Panangmatmat iti Lubong
◼ “Inamin ti 50% kadagiti amin a pagassawaan a ‘saanda a napudno kadagiti assawada no maipapan iti panaggastosda.”—THE WALL STREET JOURNAL, E.U.A.
◼ “Nasurok a 84 a porsiento iti daga ti Grecia ket agpegpeggad nga agbalin a desierto ken tikagen ti 8 pay a porsiento.”—KATHIMERINI, (INGLES NGA EDISION), GRECIA.
◼ Ti Lateu, iti Tegua Island, idiay Vanuatu, Oceania, ti mabalin a kaunaan a bario a nagpanawan—wenno tapno ad-adda nga umiso, nayakaren dayta—gapu iti agbaliwbaliw a paniempo. Dagiti pagtaengan sadiay ket namin-adun a “nabagyo ken naapektaran iti dadakkel nga allon ti baybay.”—VANUATU NEWS, VANUATU.
Umad-adu ti Agtawen iti 100 Wenno Nasursurok Pay
Kadagitoy nga aldaw, saanen a karkarna ti panagbiag agingga iti edad a 100, kuna ti magasin a New Scientist. Iti intero a lubong, adda itan ti agarup 200,000 a centenarian, wenno dagidiay agtawen iti 100 wenno nasursurok pay. Kinuna pay dayta a magasin nga 66 kadakuada ti agtawenen iti 110 isu a maawaganda iti supercentenarian. Kuna ti New Scientist a no dadduma, narigat a paneknekan no talaga a lakay wenno baket unayen ti maysa a tao. Nupay kasta, ti “kinaawan dagiti autentiko a papeles kaipapananna met a mabalin nga agdagup iti 450 ti aktual a kaadu dagiti sibibiag pay laeng a supercentenarian.”
Naammuanen ti Misterioso a Mammapatay
“Ti DNA a naala kadagiti ngipen iti nagkauna a tanem idiay Atenas ti nakatulong tapno maammuan” ti maysa a nagkauna a mammapatay, kuna ti magasin a Maclean’s iti Canada. Iti librona a History of the Peloponnesian War, dinakamat ti Griego a mannurat a ni Thucydides ti maysa nga angol a nangapektar iti Atenas idi agarup 430 K.K.P. isu a ti Sparta ti nangabak iti gubat iti nagbaetan dagita a dua a siudad. Saan a matukoy no ania a talaga dayta nga angol yantangay saan nga espesipiko ti panangdeskribir ni Thucydides iti dayta. Ngem ita, mabalinen a masukimat ti sensitibo a tisyu iti makintengnga a paset ti ngipen, nga addaan kadagiti urat, a mabalin a sinigsiglo a mangpreserba kadagiti organismo a pakaigapuan ti sakit. Naipadamag a dayta ti makagapu a naammuan dagiti managsukimat a tipus gayam ti misterioso idi a mammapatay.
Robot a Hinete Kadagiti Kamelio
Nalatak nga isport ti karera dagiti kamelio kadagiti pagilian iti Persian Gulf, wenno iti nagbaetan ti Iran ken Arabia. Nupay kasta, nganngani naisardeng dayta idi binabalaw dagiti mangitantandudo kadagiti kalintegan ti tattao ti pannakausar dagiti ubbing kas hinete, wenno mangpataray kadagitoy nga animal. Nupay kasta, kuna dagiti eksperto a tapno naparpartak ti panagtaray dagiti kamelio, rumbeng a nalaglag-an ngem iti 27 a kilo ti timbang dagiti hinete. Isu a maiparit metten ti panagpataray uray dagiti tin-edyer. Ania ngay ti solusion? Dagiti robot a hinete. Nakaimbento dagiti diseniador a taga-Switzerland iti agarup 26 a kilo a robot a makontrol manipud iti adayo. Mabalin nga igalut dayta iti espesial a silia iti bukot ti kamelio. Sinan tao ti langa dayta a robot ken adda timekna a kas iti tao tapno saan a madlaw ti kamelio. Kabaelanna met ti agsadag, agbalanse, agusar iti latigo, ken agpataray iti kamelio. Magagaran unay dagiti addaan kadagiti kamelio nga agusar iti kasta.
Nagtubo ti Bukel Kalpasan ti 2,000 a Tawen
Dagiti nagkauna a palma a datiles idiay Judea a maipatpateg unay gapu iti kinapintas, kinarangpaya, ken makaagas a kalidadda, ket dinadael dagiti krusada idi Edad Media. Ngem ita, impadamag ti The New York Times a “nagballigi dagiti doktor ken sientista a taga-Israel a nangpatubo iti bukel ti datiles a dandani 2,000 ti tawennan. Ti bukel, a nabirngasan iti Matusalem, ket nakabakab idiay Masada,” ti sarikedked iti derraas a sinakup dagiti Romano idi 73 K.P. Kas maysa nga eksperto iti agrikultura kadagiti natikag a lugar, imbaga ni Dra. Elaine Solowey, ti nangpatubo iti bukel, nga adu a tawen ti kasapulan sakbay nga agbunga dayta naganus pay a mula, no kababai dayta. “No kalalaki,” kinunana, “makapainteres ken karkarnanto la a banag dayta.”