Ti Tarigagay a Maayat

Idi un-unana, iti siudad a maawagan itan a pagilian ti Turkey, adda balasang nga agnagan iti Lea. Kadawyan laeng ti langa ni Lea, ngem napintas ti adingna a babai a ni Raquel.

NAAM-AMMO ni Raquel ti maysa a lalaki nga agrayo unay kenkuana. Uray la nga immanamong dayta a baro nga agtrabaho iti pito a tawen para iti ama ni Raquel tapno isut’ maikallaysana. Ngem idi karabiyan ti kasar, ti ama dagiti babbalasang insukatna ni Lea iti adingna. Ditay ammo no ania idi ti rikna ni Lea iti plano ni amana, ngem sigurado nga ammona a saan a kasta ti kasayaatan a pamay-an ti pannakiasawa.

Idi naammuanna ti napasamak, nagreklamo ti kabbaro nga asawa a lalaki. Inlawlawag ti ama a kadawyan nga umun-una a mayasawa ti inauna. Gapuna, natakuatan ni Lea a sisisikap a nayasawa iti lalaki a nagayat nga immun-una ken adingna, nga inkasarna met. Maladingitan la ketdi ni Lea idi nakitana a ni adingna ti kangrunaan a maipatpateg! Saan a napadasan ni Lea ti nadungngo a pannakiinnaremna ken manmano, no adda man, dagiti naragsak a pakalaglagipanna idi aldaw ti kasarna. Sigurado a tartarigagayanna ti maayat a kas ken Raquel! Isu a gapu ta awan unay ti maaramidanna iti kasasaadna, nalabit masansan a marikna ni Lea nga awan ti mangdungdungngo ken mangay-ayat kenkuana.a

No dadduma, adu ita ti makaawat iti rikna ni Lea. Gagangay a tarigagayantay amin ti agayat ken maayat. Nalabit kayattayo ti maaddaan iti asawa nga agayat kadatayo. Kayattayo met nga ipategdatayo dagiti nagannak, annak, kakabsat, ken gagayyemtayo. Kas ken Lea, nalabit makitatayo ti dadduma a mangsagsagrap iti ayat idinto ta ditay masagsagrap dayta.

Sipud kinaubingtayo, nangngegtayon dagiti estoria ti panaginnayat dagiti napipintas a tattao a nagginnusto ken nagbiag a siraragsak kalpasanna. Dagiti kumakanta agkantada maipapan iti ayat; daytat’ idayaw dagiti dumadaniw. Nupay kasta, kastoy ti insurat ti maysa a managsukisok maipapan iti ayat: “Awan ti aniaman a gannuat ken aramid a kas iti ayat a nangrugi babaen iti napalalo a panangnamnama ken panangsegga, ngem kanayon a mangpaay kadatayo.” Kinapudnona, masansan nga ad-adda a makapadanag dagiti kasingedan a relasiontayo​—pagladingitendatayo imbes a kanayon a paragsakendatayo. Iti adu a pagilian, agdiborsio ti agarup 40 a porsiento iti amin a pagassawaan, ket saan a naragsak ti adu a di nagdiborsio.

Iti adu a pagilian, immadu met dagiti agsolsolo a nagannak ken pamilia a di naragsak ti panaglalangenda, ket agsagsagaba met dagiti annak. Ngem nangnangruna a kasapulan dagiti annak ti emosional a kinatalged ti manangipateg ken naayat a pamilia. No kasta, ania ti napasamaken iti ayat? Pagpaisuruantayo ngay tapno masursurotayo daytoy nagpateg a kababalin? Usigen dagiti sumaganad nga artikulo dagitoy a saludsod.

[Footnote]