Makarepresko nga Inumen Manipud iti Karkarna a Mula
BABAEN TI MANNURAT TI AGRIINGKAYO! IDIAY NIGER
KAAY-AYOM aya ti uminum iti nalamiis no nadagaang ti aldaw? Tagtagiragsaken ti adu a pamilia iti Makinlaud nga Africa ti makarepresko nga inumen a namaris, naimas, makapasalun-at, ken nalaka—ket naaramid dayta manipud iti mula. Bissap ti nagan dayta nga inumen, ket nagtaud dayta iti maysa a kita ti gumamela a maawagan iti tropical roselle. Mabalin a tumayag daytoy a mula aginggat’ dua a metro wenno nasursurok pay. Agtubo iti nadumaduma a rehion iti lubong ngem nangnangruna kadagiti manmano a matuduan a kas kadagiti pagilian ti Niger, Mali, ken Senegal.
No Kasano a Maisagana ti Bissap
Ti sangakutsara kadagiti nalabaga a paset ti sabong ti mula ket maipisok iti agarup sangalitro a danum. Maipaburek ket kalpasanna, mayuper iti 15 agingga iti 20 a minuto. Masagat dagiti nalabaga a paset ti sabong, ket mabalin a mainum ti tsa a napudot wenno nalamiis. Mabalin met a maasukaran wenno saan. Ita, kayatmi ti agisagana iti nalamiis nga inumen a magustuan dagiti ubbing, isu nga asukaranmi. Agisagana met ti dadduma a pamilia iti inumen a nalaokan iti yerbabuena wenno vanilla. Ti nalamiis, nakalablabaga a bissap ket maibukbok kadagiti babassit, saragasag a plastik a supot, sa masiglot dagitoy. Nakasagana itan a maibunong kadagiti magagaran nga ubbing! Siraragsak a ngetngetenda ti murdong ti supot sada inumen ti paboritoda. Siempre, kaykayat ti dadduma nga inumen dayta iti baso.
Malaksid iti kinaimasna, makapasalun-at kano kenka ti bissap. Aglaon dayta iti calcium, phosphorus, iron, bitamina A ken C, ken dadduma pay! Kuna ti dadduma a ti bissap ket kalkalainganna met a pagpaibleng, pagpaisbo, ken pagpasalun-at iti dalem. Aniaman ti pagimbaganna, maragsakantayo ta malaksid iti kinapintas daytoy a mula, mangipaay pay kadatayo iti makapasalun-at ken makarepresko nga inumen!
[Picture Credit Line iti panid 31]
Rinetrato ni Kazuo Yamasaki