Manipud Kadagiti Agbasbasa
Nakaro a Sakit Tallo ti annakmi—maysa ti agsagsagaba iti Down’s syndrome ken addaan met ti maysa pay iti sickle-cell anemia. Nabiit pay a kimmaro ti kasasaad ti anakmi nga addaan iti sickle cell isu a rumbeng a mayospital. Gapu iti dayta, narigatankami unay. Patiek a sinungbatan ni Jehova dagiti kararagko idi naawatko ti kopia ti Mayo 22, 2000, nga Agriingkayo! nga addaan iti serye a “Panangdaer ti Pamilia iti Nakaro a Sakit.” Dagitoy nga artikulo ti nangpatured kadakami nga agassawa nga agtultuloy nga agibtur. Pinabilegda met ti namnamami nga iti mabiit awanton ti agkuna iti: “Masakitak.”—Isaias 33:24.
E.J.M., Brazil
Adda baromi nga agtawen iti 19 nga agsagsagaba iti schizophrenia. Adun ti nakitami a libro a mangilawlawag iti daytoy a sakit ngem babaen kadagitoy nga artikulo, ita laeng a nakabasakami iti nangilawlawag iti daytoy a sakit manipud iti panangmatmat ti pamilia. Nagsayaat ti panangilawlawagda iti mismo a pannakidangadangko ken panagsagabak, a kas man la naisurat dagiti anek-eken ti pusok.
H. T., Japan
Sangapulo a tawenen nga agsagsagabaak iti kumarkaro a sakit, ket talaga a natukayak iti wagas ti panangilawlawagyo iti karirikna ti tao. No dadduma, naglaka a mapukaw ti maysa a tao ti kinasimbeng ti panunot ken espiritualidadna, ngem impakita dagiti kakongregasionak a kakabsat a kayatda a maawatan ti sagsagabaek. Babaen ti nainsiriban a sasao, pinabilegdak nga agtultuloy nga agibtur.
M. M., Italia
Binasami dagiti artikulo a sangapamiliaan. Adda rimsua iti balasangko a sakit iti panagisbo ken lima a tawenen a maday-dialysis ti bekkelna. Marigrigatankami unay a mangdaer iti daytoy. Namin-adun a dandani natay isu a kanayon a madandanagankami ken sangkapanunotmi no kaano ti sumaganad a rumsua a problema. Ngem makatulong unay ti pammagbagayo. Masapul a tagipatgenmi ti tunggal aldaw. Napateg met ti kararag. Makatulong kaniak ti pannakaammok a maawatan ni Jehova dagiti riknak.
S. J., Estados Unidos
Maragsakanak unay bayat a naamirisko nga adda gayam makaawat iti kinasaem ti agsakit iti nakaro! Saggaysa a naimatangak ti panagkissiw ti tallo kadagiti babbalasangko a kas kaniak. Dagiti artikulo a kas iti daytoy ti makatulong kadakami nga agbalin a mannakaawat ken tumulad iti panunot ni Kristo.
G. L., Estados Unidos
Dagiti Anaconda Agnanaedak iti lugar nga adda dagiti anaconda. Masansan nga agestoria dagiti tattao maipapan kadagitoy nga uleg, ngem nagrigat nga amirisen no patiek ida wenno saan. Ti artikuloyo a “Dagiti Anaconda—Mangipalgakda Kadi Kadagiti Palimed?” (Mayo 22, 2000) ti nakatulong kaniak a mangilasin iti umiso manipud iti sarsarita, ket sinungbatanna amin a saludsodko maipapan iti daytoy nakaskasdaaw a parsua.
J.S.P., Brazil
Amma a Mangtallikud iti Rebbengenda Duapulo ket lima a tawenen nga agbasbasaak iti Agriingkayo! ket para kaniak, ita laeng a nailawlawag daytoy a tema. (“Agimtuod Dagiti Agtutubo . . . Amma a Mangtallikud iti Rebbengenda—Agpayso Kadi a Matallikudanda?” Mayo 22, 2000) Nailawlawagen ti maipapan kadagiti babbalasang nga inna, ngem ti responsabilidad ti agtutubo nga ama ket saan pay. Diak idi maawatan no apay a ti laeng ina ken ti ubing ti agsagaba idinto ta dua a tattao ti nakiabig. Nagsikogak idi agtawenak iti 19. Naan-anay a tinallikudan ti nangsikog kaniak ti rebbengenna. Pangngaasiyo ta itultuloyyo a bagbagaan dagiti agtutubo nga ‘adaywanda ti pannakiabig.’—1 Corinto 6:18.
C. C., España
Teatro Dagiti Griego Diak mayebkas kadakayo ti kasta unay a panangapresiarko iti artikulo a “Ti Teatro ti Epidaurus—Saan a Naan-ano iti Unos ti Adu a Siglo.” (Hunio 8, 2000) Impagarupko no mamagpanunot ti artikulo ket agpayso a kasta. Nupay kasta, diak impagarup nga aglaon met iti nagadu a naespirituan nga impormasion!
K. S., Estados Unidos