agpaypayso, naiplastar dagiti nai-drawing a material iti tallo a katuon​—sango, makintengnga a distansia, ken makinlikud. Iti kastoy a wagas, naipelikula dagiti ladawan iti nagbabaetan ti kaykayo, wenno kadagiti gurong ti elepante, wenno iti aniaman pay a kasapulan tapno maragpat ti matarigagayan a buya. Adda computer a nangkontrol iti kamera ken mabalin a maipalabas ti kamera nga agrikus iti maysa nga eksena wenno mabalinna a padakkelen dayta tapno mapataud ti maysa nga espesial a buya. Gapu itoy, makita a kasla aggargaraw ti eksena idinto ta kinaagpaysuanna, ti laeng kamera ti aggargaraw.

Tangay awanan ti Watch Tower Society iti abilidad wenno pamuspusan a mangaramid iti agpaypayso nga animation wenno kasla aggargaraw a pabuya a cartoon, agkurri ti nadumaduma a wagas nga ar-aramiden ti media wenno warnakan a panagusar iti mayakto nga eksena a kadua dagiti lamina. Daytoy a pamay-an ket tinagiragsak dagiti ubbing nga agtawen iti 3 agingga iti 12, a nakairantaan ti video. Ket silalawag nga ipatuldo ti video ti adu a leksion a mabalin a masursuro manipud iti pagwadan ni Noe. Kanayonanna, ti quiz wenno saludsod a mabasa iti kaha ti video ti makatulong kadagiti nagannak a mangrepaso kadagiti kangrunaan a punto ti estoria kadagiti annakda.

Ti teknolohia ti computer ti nangpataud iti dadduma pay nga espesial nga uni, kas iti pumigpigsa a bayakabak idi panawen ti Layus. Nalaka a maawatan nga adu a panawen ken panagregget nga agparnuay ti naipakat iti pannakapataud ti video a Noah.

Tangay saan nga agbalbaliw dagiti salaysay ti Biblia, kanayonto latta a baro ti video a Noah​—He Walked With God ken makatulong a mangisuro iti tunggal baro a kaputotan dagiti ubbing. Nakaipatuloden dagiti annak ken nagannak iti ginasut a surat ti panangapresiar ken panagkiddawda iti ad-adu pay a video. Kastoy ti insurat ti maysa a babai: “Limapulo ti tawenkon ken nabayagen a napadakkelko dagiti annakko. Ngem patiek a daytoy ket nakapatpateg nga instrumento kadagitoy nga aldaw para kadagiti nagannak nga addaan iti ubbing no maaddaanda iti libraria dagiti video maipapan kadagiti estoria ti Biblia.”

[Footnote]

[Diagram/Ladawan iti panid 25]

(Para iti aktual a pannakaurnosna, kitaem ti publikasion)

Ti kamera a mangkontrol iti panaggaraw ti mangipelikula bayat nga aggargaraw isu a kasla agpaypayso dagiti lamina

[Dagiti ladawan iti panid 22, 23]

Nangrugi ti produksion babaen ti storyboard

[Dagiti ladawan iti panid 23]

Naipelikula idiay Denmark ti kaaduan kadagiti nayakto nga eksena

[Dagiti ladawan iti panid 24, 25]

Nag-drawing ken nagipinta dagiti artist iti 230 a nadumaduma nga eksena

[Dagiti ladawan iti panid 25]

Ti panangedit babaen ti computer, espesial nga uni wenno ladawan, panangisalaysay, musika, ken uni ti nangkompleto iti video