Ti Nagan ti Dios Nangpataud iti Kontrobersia

BABAEN TI MANNURAT TI AGRIINGKAYO! IDIAY NETHERLANDS

DAGITI agipatpatarus iti baro nga Olandes a Biblia ti nangpataud iti kontrobersia agpadpada kadagiti eskolar ti Biblia ken ordinario a tattao. Ania ti makagapu? Inkeddengda ngamin nga ipatarus ti nagan ti Dios iti sao a Heer, wenno Apo.

Idi Disiembre 1998, sumagmamano la a lawas kalpasan nga inruar dagiti agipatpatarus ti sample ti inaramidda, nagprotesta ti maysa a grupo dagiti babbai a miembro ti organisasion dagiti Protestante a Kerk en Wereld (Simbaan ken Lubong) babaen iti koreo. Apay? Imbilangda a “nainaig unay iti kinalalaki” ti sao nga “Apo.” Di nagbayag, nakikaduan iti protesta ti dadduma pay a grupo dagiti Katoliko ken Protestante. Idi Pebrero 1999, tallo nga eskolar ti nangyebkas metten iti kapanunotanda babaen ti panagkunada a kayatda laeng nga irepresentar ti uppat a Hebreo a letra ti nagan ti Dios kas YHWH. Di nagbayag kalpasanna, dagiti eskolar iti Biblia, agipatpatarus, ken teologo ti nagmimiting idiay Amsterdam tapno pagsasaritaanda ti isyu. Idi agpatingga ti saritaan, naawis ti amin a nakimiting nga ibutosda ti patarus a kayatda.

Babaen ti paulo a “Por Dios, Ditay Koma Pagaapaan ti Nagan ti Dios,” impadamag ti periodiko a Nieuwsblad van het Noorden ti nagbanaganna: “Ti APO ket nakagun-od iti pito laeng a butos. Ngem bassit latta ti nangibutos iti kaaduan kadagiti pagpilian: ti Nagan (1), Daydiay Maysa (3), ti Naasi (6), ti Di Managanan (7), Daydiay Sibibiag (10), ken Daydiay Agnanayon (15). Ket ti nangabak isut’ . . . YHWH!” Idi Marso 15, 2001, inkeddeng ti Supervision Committee ti baro a patarus ti Biblia nga usarenna ti HEER (APO) iti dadakkel a letra a babassit ti pannakaisuratda a mangirepresentar iti nadibinuan a nagan.

Ipaganetget daytoy a kontrobersia nga agpapan pay iti di panagtutunos maipapan iti matarigagayan a pannakaipatarus ti nagan ti Dios iti Olandes, umanamong dagiti eskolar nga adda personal a nagan ti Dios. Iti Hebreo, ti nagan ket buklen iti uppat a letra a יהוה, wenno YHWH. Kasano ti panangipaulog idi ken ita ti dadduma a patarus ti Biblia iti Olandes iti YHWH?

Maysa nga Olandes nga agnagan Nicolaas Goetzee ti nangipablaak iti dakkel a libro nga edision ti Staten a patarus ti Biblia idi 1762. Kastoy ti nailanad iti panid ti paulona: “Gapu kadagiti napateg ken agdinamag a rason, saanmi met nga impatarus ti Panglaglagip a Nagan ti Dios a JEHOVA.” Ti nagan a Jehova ket inusar met ti dadduma pay nga agdinamag nga Olandes nga eskolar kas kada Propesor Nicolaas Beets ken Petrus Augustus de Genestet.

Makapainteres ta us-usaren ti intero a Baro a Lubong a Patarus ti Nasantuan a Kasuratana ti nagan a Jehova. Sigun iti apendise ti Baro a Lubong a Patarus iti Olandes, “agtultuloy nga usarenna ti porma a ‘Jehova’ gapu ta pamiliar dagiti tattao iti dayta iti adun a siglo. Kanayonanna, daytat’ mangtaginayon . . . iti uppat a letra ti nadibinuan a nagan a YHWH.” No kasta, nakatulongen ti Baro a Lubong a Patarus iti minilion tapno maammuanda ti kinapudno maipapan iti nagan ti Dios.

[Footnote]