Ti Panangmatmat ti Biblia
Ania ti Panangmatmat ti Dios Kadagiti Banag a Maus-usar iti Panagdayaw?
Dagiti banag a maus-usar iti panagkararag ket gagangay iti Budismo, Hinduismo, Islam, Judaismo, Romano Katolisismo, ken Eastern Orthodoxy. Gapuna, iti dandani amin a pagilian, minilion a tattao ti mamati a makatulong dagita a banag tapno makaadanida iti Dios ken magun-odda ti anamong wenno bendisionna. Ania ti isursuro ti Biblia?
RINIBUN a tawen a maus-usar dagiti banag a katulongan iti panagkararag. Kas pagarigan, iti ayan ti nagkauna a Nineve, nakabakab dagiti arkeologo ti estatua ti “dua a nagpayak a babbai a sitatakder nga agkarkararag iti sango ti sagrado a puon ti kayo; . . . adda kuentas wenno rosario nga iggem ti kannigid nga imada.”—The Catholic Encyclopedia.
Ania ti pakausaran dagiti rosario? Kinuna dayta met la nga ensiklopedia: “No mamin-adu a maulit ti aniaman a kararag, agannayas ti maysa a tao nga agaramat iti mekanikal nga aparato a nalaklaka a mausar ngem iti panagbilang babaen kadagiti ramay.”
Nalaklaka payen ti agkararag gapu kadagiti ruedo a paglualo (prayer wheel). Kada pusiposenda ti ruedo, babaen man iti ima, angin, danum, wenno koriente, maibilang dayta a katupag ti maysa a kararag. Dagiti maulit-ulit nga orasion wenno lualo, wenno mantra, ket masansan a maikabil kadagiti ruedo a paglualo. Usigentayo no ania ti panangmatmat ti Dios kadagita a banag.
‘Diyo Ulit-uliten a Sawen ti Isu Met Laeng a Bambanag’
Ni Jesu-Kristo, a bigbigen met ti minilion a di-Kristiano kas propeta ti Dios, inlawlawagna ti panangmatmat ti Namarsua maipapan iti maulit-ulit a kararag idi kinunana: ‘No agkarkararagkayo, diyo ulit-uliten a sawen ti isu met laeng a bambanag, a kas iti ar-aramiden dagiti tattao iti nasnasion, ta pagarupenda a maipangagdanto gapu iti panagusarda iti adu a sasao.’a—Mateo 6:7.
Gapuna, no di anamongan ti Dios ti ‘panangulit-ulit kadagiti isu met laeng a bambanag,’ saan kadi a dina met anamongan no agusartayo kadagiti banag a katulongan iti maulit-ulit a panagkararag? Maitunos iti dayta, awan pulos ti dinakamat ti Biblia nga adda matalek nga adipen ti pudno a Dios a nagusar kadagiti rosario, ruedo a paglualo, wenno dadduma pay a banag a maus-usar iti panagdayaw. Anagentayo ti pudno a kaipapanan ken panggep ti kararag tapno ad-adda a maawatantayo no apay a di anamongan ti Dios ti panagusar kadagiti banag a katulongan iti panagdayaw ken no apay a dagiti matalek nga adipen ti Dios ket saan a nagusar kadagita.
Kararag a Makaay-ayo iti Dios
Iti pagtuladan a kararag nga insuro ni Jesus, espesipiko a dinakamatna ti Dios kas “Amami.” Wen, ti Namarsua kadatayo ket saan a maysa a di maseknan a persona wenno maysa a misterioso a puersa a masapul a maay-ayo babaen kadagiti lualo, ritual, wenno mantra. Imbes ketdi, isu ket maysa a naayat nga Ama, ket kayatna nga ibilang ken ayatentayo kas Amatayo. Kinuna ni Jesus: “Ay-ayatek ti Ama.” (Juan 14:31) Kinuna ti maysa a propeta iti nagkauna nga Israel: “O Jehova, sika ti Amami.”—Isaias 64:8.
Kasanotay nga umadani ken Jehova kas nailangitan nga Amatayo? (Santiago 4:8) Kas iti aniaman a relasion, makaadanitayo iti Dios babaen iti pannakisarita ken panagimdengtayo kenkuana. ‘Makisarita’ ti Dios kadatayo babaen kadagiti panid ti Biblia—ti naisurat a Saona—a nangipalgakanna kadagiti aramid ken personalidadna, agraman kadagiti panggepna agpaay kadatayo. (2 Timoteo 3:16) Iti met biangtayo, makisaritatayo iti Dios babaen iti kararag, wenno nadayaw a pannakikomunikar. Ngem siempre, masapul a napasnek ken nasinged ti kasta a kararag, saan ket a pormal ken rutina laeng.
Usigenyo: Iti nasinged ken nadungngo a pamilia, kasano ti pannakisarita dagiti normal ken intelihente nga annak kadagiti nagannakda? Ulit-ulitenda kadi ti isu met la a sasao, a nalabit bilangenda ti kasansan ti panangulitda iti dayta babaen iti tulong ti maysa a banag? Siempre saan! Imbes ketdi, nabagas, managraem, ken naimpusuan ti pannakisaritada.
Umasping unay iti dayta ti panagkararagtayo iti Dios. Kinapudnona, mabalintayo nga iyebkas iti nailangitan nga Amatayo ti dandani amin a pakaseknantayo. Kuna ti Filipos 4:6, 7: “Dikay maringgoran iti aniaman, no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios; ket ti talna ti Dios . . . saluadannanto dagiti pusoyo ken dagiti pannakabalin ti isipyo.” Natural laeng a no adda pakaringgorantayo, mabalin a masansan nga ikararagtayo dayta. Ngem naiduma dayta iti sao por sao a panangulit-ulit.—Mateo 7:7-11.
Naglaon ti Biblia iti adu a pagarigan dagiti kararag a makaay-ayo iti Dios, agraman dagiti salmo, wenno kanta, ken dagiti inkararag a mismo ni Jesus.b (Salmo 17 ken 86, superskripsion; Lucas 10:21, 22; 22:40-44) Ti maysa kadagiti kararag ni Jesus ket mabasa iti Juan kapitulo 17. Iwayaanyo a basaen dayta iti sumagmamano a minuto. Bayat a basbasaenyo, imutektekanyo no kasano nga inyebkasna iti Dios ti linaon ti pusona. Paliiwenyo met ti di agimbubukodan a wagas ti panagkararagna—no kasano a naipasimudaag ti nauneg a panagayatna kadagiti pasurotna. Kinunana: “Nasantuan nga Ama, . . . aywanam ida gapu iti daydiay nadangkes” a ni Satanas.—Juan 17:11, 15.
Adda kadi madlawmo kadagiti sasao ni Jesus a mangipakita a ritual wenno di naimpusuan ti kararagna? Awan a pulos! Anian a nagsayaat ti inyulidanna kadatayo! Wen, dagiti amin a mayat nga umadani iti pudno a Dios ket masapul a siuumiso nga am-ammuenda isuna kas maysa a persona. Kalpasanna, buyogen ti ayat a naibasar iti dayta a pannakaammo, masapul nga idiandan dagiti narelihiosuan a kostumbre ken aramid a karimonna. Kastoy ti kinuna ni Jehova kadagiti mangar-aramid kadagita: “Agbalinakto nga ama kadakayo, ket dakayonto ti annak a lallaki ken babbai kaniak.”—2 Corinto 6:17, 18.
[Footnotes]
a Iti insurona a pagtuladan a kararag, saan a kinuna ni Jesus: “Masapul ngarud nga ikararagyo daytoy a kararag,” a maikontra iti kaibagbagana. Imbes ketdi, kinunana: “Agkararagkayo, ngarud, a kastoy.” (Mateo 6:9-13) Ania ti kayatna a sawen? Kas ipalgak ti pagtuladan a kararag, masapul nga ipangpangrunatayo dagiti bambanag a nainaig iti panagdayawtayo iti Dios imbes a dagiti namaterialan a pagimbagantayo.
b Nupay dagiti salmo ket makankanta idi iti nadumaduma nga okasion, saan a maulit-ulit dagita a kas iti mantra ken saanda a maidayyeng kadagiti ritual a pakausaran dagiti rosario wenno ruedo a paglualo.
NAPANUNOTYO KADIN?
◼ Ti kadi balakad ni Jesus a maikontra kadagiti maulit-ulit a kararag ket saklawenna met ti panagusar kadagiti rosario ken ruedo a paglualo?—Mateo 6:7.
◼ Ania ti rumbeng nga ipalgak dagiti kararagtayo maipapan iti panangmatmattayo iti Dios?—Isaias 64:8.
◼ No laksidentayo dagiti narelihiosuan a kinaulbod, ania ti panangmatmat ti Dios kadatayo?—2 Corinto 6:17, 18.