Manipud Kadagiti Agbasbasa

Ania ti Masakbayan ti Kristianidad? (Pebrero 2007) Naibasar iti Sao ti Dios ti kaaduan iti ibagbagayo, isu nga umanamongak kadakayo. Ngem adda dua a diak anamongan iti magasinyo. Ti maysa ket ti negatibo a nakunayo maipapan iti dadduma a Kristiano a relihion. Ti sabali pay ket ti panangipasimudaagyo a nasaysayaat ti relihionyo ngem iti sabsabali. Nagsayaat koma no agtutunos ken addatayo amin iti maymaysa a relihion, ngem saan met ngarud a kasta ti mapaspasamak. Para kaniak, awan ti relihion a nasaysayaat ngem iti dadduma.

S. S., Estados Unidos

Sungbat ti “Agriingkayo!”: Saan a konkontraen dagiti Saksi ni Jehova dagiti indibidual a dida karelihionan, ket saanmi met nga ibilang ti bagbagimi a nasaysayaat ngem iti sabsabali. Bigbigenmi nga “amin nagbasol ken agkurang iti dayag ti Dios.” (Roma 3:23) Sipapanunotkami iti dayta bayat nga us-usarenmi ti pigsa, sanikua, ken panawenmi iti panagbalaybalay tapno iranudmi dagiti kinapudno nga isursuro ti Biblia, agraman ti nakasaysayaat a namnama nga ibagbaga ti Biblia. Nupay kasta, kas iti inaramid ni Jesus ken dagiti pasurotna, nasken met a situtured nga ibutaktakmi ti panaginsisingpet ken ulbod a pannursuro dagiti relihion.

Ania ti Sungbatmo? Iti napalpalabas, manmano nga ilawlawagko daytoy a benneg iti dua nga annakko. Ita, ibilangko daytan kas epektibo nga instrumento a mabalinko nga usaren tapno maimulak dagiti kinapudno nga isursuro ti Biblia iti puso dagiti annakko. Magustuak met dayta kas instrumento a mangpabileg iti pammatik.

I. H., Czech Republic

Agyamanak unay gapu iti daytoy nagsayaat a benneg a mangmangted kadagiti topiko a mausarko iti personal a panagadalko. Nagsayaat ti pannakaisagana ti amin uray dagiti kabassitan a detalye! Dayta ti ad-adda a mangyadani kaniak iti kasisiriban nga Amatayo a ni Jehova!

A. S., Russia

“Jehova, Palubosannak Koma nga Agserbi Kenka” (Hulio 2007) Napabileg ti pammatik ken Jehova idi binasak ti pakasaritaan ti biag ni Danielle Hall. Idi ubing pay, situtured nga impakaammona kadagiti amin a kaeskuelaanna nga isu ket maysa a Saksi ni Jehova. Masiguradok a kastanto met ti aramiden ti adu nga ubbing a Saksi nga ages-eskuela.

A. R., Madagascar

Siam ti tawenko. Kalkalpasmi a binasa ken nanangko ti kapadasan ni Danielle. Gapu iti dayta, napanunotko a rumbeng nga agyamanak iti kasta unay agsipud ta Saksi ni Jehova dagiti nagannakko ken saanak a marigatan nga agserbi ken Jehova. Talaga a nagustuak ti punto a “sadinoman ti pagnanaedantayo, kanayon nga asideg kadatayo ni Jehova.” Apresiarek met a no nakaawiden ni Danielle manipud eskuelaan, agtugaw iti kamana tapno estoriaenna ken Jehova dagiti aktibidadna iti nagmalem, a kas man la ni Jehova ti tatangna. Kayatko met nga aramiden dayta!

A. D., Italia

“Agimtuod Dagiti Agtutubo . . . Apay a Kanayon a Maipupueraak?” (Hulio 2007) Nakasaysayaat daytoy nga artikulo agsipud ta nariknak a kas man la nairanta nga agpaay kaniak. Nagustuak met dagiti inyimtuodna a saludsod ken dagiti espasio a pangisuratan kadagiti sungbat. Pagyamanan. Nagdakkel ti naitulongna kaniak.

C. A., Canada