Komusta Ngatan ti Ubing Idi a ni Peter?
BABAEN TI KORESPONSAL TI AGRIINGKAYO! IDIAY ECUADOR
TI Enero 22, 1971, nga Agriingkayo! ket addaan iti artikulo a napauluan “Operasion iti Puso nga Awan Panangyalison iti Dara.” Insalaysayna ti pakasaritaan ti pito idi ti tawenna nga ubing a lalaki a taga Canada nga agnagan Peter, a masapul a maopera idi 1963 tapno agbiag.
Imbaga ti kangrunaan a doktor ni Peter nga adda pamay-an a mangagas iti adda depektona a balbula ti pusona. Ngem idi impan dagiti nagannak ni Peter ti anakda iti maysa nga espesialista ket dinamagda no mabalin a maopera a di mayalisonan iti dara, kastoy ti insungbat ti doktor: “Saan. Talaga nga imposible. Siguradoak iti ibagbagak.”
Tangay di naupay dagiti nagannak ni Peter, intuloyda ti nagbirok ket idi agangay nakasarakda iti siruhano a situtulok nga agopera a di agusar iti dara. Aniat’ nagbanaganna? Nupay nalasatan ni Peter ti operasion, imbagada kadagiti nagannak kenkuana a panawen laeng ti makaibaga no kasano kaballigi ti operasion. Isu a komusta ngatan ti ubing idi a ni Peter?
Idi agtawen ni Peter iti 13, immakar ti sangapamiliaan idiay Ecuador, Sud America, tapno agserbi iti lugar nga agkasapulan kadagiti ad-adu a manangasaba iti naimbag a damag ti Pagarian ti Dios. (Mateo 24:14) Nabautisaran ni Peter idi agtawen iti 15 ket nagbalin a regular pioneer (amin tiempo a managebanghelio) idi agtawen iti 18. Idi agtawenen iti 26, nagbalin nga special pioneer. Nagserbi iti maysa a bario a 3,000 a metro iti ngatuen ti patas ti baybay idiay Andes. Nanipud idi 1988, idi agtawenen iti 31, nangrugi ni Peter nga agserbi kas agdaldaliasat a pannakabagi ti Watch Tower Society a kadua ni baketna a ni Isabel. Agingga ita, isut’ agbisbisita iti nadumaduma a kongregasion iti kada lawas tapno paregtaenna ida.
Kinapudnona, nakaganganaygay ni Peter, a di kasapulan a maopera manen. Anian a yamanna ta isu ken ti rinibu a dadduma pay a Saksi ket tinulongan dagiti nalaing a siruhano a nangraem kadagiti kalintegan ti pasienteda!
[Ladawan iti panid 23]
Ni Peter idi pito ti tawenna, kalpasan unay ti pannakaoperana
[Ladawan iti panid 23]
Ni Peter ken ni Isabel Johnston ita