Manipud Kadagiti Agbasbasa
Sangalubongan a Panagnegosio Kayatko ti agyaman unay kadakayo gapu iti nalawag nga impormasion a naisalaysay iti artikulo a “Sangalubongan a Panagnegosio—No Kasano nga Apektarannaka.” (Setiembre 8, 1999) Nasaysayaat itan ti pannakaawatko no apay nga adda dakkel a naggidiatan dagiti nabaknang ken napanglaw a nasion.
M. Z., Italia
Agad-adalak iti economics iti kolehio ket kalkalpasmi a napagsasaritaan ti tema maipapan iti internasional a panagnegosio. Addada punto iti artikuloyo a saanmi a napagsasaritaan iti klase. Usarekto dagitoy iti eksamenko inton umay a bulan.
H. N., Zimbabwe
Di Umiso a Laser? Ti benneg iti “Panangmatmat iti Lubong” a napauluan “Di Naut-ot a Panagpadentista?” (Oktubre 22, 1999) nadakamatna ti pannakausar ti “erbium:YAG laser para iti dental surgery.” Saan kadi a rumbeng a mabasa daytoy kas “neodymium:YAG”?
D. B., Canada
upay deskribiren ti Academy of Laser Dentistry ti neodymium:YAG laser kas “ti gagangay unay a wavelength nga us-usaren dagiti dentista,” dakamaten ti maysa nga artikulo iti “The Journal of the American Dental Association” (Agosto 1997, Tomo 128, panid 1080-7) ti pannakausar ti erbium:YAG laser a dineskribir ti “FDA Consumer.”—ED.
Crossword Puzzle Maipapan kadagiti crossword puzzle, mabalin kadi nga iyimprentayo ti kompleto a sungbat iti sumaganad a ruar? Kanayon a basaek nga umuna ti magasin ken solbarek ti puzzle kalpasanna, ket narigat a basaen ti panid a nagparangan dagiti sungbat a diak taldiapan dayta.
J. L., Estados Unidos
Apresiarenmi ti singasing. Ngem tangay maiwarwaras ti “Agriingkayo!” iti binalaybalay, adu kadagiti agbasbasa ti saan a makaala iti agsasaganad a ruar. Isu a patienmi a ti kasayaatan ket mayimprenta dagiti sungbat iti isu met la a ruar. Ikagumaam a saan a taldiapan dagitoy a nasaksakbay!—ED.
Panagkulam Agtawenak iti 13, ket adda balasitang a naam-ammok iti eskuelaan a mamati iti panagkulam. Naminsan, dinamagna no ania ti panangmatmatko iti dayta. Imbagak kenkuana a maysaak a Saksi ni Jehova ket saanak a mamati iti panagaramat iti pannakabalin ti okulto. Nakaunget ket sipud idin, sangkadagullitna dayta a tema. Nagpatulongak ken Jehova babaen ti kararag, ket nasungbatan dayta babaen ti artikulo a “Ti Panangmatmat ti Biblia: Ania ti Adda iti Likudan ti Panangkulam?” (Nobiembre 8, 1999) Impabasak ti artikulo kenkuana, ket nanipud idi nabasana, saannakon a kinuestion iti panangmatmatko iti dayta a tema.
K. E., Estados Unidos
Nabungtot a Putahe Pagyamanan iti artikulo a “Surströmming—Nabuyok a Putahe.” (Hulio 8, 1999) Pulos a saanmi pay a nadamdamag dayta idi, isu a kinasaritami ti maysa a kapammatianmi a taga Sweden. Makaay-ayo ti panangdeskribirna iti daytoy a putahe. Kalpasanna, sinorpresanakami idi agangay babaen ti panangtedna iti dua a lata iti dayta. Inkeddeng ti maysa a grupo iti kongregasion iti lugarmi nga agkakaduakami a mangraman iti dayta. Sinurotmi ti pakdaar iti artikulo ket inabreanmi dagiti lata iti hardin. Naimbag laengen ta kasta ti inaramidmi. Nabungbungtot pay ngem iti impagarupmi! Awan ti mabalinmi a pangipadisan iti ramanna! Ngem, dimi koma napasaran ti kasta a dinto malipatan a kapadasan, no saan a gapu iti artikulo.
C. B., Alemania
RSD Dua a tawen ti napalabas sakbay a naisuratko ti panagyamanko iti artikulo nga “RSD—Makariribuk, Naut-ot a Sakit.” (Setiembre 8, 1997) Diak pay nadamag daytoy a sakit agingga a nariknak dayta iti kannigid a takiagko. Imbaga ti physical therapist-ko nga ad-adu ti naammuanna manipud iti artikulo ngem iti panagadalna iti kolehio. Nupay kasta, pagyamanan iti artikulo. Talaga a tinulongannak nga agibtur.
L.M.K., Estados Unidos