Nasapa nga Agbalin nga Inna

“Guapo ti nobiok. Nabaknang, isu a makapasiarkami iti adu a lugar, ken makapagragragsakkami. Idi diak nagregla, ammokon a masikogak. Kasano nga ibagak ken Nanang? Madanaganak iti napasamak kaniak. Agtawenak laeng idi iti 16, ket diak ammo ti aramidek.”​—Nicole.

KADAGITOY nga aldaw, ni Nicolea ket agtawenen iti nasurok a 35. Maysa itan a natalek ken naparagsit nga ina ti tallo nga annak. Agtawenen iti 20 ti inauna nga anakna. Wen, isut’ maysa idi kadagiti minilion a di naikasar a masikog a tin-edyer. Kas iti dadduma a tin-edyer nga inna, nariribukan ken kasla dina madaeran idi ti nagdakkel ken narigat a pangngeddeng, ken di masinunuo a namnama.

Saan a kanayon nga iyestoria ni Nicole ti makapaladingit a kapadasanna, ti panangilibak, buteng, pungtot, ken ti pannakapaay a napasaranna kadagiti maudin a tawen ti kinatin-edyerna​—panawen a ti laeng pakasikoran dagiti kapatadanna ket dagiti kawes ken gradoda iti eskuelaan. Nupay kasta, adda pay namnama ti kasasaad idi ni Nicole. Naayat ti pamiliana a nangpadas a mangipasagepsep kenkuana kadagiti nangato a pagalagadan ti moral. Nupay apagbiit a dina inkabilangan dagita a prinsipio​—ken sinagabana dagiti nagbanagan dayta​—idi agangay, dagita met la a prinsipio ti nakatulong kenkuana a maaddaan iti nabunga ken makapnek a panagbiag. Ti replanna ket, “kanayon nga adda namnama.”

Nakalkaldaang ta saan nga amin a tin-edyer nga inna ket addaan iti manangandingay a pamilia​—wenno kasta a positibo a panangmatmat. Adu ti makaamiris a naisagmakda iti kasla nakapimpiman a kinapanglaw. Dadduma ti kapilitan a mangsaranget iti resulta ti pannakarames ken kinaranggas.

Awan ti pagimbagan nga ipasimudaag daytoy kadagiti annak ti tin-edyer nga inna. Kuna ti libro a Teen Moms​—The Pain and the Promise, a ti annak dagiti tin-edyer nga inna “nalaglag-anda, managsakit, nalaklaka a matay, manmano a maipadoktor, mabisbisinan ken di nasayaat ti pannakataraonda; ad-adda a maipasangoda iti kinaranggas, ken matiltilda ngem iti annak dagiti natataengan nga inna.” Kinapudnona, ti annak dagiti tin-edyer nga inna ad-adda nga agbalindanto met a tin-edyer nga inna ngem iti annak dagiti natataengan nga inna.

Kasano kaadu dagiti agsikog a tin-edyer? Kasano a sibaballigi a masaranget dagiti tin-edyer nga inna dagiti karit iti panangpadakkel kadagiti annakda? Adda kadi aniaman a pamay-an a makatulong kadagiti agtutubo tapno iti damo pay laeng ket didan maisagmak iti kasta a nakalkaldaang a kasasaad? Sungbatan dagiti sumaganad nga artikulo dagitoy a saludsod.

[Footnote]