Manipud Kadagiti Agbasbasa

Braille Kablaawankayo gapu iti artikulo a “Louis Braille​—Nanglawag Kadagiti Balud ti Kinasipnget.” (Setiembre 8, 2000) Nakapuy ti panagkita ti prinsipal iti eskuelaan a pagtartrabahuak. Nagustuanna unay ti artikulo idi binasak kenkuana. Adda kopia daytoy a magasin a naikabil iti libraria ti eskuelaan.

M.A.S., Brazil

Panagmennamenna Kayatko ti agyaman kadakayo gapu iti artikulo a “Ti Panangmatmat ti Biblia: Panagmennamenna a Makagunggona.” (Setiembre 8, 2000) Maawatakon a saan nga umiso idi ti pagarupko a ti panagmennamenna ket panagarapaap. Babaen ti panangyaplikarko iti Filipos 4:8, ammokon ti umiso a wagas ti panagmennamenna maipapan kadagiti problemak. Pagyamanan unay!

W. P., Poland

Dagiti Beaver Agtawenak iti 15 ket kayatko ti agyaman kadakayo gapu iti artikulo nga “Agtartrabaho Pay Laeng ti Kaunaan nga Atsero.” (Setiembre 8, 2000) Magustuak ti agbasa maipapan kadagiti animal ken iti panagbiagda. Ngem ita la a naammuak a nagadu gayam ti maaramidan dagiti beaver! Para kaniak, nakaskasdaaw unay ti panangaywanda iti bagida ken iti pamiliada!

S. J., Estados Unidos

Sangapulo ti tawenko, ket binasak ti artikulo bayat a nagkampokami iti igid ti waig. Napanunotko ti awan sarday a panagtrabaho sadiay dagiti beaver. Magustuak dagiti artikulo maipapan kadagiti animal agsipud ta tulongandak a mangapresiar iti amin a nakaskasdaaw nga inaramid ni Jehova.

B. P., Estados Unidos

Makariro a Matematika? Kayatko nga ipakaammo kadakayo ti nadlawko a bassit met ketdi a kamali iti artikulo a “Panangsapul iti Perpekto a Kagimongan.” (Setiembre 22, 2000) Kinunayo a 26 a tawen ti kasapulan iti panangbasa kadagiti tomo a 200 a ribu ti panidda. Iti kalkulasionko, kasapulan laeng ti kurang nga uppat a tawen.

P. I., Romania

Pagyamanan iti kapaliiwanyo. Nupay agpayso a bassit la a panawen ti kasapulan iti panangbasa kadagiti addaan 200 a ribu a panid a libro ti salaysay, ti impormasion a naurnong ti Human Genome Project ramanenna dagiti agkakanaig a DNA, a narigrigat nga amang a tarusan isu a nabaybayag a basaen.​—ED.

Pagarupek nga adda gagangay a kamaliyo iti artikulo a “Ti Di Makita ti Mata.” (Agosto 22, 2000) Nadakamatyo sadiay dagiti mikroskopio a mapadakkelda ti bambanag iti sangamilion a daras, “ti kapada ti panangpadakkel iti maysa a selio agingga iti kadakkel ti bassit a pagilian.” Umanay ti sangamilion a selio iti agsasaruno a 1000 X 1000 a selio. Ipapantayon a maysa a pulgada ti tunggal sikigan ti maysa a selio, agbalin daytoy a kuadrado nga agarup 25 a metro ti tunggal sikiganna. Diak patien nga adda aniaman a pagilian a kasta ti kabassitna!

R. C., Estados Unidos

Imbes nga iladawanyo a ti maysa a selio ket agbalin nga agsasaruno a 1,000 x 1,000 a selio, iladawanyo ti agsasaruno a 1,000,000 x 1,000,000 a selio, tangay ti panangpadakkel ket babaen ti linear, wenno maysa la a dimension. Agarup a dayta ti kadakkel ti maysa a bassit nga isla a pagilian.​—ED.

Kinatalged ti Panageroplano Nagsuratak tapno agyamanak kadakayo gapu iti artikulo a “Panamagbalin a Nataltalged ti Panageroplano.” (Setiembre 22, 2000) Pagay-ayatko ti ageroplano, ngem kalpasan a nabasak daytoy nga artikulo, naamirisko no kasano kaadu ti trabaho ken panawen a maipakat iti pannakasanay dagiti piloto, tangay pampanunotenda ti kinatalgedtayo.

E. P., Virgin Islands

Kinakuttong Apaman a nakitak ti paulo nga “Agimtuod Dagiti Agtutubo . . . Apay a Nakakutkuttongak?” (Setiembre 22, 2000), nakasangitak. Sangapulo ket innem ti tawenko ken 100 a libra ti timbangko. Tangay nakakutkuttongak, naalas ken nalaad ti panagkitak iti bagik. Idi binasak ti artikulo, apresiarek dagiti praktikal nga insingasingna. Ti konklusionna ti kangrunaan a nakatignayak tangay impaamirisna kaniak a ti puso ti kitkitaen ni Jehova.

E. L., Italia