Dagiti Rambak a Nainaig iti Vía Crucis Idiay Mexico
BABAEN TI MANNURAT TI AGRIINGKAYO! IDIAY MEXICO
KAS panglaglagip iti ipapatay ni Jesus, agarup 300 a narelihiosuan a rambak ti maangay iti kada tawen idiay Mexico. Ti Vía Crucis ti maysa kadagiti kadakkelan, agraman dagiti prosesion ken pabuya a mangtulad kadagiti maudi nga aldaw iti panagbiag ni Jesus. Ti Vía Crucis ket nagtaud iti Latin a “Dalan ti Krus” ti kaipapananna. Iti distrito ti Iztapalapa idiay Mexico City, kastoy ti inlawlawag ti direktor ti House of Culture iti dayta a lugar maipapan iti namunganayanna: ‘Idi 1833, adda epidemia ti kolera ditoy Iztapalapa. Tapno maep-ep ti panagsagaba, dagiti miembro ti komunidad rinugianda ti aktual a panangipabuya iti Pasion, wenno dagiti panagsagaba ni Kristo iti Maudi a Pangrabii ken ipapatayna.’
Kastoy dagiti gagangay a mapasamak no Vía Crucis: Aguummong ti nagadu a tao tapno makitada ti pannakaipabuya dagiti panguluen a Judio, senturion, apostol ni Jesus, ken babbai a simmurot kenkuana, agraman ni Maria. Adda agtutubo a lalaki nga agakto kas ni Jesus. Masapul nga ikabesana dagiti teksto iti Biblia nga isawangna bayat nga agtultuloy ti pabuya. Agusar dagiti aktor ken aktres iti peluka, barbas, ken iming sada agkawes kadagiti napuskol a pagan-anay. Sumursurot met ken ni “Jesus,” dagiti “Nazareno” a sakasaka wenno nakapalluka iti lalat ken nakoronaan iti siit kas panangtulad iti panagsagaba idi ni Jesus. No dadduma, agdagup iti 2,500 ti bilangda. No aldaw, ibaklayda dagiti krus agingga idiay Cerro de la Estrella (Turod ti Bituen), ti lugar a napilida a “pangilansaan” ken Jesus.
Adda dagiti aglaklako kadagiti produkto a kas kadagiti kallugong, inumen, narelihiosuan a ladawan a mayurit kadagiti pingping wenno takkiag, lobo, kendi para kadagiti ubbing, ken nagadu pay a tagilako. Adda pay ketdi dagiti naipasdek a mekanikal a pagluganan, pagay-ayaman, ken dadduma pay a pangallukoy kadagiti tattao para iti dayta nga okasion.
Iti siudad ti Querétaro, ikagumaan dagiti agpenitensia ti magna a nakakadena dagiti sakada. Idiay Taxco, dandani lima nga oras nga agibaklay dagiti lallaki kadagiti siit nga agtimbang iti 40 agingga iti 50 a kilo. Sapsapliten ti dadduma dagiti mismo a bagida bayat a sumursurotda iti prosesion. Idiay ospital ti masansan a pagtungpalan ti adu kadagiti makiprosesion.
Daytoy a kita ti panagdayaw ket mabalin nga ipalagipna kadatayo ti imbaga ni apostol Pablo idi nasaona ti maibusor iti “kabukbukodan nga impasdek a porma ti panagdaydayaw ken sinsinan a kinapakumbaba, maysa a nakaro a panangparigat iti bagi.” (Colosas 2:23) Agpayso a lagipen dagiti pudno a Kristiano ti ipapatay ni Kristo, ngem dida makipaset kadagiti tradision a nairamut iti kinaulbod ken maisalungasing kadagiti prinsipio ti Biblia.