Manipud Kadagiti Agbasbasa
Pornograpia iti Internet Naawatko ti ruar a Hunio 8, 2000, nga addaan iti serye a “Pornograpia iti Internet—Ania ti Maaramidanna a Pagdaksan?” Nagdakkel ti epektona kaniak! Makabulan wenno nasursurok pay ti napalabasen idi naduktalak nga agbuybuya ni lakayko iti pornograpia iti computer; kaikabkabitna dayta idi met la nga aldaw. Naiparna a linukatak ti ridaw ket naduktalak a buybuyaenna ti maysa a naalas a ladawan. Nagrigat a deskribiren ti naaramidan daytoy iti relasionmi. Nagpadispensar, ngem naibabainnan ti panagasawami.
L. K., Estados Unidos
Kayatko nga iyebkas ti panagyamanko gapu kadagitoy nga artikulo. Dandani walo a tawenen a pakidangdangadangak ti problemak a panagbuya iti pornograpia. Nagkararagak itay nabiit, ket inkeddengko nga isardeng ti pannakaadiktok iti pornograpia. Iti dayta met la nga aldaw, naawatko dagitoy nga artikulo.
L. M., Estados Unidos
Naiparna a nalukatak ti maysa a pornograpiko a site iti Internet, sumagmamano a bulan ti napalabasen. Nangrugin ti masansan a pananglukatko iti dadduma pay a site. Nagbanaganna, nagbalinak a managputputong ken naalidunget ken napukaw ti panagayatko kadagiti naespirituan a banag. Naglaka ti maadikto kadagitoy a ladawan. Ngem ikagumaakon nga isardeng daytoy a pannakaadiktok.
M. G., Estados Unidos
Dagiti Kurbata Kayatko nga iyebkas ti apresasionko gapu iti makapainteres nga artikulo a “Dagiti Kurbata Idi ken Ita.” (Hunio 8, 2000) Tallo ti annakko, ket isursurok ida nga ayatenda ni Jehova. Trese anyos ti inauna nga anakko, ken agpadakami a di makaammo no kasano nga isiglot ti kurbatana tapno maitakderanna dagiti pasetna iti Teokratiko nga Eskuelaan ti Panagministro. Saan pay a pulos a nagkurbata ni lakayko a di manamati. Pagyamanan iti panangisuroyo kadakami no kasano nga isiglot ti kurbata iti kasta kasimple a pamay-an.
M. B., Estados Unidos
Agtawenak iti 11, ket nupay kasla karkarna, dagiti ladawan ti nangisuro kaniak no kasano ti agkurbata. Mausarko itan ti amin a kurbatak iti aparadorko!
A. P., Italia
Ebolusion Adda sumagmamano a makapariro iti napudno a debate a nainaig iti tema nga ebolusion a nagparang iti artikulo a “Nainkalintegan Aya ti Ebolusion?” (Hunio 8, 2000) Kinunayo: “Nakappapati kadi nga adda nakarikrikut a pamay-an ti panangpataud ti lawwalawwa a masapul a masursuronto pay laeng ti tao?” Apay a saan? Saan a naan-anay ti pannakaammo dagiti sientista.
C. W., Australia
Adu a nakarikrikut a mekanismo a nainaig iti panangaramid ti lawwalawwa iti seda ti saan pay laeng a maawatan dagiti sientista kalpasan ti adu a dekadan a panagsukisokda. Nupay kasta, ipapilitda a gapuanan daytoy ti ebolusion. Patienmi a daytoy ken ti adu pay a pagarigan ti mangipakita a naan-anay a di nainkalintegan ti ebolusion ket maibagami nga imbes a siensia, ti panamati iti dayta a teoria ket ad-adda a kaasping ti natibker a panamati uray no awan ti ebidensia.—ED.
Ita pay laeng a nakabasaak maipapan iti punto a kanayon a kayatko nga irupir maibusor iti lohika ti ebolusion: Kasano a nabingay dagiti inapotayo (aniaman ti pagarupen ti dadduma nga itsura dagitoy) ken nagbalinda a dua a nagduma a sekso? Saan a malawlawagan dagiti bambanag babaen ti panangibaga a napasamak daytoy minilion a tawen ti napalabasen, tangay saan a mabalin nga in-inut nga agsikog ti maysa a kabaian wenno babai.
H. R., Estados Unidos
Adda nainkalintegan a punto ti managbasatayo. Nakomentuanmi daytan iti Mayo 8, 1997, nga artikulomi a “Mapukpukaw Kadi ti Pamuon ti Ebolusion?” Kinunami: “Mainanama a patientayo a naiparna a timmaud met ti lalaki ken babai a naggiddan tapno mapataud dagiti baro a kita. Ti ad-adda pay a di mapaneknekan ket, masapul met a patientayo a saan laeng a timmaud ti lalaki ken babai a naggiddan no di ket naggiddanda a timmaud iti isu met la a lugar! No dida nagkadua iti maysa a lugar, dida koma naaddaan iti annak!”—ED.