Ti Karirigatan a Saludsod

“APAY?” Nakalkaldaang ti kinakaro ti tuok ken saem a mabalin a mayebkas iti dayta a nakasimsimple a sao. Masansan nga isaludsod dayta dagiti tattao kalpasan ti didigra wenno trahedia: Adda bagyo a nangdalapus iti maysa a rehion, a nakaigapuan iti ipapatay ken pannakadadael. Rinebbek ti ginggined ti maysa a siudad. Gapu iti iraraut dagiti terorista, nagbalin a nakaam-amak ken naranggas ti maysa a natalna ken okupado nga aldaw. Wenno gapu iti aksidente madangran wenno matay pay ketdi ti maysa nga ing-ingungoten.

Masansan a dagiti inosente ken awan gawayna ti mabiktima. Nabiit pay nga adu dagiti napasamak a kakasta a didigra, a nakaigapuan iti panagimtuod ti adu a tattao iti Dios, “Apay?” Usigenyo ti sumagmamano a pagarigan:

◼ “O Dios, apay nga inaramidmo ti kastoy kadakami? Ania ti inaramidmi a nangpagura kenka?” Sigun iti Reuter nga ahensia ti damdamag, kasta ti inimtuod ti maysa a baket idiay India kalpasan ti tsunami a nangdadael iti purokda.

◼ “Sadino ti ayan ti Dios? No ti Dios ti mangiturturay iti isuamin a banag, apay nga impalubosna a mapasamak daytoy?” Dagitoy ti naisaludsod iti maysa a periodiko idiay Texas, E.U.A., kalpasan a pimmaltog ti maysa a lalaki iti simbaan, a nakatayan ken nakasugatan ti sumagmamano a nakimisa.

◼ “Apay a binaybay-an ti Dios a matay ti gayyemko?” Daytoy ti insaludsod ti maysa a babai kalpasan a natay ti gayyemna gapu iti kanser, ket nabati ni lakayna a mangaywan kadagiti lima nga annakda.

Saan laeng a dagitoy a tattao ti mangipagarup a ti Dios ti makinggapuanan kadagiti pakarigatanda. Kas pagarigan, no maipapan kadagiti natural a didigra, dandani kagudua kadagiti napagsaludsodan iti Internet iti nabiit pay ti nangibaga a naggapu iti Dios dagiti didigra a kas kadagiti bagyo. Apay a kasta ti ibaga ti nagadu a tattao?

Narelihiosuan a Pannakariro

Imbes a mangtedda kadagiti makapnek a sungbat, dagiti pangulo ti relihion ti masansan a pakaigapuan iti pannakariro. Tingitingentayo ti tallo laeng kadagiti kadawyan a sungbatda.

Umuna, ibaga ti adu a pangulo ti relihion a palubosan ti Dios dagiti didigra tapno dusaenna dagiti managdakdakes. Kas pagarigan, iti Estados Unidos, kalpasan ti panangdadael ti bagyo a Katrina iti New Orleans, Louisiana, imbaga ti dadduma a ministro a dinusa ti Dios ti siudad. Impatuldoda nga agraira ti panagkunniber, panagsugal, ken imoralidad. Usarenda pay ti Biblia kas pammaneknek, ket dakamatenda dagiti gundaway a ti Dios dinadaelna dagiti nadangkes babaen ti layus wenno apuy. Ngem dagita ket di umiso a panangiparang iti Biblia.—Kitaem ti kahon nga “Ar-aramid ti Dios?”

Maikadua, dadduma a klero ti agkuna nga adda rason ti Dios no apay a nangyeg kadagiti kalamidad iti sangatauan nupay ditay maawatan dagitoy. Adu a tattao ti saan a mapnek kadagitoy a sungbat. Pampanunotenda, ‘Talaga kadi nga aramiden ti naayat a Dios ti kasta a dakes a pagteng sa kalpasanna agkedked a mangilawlawag iti dayta kadagiti napasnek nga agsapsapul iti liwliwa ken agpakpakaasi nga agimtuod, “Apay?”’ Wen, ibaga ti Biblia: “Ti Dios ket ayat.”—1 Juan 4:8.

Maikatlo, ibaga ti dadduma a pangulo ti relihion a nalabit saan a mannakabalin-amin ti Dios ken saan a naayat. Ti kasta a panangilawlawag mangpataud manen kadagiti mamagpanunot a saludsod. Daydiay kadi ‘namarsua iti amin a banag’—agraman ti di matukod ti kalawana nga uniberso—dina kabaelan a lapdan ti panagsagaba ditoy daga? (Apocalipsis 4:11) Kasano a Daydiay nangted kadatayo iti kapasidad nga agayat, a deskribiren ti Saona kas pagwadan ti ayat, di maasian iti panagsagaba ti tao?—Genesis 1:27; 1 Juan 4:8.

Siempre, dagiti tallo a komento a kalkalpas a nadakamat ket sumagmamano laeng a pamay-an ti panangilawlawag dagiti tattao no apay nga ipalpalubos ti Dios ti panagsagaba. Dayta ti saludsod a nangriro kadagiti managpanunot a tattao iti adun a siglo. Usigentayo iti sumaganad nga artikulo no ania ti isursuro ti Biblia maipapan iti daytoy a nagpateg ken naintiempuan a tema. Maammuanyonto a ti nagsayaat, nainkalintegan a panangilawlawag ti Biblia ikkatenna ti pannakariro. Maysa pay, ti Biblia mangliwliwa kadagiti amin a nagsagaban kadagiti trahedia iti biag.

[Kahon/Ladawan iti panid 4]

Ar-aramid ti Dios?

Isursuro kadi ti Biblia a ti Dios ti makin-aramid kadagiti natural a didigra a maim-imatangan iti kaaldawantayo? Saan! Dagiti panangukom ti Dios a dineskribir ti Biblia ket naidumada kadagiti natural a didigra. Maysa pay, ti Dios pilienna ti dadaelenna; mabasana ti puso ti maysa a tao ket dadaelenna laeng dagidiay nadangkes. (Genesis 18:23-32) Kasta met, mangpakdaar pay nga umuna ti Dios sakbay a mangdadael tapno dagiti nalinteg maaddaanda iti gundaway nga aglisi iti didigra.

Iti kasumbangirna, awan ti pakdaar dagiti natural a didigra, ket awan pilienna a papatayen ken dangran. No dadduma, pakaruen met dagiti tattao dagita a didigra babaen ti panangdadaelda iti natural nga aglawlaw ken babaen ti panagibangonda kadagiti pasdek ken balbalayda kadagiti lugar a kanayon a dalapusen ti ginggined, layus, ken bagyo.

[Credit Line]

SENA VIDANAGAMA/AFP/Getty Images

[Ladawan iti panid 4]

Dagiti pangulo iti relihion nangipaayda kadagiti nagduduma a makariro a sungbat