No Marigatanka Unay Gapu iti Nakaro a Sakit

“Kasla napak-olanak iti maso.”​—John, idi naammuanna nga addaan iti makabaldado a sakit.

“Napabutnganak.”​—Beth, idi naamirisna a nakaro ti sakitna.

MAYSA kadagiti kasaeman a kapadasan iti biag ket no maammuam nga addaanka iti nakaro ken makabaldado a sakit wenno agbalinka a baldado iti agnanayon gapu ta nadangranka idi naaksidenteka. Naammuam man ti sakitmo iti naulimek nga opisina ti doktor wenno nakitam a mismo ti nadangran a kasasaadmo iti okupado unay a siled a pang-emerhensia, mabalin a dandani dika mamati. Dika man la nakapagsagana tapno madaeram ti napalalo a panagdanagmo no mariribukka gapu iti nakaro a sakit.

Tapno makakalap iti impormasion a mabalin a makatulong kadagidiay nabiit pay nga agsagsagaba iti kumarkaro a sakit, nakisarita ti Agriingkayo! iti adu a tattao iti nadumaduma a pagilian a sibaballigi a nadaeranda ti nakaro a makabaldado a sakit iti adun a tawen. Nakiddaw nga ibagada dagiti opinionda maipapan kadagiti saludsod a kas iti: Ania ti nariknam? Ania ti nakatulong kenka a mangibtur tapno nasimbeng manen ti panunot ken panagriknam? Ania dagiti inaramidmo tapno medio maiwanwanmo manen ti biagmo? Ti naammuanmi a mismo kadagitoy nga interbiu agraman ti sumagmamano a natakuatan dagiti managsirarak a mangad-adal kadagiti epekto dagiti napaut a sakit ket naiparang tapno magunggonaan dagidiay marigrigatan unay gapu iti nakaro a sakit.a

[Footnote]