Manipud Kadagiti Agbasbasa

Ebidensia ti Panamarsua Gapu ta nagtrabahoak a kadua dagiti sientista iti adu a tawen, kanayon idi a masuronak iti panangikalinteganda a nakasimsimple ti panamati iti panamarsua. Ti serye a “Panangkita iti Ad-adu Ngem iti Makita Dagiti Matam” (Agosto 22, 2000) ti naan-anay a sungbat kadagita a panangikalinteganda. Iti sumagmamano la a panid, nangtedkayo iti makakombinsir nga ebidensia ti panamarsua. Makomendaran ti Agriingkayo! gapu iti nagngato a kalidad ti pannakaisurat ken pannakasirarakna.

B. E., New Zealand

Agad-adalak iti Biblia a kadua dagiti Saksi ni Jehova, ket talaga a napabileg ti pammatik iti kaadda ti Dios idi inusigko ti impormasion maipapan kadagiti atomo, selula, ken DNA.

T. K., Japan

Mailawlawagko itan no apay nga adda dagiti bullalayaw, no apay a berde ti ruot, ken no ania ti atomo! Nupay ti Agriingkayo! ket saan a magasin ti siensia, ipatuldona ti nasientipikuan nga ebidensia a mangpatalged iti panamati iti Namarsua.

M. F., Estados Unidos

Iyiimbag Nupay Di Nayalisonan iti Dara Natukaynak unay ti artikulo a “Maigapu iti Konsiensia.” (Agosto 22, 2000) Napasarak ti isu met la a kasasaad idi nadayagnos nga addaanak iti nakaro a promyelocytic leukemia. Ti napasamak kaniak kalpasanna ket dandani kaasping iti napasamak ken Darlene. Tallo a tawenen ti napalabas, imbagada kaniak a sumagmamano laengen nga aldaw ti panagbiagko.

A. B., Alemania

Seksual a Panangriribuk Kayatko nga iyebkas ti panangapresiarko iti artikulo nga “Agimtuod Dagiti Agtutubo . . . Kasano a Matamingko ti Seksual a Panangriribuk?” (Agosto 22, 2000) Idiay eskuelaan, nagadu ti impanaganda kaniak gapu ta diak nakipaset iti imoral nga aramid. Kalpasan a nagturposak iti haiskul, impagarupko no isardengdan ti panangriribukda, ngem adu a babbalasitang ti manggargari idi kaniak. Ti panangipakaammok kadagiti Nakristianuan a patpatiek ti nakatulong kaniak a mangliklik kadagita a panangriribuk. Pagyamanan iti panangipaayyo kadakami iti kastoy a naespirituan a taraon.

H. C., Zambia

Dakkel ti naitulong ti artikulo. Sangkakitanak ti maysa a barito a kaklasek iti maikatlo a grado. Ita, ammokon ti aramidek.

H. K., Estados Unidos

Dimteng iti umiso unay a tiempo! Mapaspasarak ti seksual a panangriribuk iti panggedak. Maut-utoyanakon. Idi dandani diak makaibturen, kellaat a dimteng daytoy nga artikulo. Ammok itan no kasanok a pakilangenan dagiti katrabahuak.

L. T., Estados Unidos

Siudad iti Russia Tangay makitransaksion ti kompaniak iti intero a lubong, magustuak a basaen dagiti artikulo maipapan iti nadumaduma a pagilian. Adda katrabahuak a ti anakna ket agnanaed idiay Russia, isu a nasaok kenkuana ti maipapan iti artikulo a “Panangpasiar iti ‘Kabayaganen a Siudad iti Russia.’” (Agosto 22, 2000) Naragsakan nga immawat iti dayta, ket kalpasan a nabasana, nagkiddaw iti maysa pay a kopia ti Agriingkayo! Intedko kenkuana ti Mayo 22, 2000, a ruar nga addaan iti artikulo a “Karkarna a Relo Idiay Prague.” Gapu iti daytoy, kinayatna ti nagsuskribir iti Agriingkayo! Pagyamanan iti panangipaayyo iti kasta a napateg nga impormasion.

S. O., Estados Unidos

Nadaruy a Goulash? Napanunotko a padasen ti putahe a Hungarian goulash iti artikulo a “Ti Rekado a Naggapu iti Bangir ti Lubong.” (Setiembre 8, 2000) Naballigi ti amin agingga a nakadanonak iti paset a nadakamat a nayonak iti dua a litro a danum. Imbes nga agbalin a gisado a kas iti makita iti retrato, nagbalin a kasla sopas ti linutok a goulash. Saan kadi nga umiso ti naawatak maipapan iti putahe?

L. P., Canada

Saan, dakami ti nagkamali iti panangawagmi iti dayta kas gisado, tangay kinapudnona, ti putahe ket sopas a Hungarian goulash. Sigun iti dadduma a libro maipapan iti panagluto, maymayat no bassit ti idanummo ngem iti insingasingmi. Nupay kasta, makapainteres ta pinadasen ti sumagmamano nga agbasbasa ti putahe ket nagsuratda a nagustuanda unay dayta!​—ED.