No Apay a Rumbeng a Liklikam ti Espiritismo

NO NAISURO kenka a dadduma a porma ti espiritismo ket pamay-an ti pannakiuman kadagiti naimbag nga espiritu, nalabit masdaawka no maammuam ti kunaen ti Biblia maipapan iti espiritismo. Kas pagarigan, kunana: “Dikay bumaw-ing kadagiti mannakiuman iti espiritu, ket dikay makiuman kadagiti propesional a managipadles iti paspasamak, iti kasta agbalinkayo a narugit babaen kadakuada.”​—Levitico 19:31; 20:6, 27, NW.

Kinapudnona, deskribiren ti Biblia daydiay naigamer iti espiritismo a kas “makarimon ken Jehova.” (Deuteronomio 18:11, 12) Apay? Ti panangsukimat iti kunaen ti Biblia maipapan iti maysa kadagiti kangrunaan a paset ti espiritismo​—ti makuna a pannakiuman kadagiti natay​—sungbatanna dayta a saludsod.

Sibibiag Kadi Dagiti Natay?

Maisupadi iti pagarupen ti adu a tattao, isuro ti Sao ti Dios, ti Biblia, a di mabalin a makiuman dagiti tattao kadagiti natayen nga ay-ayatenda. Apay a di mabalin? Bueno, no adda siasinoman a makisarita iti natay, sibibiag ngarud ti natay. Masapul nga adda paset ti bagina a saan a matay. Kunaen ti dadduma a sibibiag ti kararua no matay ti bagi. Agpayso kadi dayta?

Kastoy ti kuna ti salaysay ti Biblia maipapan iti pannakaparsua ti tao: “Ni Jehova a Dios binukelna ti tao iti tapuk ti daga, ket impuyotna iti agongna ti anges ti biag; ket ti tao nagbalin a kararua a sibibiag.” (Genesis 2:7) Saan kadi nga ipalgak daytoy a ti tao a mismo ti kararua ket isu awanan iti di matay a kararua nga agtultuloy nga agbiag kalpasan ti ipapatay ti bagi? Kinapudnona, kuna ti Kasuratan: “Ti kararua nga agbasol matayto.” (Ezequiel 18:4) “Dagiti sibibiag ammoda a mataydanto: ngem dagiti natay dida ammo ti aniaman . . . Awan ti aramid, wenno gakat, wenno pannakaammo, wenno sirib, idiay Tanem (Sheol, NW),” ti gagangay a tanem ti sangatauan.​—Eclesiastes 9:5, 10.

Isu a sigun iti Biblia, ti kararua ket saan a banag nga agtalinaed a sibibiag no matay ti bagi ken mabalin a pakisaritaanto dagiti sibibiag a tattao. Adtoy ti pagarigan ti dua a mararaem nga eskolar ti Biblia a nagkonklusion a matay ti kararua. Kinuna ti taga Canada a teologo a ni Clark H. Pinnock: “Daytoy a kapanunotan [a di matay ti natauan a kararua] ti nabayagen a nangimpluensia iti teolohia, ngem saan a naibasar iti Biblia. Saan nga isursuro ti Biblia a naisigud a di matay ti kararua.” Umasping iti dayta, kinuna ti taga Britania nga eskolar a ni John R. W. Stott: “Ti di ipapatay​—ken iti kasta ti di pannakadadael​—ti kararua ket kapanunotan dagiti Griego, saan a ti Biblia.”

Nupay kasta, makaawat ken makangngeg dagiti tattao kadagiti mensahe a kasla naggapu kadagiti natay. Siasino, ngarud, dagiti agsasao?

Makikomunikar iti Siasino?

Salaysayen ti Biblia nga inusar ti maysa a di makita nga espiritu a persona ti serpiente, a kas ti panangusar ti bentrolokista iti munieka, tapno makikomunikar iti immuna a babai a ni Eva, ket isut’ intuggodna nga agrebelde iti Dios. (Genesis 3:1-5) Awagan ti Biblia daytoy nga espiritu a persona, wenno anghel, a “ti kadaanan a serpiente, daydiay naawagan iti Diablo ken Satanas, a mangiyaw-awan iti intero a mapagnaedan a daga.” (Apocalipsis 12:9) Dayta, ni Satanas, naallukoyna ti dadduma nga anghel nga agrebelde. (Judas 6) Dagitoy nadangkes nga anghel maawaganda a demonio ken kabusor ida ti Dios.

Ipakita ti Biblia nga adda pannakabalin dagiti demonio a mangimpluensia kadagiti tattao. (Lucas 8:26-34) Di ngarud nakaskasdaaw a kuna ti Linteg ti Dios: ‘Awanto ti masarakan kenka nga asinoman . . . nga umuman iti mannakiuman iti espiritu wenno propesional a managpadles kadagiti pasamak wenno asinoman nga agimtuod iti natay. Ta tunggal maysa nga agar-aramid kadagitoy a banag ket makapasimron ken Jehova.’ (Deuteronomio 18:10-12, NW) Ania dagiti pagdaksan ti panangsukir iti daytoy a linteg?

Ti kapadasan a mismo ni Ari Saul iti nagkauna nga Israel ti mangsungbat iti dayta a saludsod. Gapu ta mabuteng idi kadagiti kabusorna, nakiuman ni Ari Saul iti mannakiuman iti espiritu. Kiniddawna a makiuman iti natayen a propeta a ni Samuel. Idi nangngegna ti panangiladawan ti mannakiuman iti espiritu iti lakay, impagarup ni Saul a daytoy nga aparision ket ni Samuel. Ket ania a mensahe ti inawat ni Saul? Ti Israel mayawatto kadagiti kabusorna, ket ni Saul ken ti annakna makikaduadanto ken “Samuel,” a mangipasimudaag a mataydanto. (1 Samuel 28:4-19) Ania ti reaksion ti Dios iti desision ni Saul nga agkonsulta iti mannakiuman iti espiritu? Ibaga kadatayo ti Kasuratan: “Ni Saul natay gapu iti panaglabsingna . . . ken gapu met iti panagsapulna iti patigmaan iti maysa a baglan (mannakiuman iti espiritu, NW), tapno umuman babaen kenkuana.” (1 Cronicas 10:13) Anian a panagsagabana!

Kasta met iti kaaldawantayo, dagidiay naigamer iti espiritismo isarsarakda unay ti bagida. Mamakdaar ti Biblia a ‘dagidiay naigamer iti espiritismo’ agsagabadanto “iti maikadua [wenno, agnanayon] nga ipapatay.” (Apocalipsis 21:8; 22:15) Nalawag ngarud a ti nainsiriban ken makaispal-biag nga aramiden ket liklikan ti amin a porma ti espiritismo.

No Kasano a Sarangten Dagiti Dakes nga Espiritu

Ania ngay no naigamerkan iti espiritismo? Naimbag ngarud no dagus nga agtignayka a mangsalaknib iti bagim ken iti pamiliam manipud iti panangdangran dagiti dakes nga espiritu. Ania ti aramidem? Kas pagarigan: Kasano a salakniban ti tao ti pagtaenganna ken ti pamiliana manipud kadagiti insekto? No napaksiatnan dagitoy iti balayna, ikkatenna iti balayna dagiti banag a mangatrakar kadagiti insekto. Pullatanna dagiti berri ken palagdaenna dagiti diding tapno di serken dagiti insekto, ket no adda pay laeng dagiti insekto, mabalin nga agpatulong kadagiti makaammo a mangpaksiat iti dayta iti lugarna.

Mabalin a makatulong kenka ti kasta a pamay-an tapno masarangetmo dagiti dakes nga espiritu ket makaruk-atka kadagitoy. Usigem ti ulidan dagiti Kristiano idiay Efeso idi umuna a siglo a naigamer iti espiritismo sakbay a nagbalinda a Kristiano. Kalpasan nga inkeddengdan ti rumuk-at iti espiritismo, tallo nga addang ti inaramidda a mangsalaknib iti bagida kadagiti kas insekto a panangraut dagiti dakes nga espiritu. Ania ti inaramidda?

Ti Umuna nga Addang

Kastoy ti ilawlawag ti Biblia: “Adu kadagidiay nangan-annurot kadagiti arte ti panagsalamangka inyegda a pinagkaykaysa dagiti libroda ket pinuoranda ida iti sanguanan ti isuamin.” (Aramid 19:19) Babaen ti panangdadael kadagiti libroda iti panagpadles, dagidiay a kabbaro a Kristiano nangipaayda iti pagulidanan para iti amin nga agtarigagay a mangsaranget kadagiti dakes nga espiritu iti kaaldawantayo. Ibellengmo amin a banag a mainaig iti espiritismo. Daytoy iramanna ti amin a libro, magasin, komiks, video, poster, dagiti elektroniko a material, ken nairekord a musika a mangipasimudaag iti espiritismo, agraman dagiti anting-anting wenno dadduma a banag a maisuot nga “anib.”​—Deuteronomio 7:25, 26; 1 Corinto 10:21.

Maysa a lalaki idiay Abagatan nga America a napeklan iti espiritismo iti adu a dekada impapusona daytoy a Nainkasuratan a balakad. “Maysa nga aldaw,” kunana, “inurnongko ti amin a ramramitko iti espiritismo iti sango ti balayko, innalak ti wasay, ket tinadtadko dagitoy.” Kalpasanna pinuoranna ti amin agingga nga awanen ti nabati. Kalpasan dayta, rimmang-ayen iti naespirituan ket di nagbayag, nagbalin a naregta a ministro iti maysa a kongregasion dagiti Saksi ni Jehova.

Ngem saan nga umdas ti umuna nga addang. Apay? Bueno, uray kalpasan ti adu a tawen a dinadael dagidi Kristiano idiay Efeso dagiti libroda iti mahika, nagsurat ni apostol Pablo: “Addaantayo iti pannakigubal . . . maibusor kadagiti nadangkes nga espiritu a puersa.” (Efeso 6:12) Saan a namingga dagiti demonio. Sapsapulenda pay laeng ti pananggundawayda. Ania pay ti masapul nga aramiden dagidiay a Kristiano?

Ti Maikadua nga Addang

Indagadag ni Pablo kadagiti umuna-siglo a taga Efeso: “Ikapetyo ti naan-anay a kabal manipud iti Dios tapno mabalinanyo ti agtakder a sititibker maibusor kadagiti pangallilaw a pamuspusan ti Diablo.” (Efeso 6:11, footnote ti New World Translation of the Holy Scriptures​—With References.) Agkurri pay laeng dayta a balakad iti kaaldawantayo. Kaasping ti tao a mangikagkagumaan a manglapped iti iseserrek ti insekto iti pagtaenganna, ti Kristiano masapul a patibkerenna ti kasla-diding a depensana tapno saan a maasitgan dagiti dakes nga espiritu. Ania ti ramanen daytoy maikadua nga addang?

“Kangrunaan iti amin,” impaganetget ni Pablo, “alaenyo ti dakkel a kalasag ti pammati, a babaen iti dayta mabalinanyonto a depdepen amin dagiti sumsumged a gayang daydiay nadangkes.” (Efeso 6:16) Nasken unay daytoy a kalasag. No natibtibker ti pammatim, napigpigsa met ti panangsarangetmo kadagiti dakes a naespirituan a puersa.​—Mateo 17:20.

Kasano ngarud a mapapigsam ti pangdepensam? Babaen ti panagtultuloymo nga agadal iti Biblia. Iti ania a pamay-an a nainaig ti panagadal ti Biblia iti pammati? Bueno, no kasano nga agpannuray ti kinatibker ti diding iti kinalagda ti pundasion, kasta met ti kinatibker ti pammati ti maysa a tao agpannuray unay iti kinapigsa ti pamuonna. Ania dayta a pamuon?

Ti umiso a pannakaammo iti Sao ti Dios. Ilawlawag ni apostol Pablo: ‘Ti pammati sumaruno iti banag a nangngeg. Kasta met ti banag a nangngeg sumaruno iti sao maipapan ken Kristo.’ (Roma 10:17) Maawiska nga agkiddaw iti libre a pannakiadal iti Biblia iti maysa a Saksi ni Jehova, iti tiempo ken lugar a kombiniente kenka. Ti kasta a panagadal papigsaenna ti pammatim. (Roma 1:11, 12; Colosas 2:6, 7) Ania ti resulta? Inton agangay, agbalinen ti pammatim a sarikedked nga agserbi a kalasag a manglapped iti impluensia dagiti dakes nga espiritu.​—Salmo 91:4; 1 Juan 5:5.

Ania ti maikatlo nga addang a kasapulan idi nga aramiden dagiti Kristiano idiay Efeso?

Ti Maikatlo nga Addang

Umasping iti dayta, idiay kadaanan nga Efeso, dagidiay kabbaro a manamati nagtignayda a mangsaranget kadagiti dakes nga espiritu, ngem dagidiay a Kristiano agnanaedda pay laeng iti siudad a naigamer iti demonismo. Masapulda pay ti salaknib. Isu nga idi nagsurat ni apostol Pablo kadagiti kapammatianna, imbagana kadakuada ti aramidenda: “Iti amin a langa ti kararag ken araraw itultuloyyo ti agkararag iti isuamin a gundaway iti espiritu. Ket iti dayta a panggep agtalinaedkayo a siririing buyogen ti isuamin a kinatibker ken buyogen ti araraw maigapu iti amin a sasanto.”​—Efeso 6:18.

Sigurado a ti napasnek ken kanayon a panagkararag a maipaay iti pannalaknib ni Jehova ket napateg nga addang, idi ken ita, ken kaskasdi a nasken pay laeng tapno masalaknibantayo kadagiti dakes nga espiritu. Ket makaliwliwa a maammuan a sungbatan ni Jehova ti naimpusuan nga ar-araraw babaen ti panangsalaknibna kenka, a pakairamanan ti tulong dagiti anghelna. (Salmo 34:7; 91:2, 3, 11, 14; 145:19) Nakapatpateg ngarud nga agtultuloytayo nga agkararag iti Dios, “Ispalennakami iti daydiay nadangkes.”​—Mateo 6:13; 1 Juan 5:18, 19.

Inapresiar ti taga Brazil a ni Antônio, a dati a mannakiuman iti espiritu, ti kinapateg ti kararag. Kalpasan nga inawatna ti panagadal iti Biblia ken naammuanna a Jehova ti nagan ti Dios, rinugiannan ti nagkararag a sipapasnek ken Jehova a Dios a nagpatulong tapno makaruk-at iti espiritismo. No sublianna ti napalabas, kunana: “Ti panagkararag ken Jehova talaga a pagkamangak ken pagkamangan ti sabsabali nga inadipen dagiti dakes nga espiritu iti napalabas.”​—Proverbio 18:10.

Makapagballigika

Nasken a kalpasan a naam-ammom ni Jehova, agtalekka a naan-anay kenkuana, agpaiturayka kenkuana, ken tungpalem dagiti bilinna. No aramidem daytoy, salaknibannaka no agpatulongka kenkuana ket usarem ti naganna. Nasagrap ni Antônio ti kasta a pannalaknib. Isut’ maysa itan a Kristiano a panglakayen iti maysa a kongregasion dagiti Saksi ni Jehova idiay São Paulo ket agyaman ta nasarakanna ti kinapudno a nangwayawaya kenkuana.​—Juan 8:32.

Kas ken Antônio ken ti rinibu pay a dati nga espiritista ngem agserserbi itan ken Jehova a Dios, agballigika a rumuk-at iti espiritismo. Ngarud, ibellengmo ti amin a banag a mainaig iti espiritismo, pabilgem ti pammatim babaen ti panagadal iti Biblia, ken ikararagmo a salaknibannaka ni Jehova. Aramidem dagitoy nga addang​—agpannuray ti biagmo iti dayta!

[Blurb iti panid 5]

Sigun iti Biblia, saan a makauman dagiti sibibiag dagiti natay

[Ladawan iti panid 6]

1. Ibellengmo amin a banag a mainaig iti espiritismo

[Ladawan iti panid 7]

2. Itultuloymo nga adalen ti Biblia

[Ladawan iti panid 8]

3. Sipapasnek ken masansan nga agkararagka