Manipud Kadagiti Agbasbasa
No Kasano ti Agbirok ken Mangtaginayon iti Panggedan (Hulio 8, 2005) Apresiarek ti insingasingyo a panangsurnad iti tunggal maitukon a trabaho, uray no kasla nanumo dayta. Nabiit pay a kayatko a paset-tiempo laeng koman ti panagtrabahok tapno ad-adu ti panawenko iti Nakristianuan a ministerio. Ngem napiliak unay iti awatek a trabaho. Idi agangay, adda manen naitukon kaniak a sabali a trabaho isu nga inawatko dayta. Nanumo ngem ikagkagumaak a mapnekak koman iti dayta. Uray kaskasano, saan unay a mabannog ti isipko no agawidak isu a maipamaysak ti personal a panagadalko iti Biblia.
M. I., Japan
May Day—Ania ti Kaipapananna Kenka? (Abril 22, 2005) Addaak iti maudi a tawen ti haiskul ket idiay eskuelaanmi, tinawen a maangay ti May Day. Adda maudi a panagensayo ket makiddaw iti amin nga estudiante iti haiskul ken dagiti maika-5 agingga iti maika-8 a grado a buyaenda dayta. Timmabunoak idin kadagitoy, ngem daytoy a piesta ti nangriribuk iti konsiensia ni manangko. Nakatulong kaniak daytoy nga artikulo tapno maamirisko a husto gayam ni manang! Pagyamanan unay. Naintiempuan unay ti idadateng ti artikulo!
C. C., Estados Unidos
Panangibtur iti Sakit Babaen iti Kinamanagpakatawa (Abril 22, 2005) Innem a tawenen a makidangdangadangak iti kanser ti obariok. Namin-adun a naoperaak ken naipasidong iti chemotherapy. Kas ken Conchi, ikagkagumaak a suportaran ti kongregasionko ken tabunuan ti amin a gimong ken kombension. Narigat a sakit ti kanser, isu nga apresiarek ti nasao ni Conchi no kasano a daeran ti masansan a nakalkaldaang nga ibaga dagiti doktor kadakami nga addaan iti kanser. Talaga a makaparegta kaniak ti kapadasan ni Conchi!
B. F., Estados Unidos
Agsagsagabaak iti lupus, ken naminsan nga adda tiempo a naamnesiaak. Bayat nga agpapaungarak, inkagumaak a taginayonen ti kinamanagpakatawak. Itay nabiit pay, bayat a nayospitalak gapu iti gastritis, inkagumaak met nga inaramid dayta. Immanamongak iti imbaga ni Conchi, “Saan nga ang-angaw ti agsakit, ngem masapul nga ikagumaam a taginayonen ti kinamanagpakatawa.”
M. A., Venezuela
Panangmatmat iti Lubong (Hulio 8, 2005) Maipapan iti ababa a padamag a napauluan “Dagiti Suplemento a Bitamina ken Kanser,” kayatko nga ipatuldo a saan nga anamongan ti adu a nutrisionista dagiti dinakamatyo a kapanunotan ni Dr. Sullivan. Sigun kadagiti damag iti nagadu a nasientipikuan a publikasion ken panagadal, dagiti substansia nga inlistayo ket talaga a makatulong a manglapped ken mangagas iti dadduma a kita ti kanser. Para kaniak, ti panangipablaak iti maymaysa ti dasdasiganna nga impormasion maipapan iti daytoy a banag mabalin a pagpeggadenna ti neutral a takder ti Agriingkayo!
A. B., Netherlands
Kastoy ti sungbat ti “Agriingkayo!”: Kas iti insurat daytoy nga agbasbasa, nabatad nga iti sumagmamano a kasasaad, impakita dagiti panagadal a makagunggona kadagiti addaan iti kanser dagiti substansia a nadakamat iti ababa a padamagmi. Ladingitenmi ti aniaman a di umiso a pannakaawat a mabalin nga imbunga ti pannakaipablaak daytoy ababa a padamag. Neutral ti takder ti “Agriingkayo!” no maipapan kadagiti panagpaagas iti aniaman a sakit. Nupay indatagmi ti maysa nga impormasion a nainaig iti salun-at tapno usigen dagiti agbasbasa, dina kaipapanan nga irekomendarmi dayta. Umasping iti dayta, no dakamatenmi ti maysa a publikasion wenno maysa nga eksperto iti espesipiko a benneg ti panagadal, ammomi a kas iti masansan a mapasamak, mabalin a naiduma ti kapanunotan ti sabsabali pay a publikasion ken eksperto. Makaammo dagiti agbasbasa nga agdesision sigun iti naammuanda no ania ti aramidenda maipapan iti salun-atda.