Manipud Kadagiti Agbasbasa

Kinaawan Panggedan Kayatko nga ipakaammo kadakayo a naparegtaak unay iti artikulo nga “Ania ti Napasamaken iti ‘Panggedan Aginggat’ Tungpal Biag’?” (Oktubre 8, 2000) Nagsayaat dagiti singasing no kasano a saganaan ti panangkissay kadagiti trabahador ken no kasano ti agbiag no awan panggedan. Nataltalged itan ti riknak nga agpainterbiu iti baro a serkak a trabaho.

F. W., Estados Unidos

Parmasia Dagiti Tsino Adu ti pakadanagak maipapan iti teoria a nakaibasaran ti alternatibo a panangagas a nadeskribir iti artikulo a “Panangsarungkar iti Parmasia Dagiti Tsino.” (Nobiembre 8, 2000) Diak busoren ti panagusar kadagiti makaagas a mula. Nupay kasta, saan kadi nga ad-adu ti ramanen ti yin ken yang ngem iti basta napudot ken nalamiis? Pinagbalinyo a simple unay ti doktrina a nagtaud iti okulto ken palso a relihion. Saan kadi a ti kinasimplena ti mamagbalin iti dayta a peligroso?

V. A., Estados Unidos

Pudno nga iti Daya, ti prinsipio ti yin ken yang ket agaplikar iti adu nga aktibidad, a pakairamanan ti panagpadles. Nupay kasta, di ipuera daytoy ti pakausaranna iti dadduma pay a pamay-an a di maiparit iti Kasuratan, kas iti panagaramid iti medikal a dayagnosis. Masapul ngarud nga ikeddeng ti tunggal maysa a Kristiano no usarenna dagiti sistema ti panangagas a naibasar iti daytoy a prinsipio.​—ED.

Dagiti Parikut ti Ubbing Natukayak unay iti serye a “Dagiti Parikut ti Ubbing​—Adda Met Laengen Solusion!” (Disiembre 8, 2000) Nakas-ang dagiti napasarak idi ubingak. Mammartek ni nanangko ken gistay kada aldaw idi a maltratuennak. Iti panaglabas ti panawen, naaddaanak iti depression ket kayatkon ti matay. Dagiti artikulo ti nangipalagip kaniak no kasano kapateg ti singgalut ti annak ken nagannak. Tangay masagsagrapkon ti panagayat ni Jehova kaniak, ikagkagumaak a tarusan ni nanangko; kasta met ngamin dagiti napasaranna idi ubing pay.

U. P., Republic of Korea

Maysaak a maestra a dati a taga Argentina ket mamatiak a nagsayaat koma no iyaplikar ti amin a nagannak ken mannursuro ti pammagbaga daytoy a ruar​—ken ti Biblia, a masansan unay a dinakamatyo.

F. S., España

Pungtot Nabasak ti ababa a padamag a “Panagpungtot ken ti Pusom” iti “Panangmatmat iti Lubong.” (Disiembre 8, 2000) Pudno unay dayta. Adda sakit ti pusok isu a masansan a mariknak a nabannogak ken madi ti bagbagik. Maysa idi a karit kaniak ti eskuelaan gapu ta diak malapdan ti agunget. Ngem agyamanak ken Jehova a Dios ta nagballigiak a nangiwaksi iti panagpungtot iti biagko.

A. F., Estados Unidos

Dagiti Parikut iti Prostate Maapresiar unay ti nabiit pay nga artikulo a “Panangibtur Kadagiti Parikut iti Prostate.” (Disiembre 8, 2000) Nupay kasta, saanna a pulos a dinakamat ti pamay-an a radioactive-seed-implant. Nabiit pay a naipablaak dayta kadagiti kangrunaan a magasin iti E.U. ken basbassit dagiti pagdaksanna.

H. Z., Estados Unidos

Pagyamanan ti panangipakaammoyo iti daytoy a panangagas kadagiti agbasbasa. Sigun kadagiti damag, saan unay a makasinga iti maysa a pasiente ti radioactive-seed therapy (brachytherapy) ngem iti tradisional nga operasion ket iti kaaduan a kaso, mabalin nga epektibo met dayta. Nupay kasta, medio mabayag pay sakbay a maammuan ti adu a doktor dagiti napaut nga epektona. Kabayatanna, mapakaammuan koma a naimbag dagiti pasiente maipapan kadagiti pagpilian sakbay nga agdesisionda.​—ED.

Yellowstone Apresiarek ti artikulo a “Yellowstone​—Pakabalbaliwan ti Danum, Bato, ken Apuy”! (Disiembre 8, 2000) Itay napan a tawen, naragsakankami ken ni baketko a nagtrabaho iti daytoy a parke. Nagsirarak ni baketko babaen ti computer, ket sinukimatko dagiti baresbes. Isu nga idi nagparang daytoy nga artikulo, talaga a naragsakankami isu a binasami a dagus dayta. Nagsayaat a salaysay! Napili a naimbag dagiti retrato ken nagsayaat ti pannakasirarak dagiti impormasion. Tunggal impormasion ket umiso. Ngem tapno maawatan a naimbag ti maysa a tao ti kinapintas ti parke, masapul a pasiarenna daytoy a lugar! Bin-ig a napintas ti makita iti aglawlaw.

D. S., Estados Unidos