Ti “Balitok” iti Amianan

BABAEN TI MANNURAT TI AGRIINGKAYO! IDIAY POLAND

NANIPUD pay idi un-unana, ti amber ket naawaganen a ti balitok iti Amianan. Naibilang idi dayta a maysa a tagilako idiay kadaanan a Roma. Kinapudnona, naipadamag nga imbaon ni Emperador Nero ti maysa a natan-ok a tao tapno gumatang iti amber ditoy Poland. Ania ti naibayad kadagiti aglaklako ti amber? Dagiti sensilio a balitok ken pirak agraman bambanag a mausar iti inaldaw. Naibaga a ti dalan iti panaglako ti amber ket nakatulong iti pannakaisaknap ti Kristianidad ditoy Poland bayat dagiti immuna a siglo iti Kadawyan a Panawen.

Patien idi ti dadduma nga adda datdatlag a pannakabalin ti amber. Isu a daytat’ nausar idi a pagaramid kadagiti anib​—a maipagarup a mangipaay iti naimbag a gasat, mangsalaknib iti maysa a tao iti kinamalas, ken tumulong iti panaganup ken pannakirupak. Nausar met ti amber iti panagdayaw kadagiti natay. Dagiti naingpis a nagtimbukel a banag, babassit a tadem ti wasay, ken babassit a ladawan a naaramid iti amber ket nausar idi iti panagdayaw iti init, panagdayaw kadagiti inapo, ken kadagiti kulto iti kinabunga.

Maysa pay, napateg met ti paset ti amber iti tradisional a panangagas. Mapapati idi a dagiti maikuentas a naubon a binukel ti amber ket mangbang-ar iti sakit ti ulo, tengnged, ken karabukob, idinto ta dagiti pulseras nga amber paimbagenda dagiti agrayuma. Nausar met ti nadumaduma a maipulagid, sapsapo, gamay, ken amber a naupran iti alkohol. Uray iti kaaldawantayo, patien ti dadduma a makaagas ti amber.

Ti amber ket talaga a pakaidayawan ti Namarsua iti amin a bambanag a ni Jehova a Dios. Adda ngarud naimbag a rason a napaltiingan ti salmista a nangikuna: “Anian a nagadu ti aramidmo, O Jehova! Isuda amin inaramidmo buyogen ti kinasirib. Ti daga napno kadagiti pinataudmo.”​—Salmo 104:24.

[Picture Credit Line iti panid 31]

Amin a retrato: Dzięki uprzejmości DEJWIS COMPANY; Gdańsk-Polska