Panangusig a Naimbag iti Buokmo

“ITI tunggal panawen ken kultura,” sigun iti maysa a reperensia, “adda ipalgak ti buok maipapan iti kinatao ti maysa.” Di ngarud pakasdaawan nga interesado unay ti kaaduan a tattao a mangmantener a nasalun-at ken napintas ti buokda.

Adda sumagmamano nga inyimtuod ti Agriingkayo! iti uppat nga aduan kapadasanen a hairstylist wenno mammukis, mangngulot, mangngunnat, mangkolor, ken mangur-urnos iti buok maipapan iti pakabuklan ken panangaywan iti buok. Naammuanmi a mas komplikado gayam ti buokmo ngem iti makita a kasasaadna.

Panagtubo ken Panagurot ti Buok

K: Ania ti pakabuklan ti buok?

S: Addaan ti buok iti aduan ammurat a protina a maawagan keratin. Tunggal linabag ti buok ket agtubo iti getget ti kudil ti ulo a maawagan follicle. Adda papilla, wenno bassit a sarangusong ti tisyu iti kudil, nga aduan iti urat iti baba ti tunggal follicle. Agpataud ti papilla iti adu a selula ti buok a mangtignay kadagiti selula a ngumato agingga iti follicle ken agdedekket tapno mapataud ti buok.

K: Patien ti kaaduan a naparpartak ti panagtubo ti buok no mapukisan. Agpayso kadi daytoy?

S: Saan. Pagarupen ti dadduma a tattao a ti buok ket tartaraonan ti bagi kas iti panangtaraon ti puon ti kayo kadagiti sangana. Ngem apaman a nagtubon ti buok iti kudil ti ulo, daytat’ natayen a substansia. Ti ngarud panangpukis iti buok ket di mangapektar iti panagtubona.

K: Apay nga agtubo dagiti uban?

S: Ti makin-uneg a palunapin ti buok ket aglaon iti maris a mangkolor iti buok. Bayat a matay dagiti selula a mangkolor iti buok, agtubo dagiti uban; paset dayta ti panaglakay ken panagbaket. Nalabit ti nasapa a panaguban ket maigapu iti natawid a kasasaad wenno sakit. Ngem sarsarita laeng ti kunada a panaguban iti agpatnag. Maurnong ti maris iti baba ti kudil ti ulo. No kasta saan nga agpatnag laeng ti panagtubo (agarup kagudua ti pulgada iti kada bulan) ken panagparang dagiti uban iti kudil ti ulo.

K: Ania ti sumagmamano a makagapu iti panagurot?

S: Ti panagurot ket paset ti natural a siklo ti buok. Iti promedio, amin a tattao ket agurot iti mapattapatta a 50 agingga iti 80 a buok iti kada aldaw. Ngem ti kaaduan a makita a kasla sukog ti dapan ti kabalio a panagkalbo ti lallaki ket mabalin a gapu iti natawid a kasasaad ken agparang a gapu iti di kinabalanse dagiti hormone, nga agresulta iti permanente a panagurot. Alopecia ti pangawag iti abnormal a panagurot.a

K: Sigun iti dadduma, ti buok ti pakakitaan no nasalun-at ti maysa a tao. Napaliiwyo kadin daytoy?

S: Wen. Iti baba ti kudil ti buok, taraonan ti dara ti buok. No kasta, ti nasalun-at a buok mabalin nga ipakitana a nawadwad ti suplay a dara. Nupay kasta, ti maysa a tao a kurang ti sustansia nga ipapaunegna wenno aglablabes ti iyiinumna iti naingel nga inumen mabalin a saan a natibker ti buokna ken nalaka a maputed, tangay kurang ti magun-odan ti buokna a sustansia manipud iti darana. Ti panagurot wenno saan a nalagda a buok ket mabalin a nasapa a pagilasinan nga adda sakit wenno masikog ti maysa a tao.

Panangmantener iti Kinasalun-at ti Kudil ti Ulom ken Buokmo

K: Desbribirenyo no kasano a gulgolan ti buok ken ti kudil ti ulo.

S: Ipakita ti kapadasan a ti kaaduan a tattao nga addaan kadagiti parikut iti kudil ti uloda ket masansan unay nga aggulgolda. Siempre, gapu iti lana iti buokmo, nalaka a dumket ti rugit ken tikkab a mabalin a mangbará kadagiti pagtataudan ti lana nga agturong kadagiti follicle. Isu a kasapulan ti regular a panaggulgol. Ngem dagitoy a natural a lana ti mangsalaknib met iti kudilmo kadagiti makadangran a bakteria ken mangseliado iti kasapulan nga agneb. Babaen ti masansan a panaggulgol, papaidamam ti kudil ti ulom iti daytoy a mangsalsalaknib a palunapin ket tumaud dagiti parikut a kas iti nakursing a kudil ti ulo. Kaaduan nga eksperto ti mangisingasing nga aggulgolka no narugit ti kudil ti ulom. Masansan koma nga aggulgol dagiti tattao a nalinab ti buokda ngem kadagidiay kalkalainganna ti kasasaad wenno naangrag ti buokda.

No aggulgolka, masahiem ti kudil ti ulom. Daytoy ti mangikkat kadagiti natay a selula iti buok ken manggutugot iti umiso a panagtaray ti dara, a mangtartaraon iti buokmo. Laglagipem a belnasam a naimbag! No saanmo a belnasan dagiti imam kalpasan a sinabonam dagitoy, agkursing ken agringiad ti kudilmo. Umasping iti dayta, no saan a nabelnasan a naimbag ti inggulgolmo, agkursing ken aglasi ti kudil ti ulom.

K: Kasano a maagasan ti nakursing a kudil ti ulo?

S: Uminumka iti adu a danum, ken manganka iti nasustansia. Daytoy ti mangpaagneb iti kudilmo ken mangpasayaat iti suplay ti daram. Agusarka iti kalkalainganna ti kinasamayna a shampoo wenno paggulgol, ket regular a masahiem ti kudil ti ulom. Agusar met ti dadduma a tattao iti di mabelnasan a conditioner ken losion tapno agagneb ti kudil ti ulo.

Panangurnos iti Buokmo

K: Ania koma ti laglagipen ti maysa a tao no mapan iti maysa a hairstylist?

S: No kayatmo a balbaliwan ti estilo ti buokmo, mangitugotka iti retrato ti kayatmo nga estilo ti buok, ken nalabit iti estilo a saanmo a kayat. Sipaprangka nga ibagam ti kayatmo ken ti kapaut ti panawen a mausarmo a pangurnos iti dayta iti kada aldaw, tangay dadduma nga estilo ti buok ket agkasapulan iti ad-adu nga atension ngem iti sabsabali. Laglagipem a masansan a kasapulan ti mamindua wenno mamitlo a daras nga iyaapan iti hairstylist tapno maammuanna ti kasasaad ti buokmo ken mairuam iti naimbag a pannakilangenna kenka. Isu a dika maupay ken dika agsapul a dagus iti sabali a hairstylist!

No Ania ti Ipalgak ti Buokmo

Ti panangaywan ken panangurnos iti buok isu dagiti pamay-an ti panangipalgak iti kinatao. Ti buok ket napukisan, napaatiddog, naipaunnat, nakulot, nakoloran, ken naurnosen iti nadumaduma nga estilo tapno makidanggay iti uso, makibagay iti narelihiosuan a pammati, ken uray pay kadagiti kapanunotan a nainaig iti politika ken kagimongan. Kitaem a naimbag ti buokmo. Ania ti ipalgakna maipapan iti kinataom? Ti nasalun-at ken makaay-ayo ti pannakaurnosna a buok ti mangpapintas iti makimbuok ken apresiaren ti sabsabali.

[Footnote]

[Dagiti ladawan iti panid 26]

Ti pannangan iti nasustansia ken iyiinum iti adu a danum ti mabalin a makatulong a mangagas iti namaga a kudil ti buok

[Ladawan iti panid 26]

Ti masansan a panaggulgol mabalin a paidamanna ti kudil ti buokmo kadagiti mangsalaknib a lana

[Ladawan iti panid 26]

Ti panaguban ket gagangay a paset ti panaglakay ken panagbaket