Manipud Kadagiti Agbasbasa

Saanen nga Adipen ti Arak (Mayo 2007) Sagpaminsan a basaek ti magasinyo no umaydak ikkan dagiti karelihionanyo. Makapabang-ar dagiti linaonna nga artikulo no idilig kadagiti makapaleddaang a damdamag iti telebision ken periodiko. Pulos a diak napadasan ti nagbalin nga alkoholiko ngem adu a kapamiliak ken gagayyemko ti kasta. Kinuna ti lalaki iti artikulo a naisardengna ti panaginumna kalpasan ti tallo a bulan. Dayta ket kalpasan ti adu a tawen a panagsagabana maigapu iti panagin-inumna. Komendarak dayta a lalaki, ngem makunak nga isu ket saan a realistiko a pagarigan ken ibilangko pay ketdi a makapaupay kadagiti mangikagkagumaan a mangisardeng iti dayta a bisio. Nupay agregget ti kadawyan nga alkoholiko a mangisardeng iti pannakaadiktona, mamin-adunto pay laeng a mailaw-an nga aginum sakbay a naan-anay a maisardengna dayta a bisio.

G. A., Estados Unidos

Sungbat ti “Agriingkayo!”: Saanmi nga imparipirip a nalaka nga isardeng ti alkoholismo. Umanamongkami nga adu kadagiti mangikagkagumaan a mangisardeng iti dayta a bisio ti mailaw-an nga aginum ken maupayda sakbay a naan-anay a maisardengda dayta. Uray pay dagidiay dagus a nangisardeng iti panaginumda ken saanen nga adikto iti arak ket masapul latta nga agannadda tapno dida masublian ti bisioda. Isu a kas dinakamat ti artikulo, uray kalpasan ti 10 a tawen a saan nga imminum iti arak ti dati nga “adipen ti arak,” inaminna: “Adu ti di makaammo iti nakaro a pannakidangadangko ket uray maminsan laeng a panaginum, mabalin nga agsubliak manen iti sigud a kabibiagko. Adda pay laeng panagtarigagayko nga uminum. Masapul ti napasnek a kararag ken determinasion nga agkedked.” Babaen ti panagkararag ken panagtalek iti Dios, nabaelan ti adu nga isardeng ti pannakaadipenda iti arak.​—Salmo 55:22.

Mapagtalkanyo Kadi ti Biblia? (Nobiembre 2007) Agtawenak iti 12 ken kayatko ti agyaman kadakayo gapu iti daytoy makapainteres unay ken makaisuro nga espesial a ruar ti Agriingkayo! Nangnangruna a nagustuak ti benneg iti panid 7 maipapan iti panagtutunos ti linaon ti Biblia. Inlawlawagna ti bambanag a diak pay napampanunot. Padpadaanakon ti sumaruno nga espesial a ruar!

D. F., Estados Unidos

Utobem Dagitoy Kayatko ti agyaman kadakayo gapu iti baro a format ti Agriingkayo! Nagunggonaanak unay kadagiti saludsod iti ngudo ti dadduma nga artikulo. Natulongandak a mangtandaan kadagiti impormasion ken mangutob iti suheto. Gapu iti kinaokupado ti biag itan, ti dadduma a napateg ken makapabileg a punto ket ditay madlaw kabayatan ti panagbasatayo.

M.A.S., Brazil

Ti Kadi Ipapatay ti Talaga a Pagpatinggaan ti Amin? (Disiembre 2007) Innem a bulanen ti napalabas sipud idi naulilaak iti ina gapu iti nakalkaldaang nga aksidente. Anian a pannakaliwliwak idi nabasak daytoy nga artikulo a nangpabileg iti namnamak a makitakto manen ni nanangko inton mapagungar. Pagyamanan unay.

L.L.R., Brazil

Agimtuod Dagiti Agtutubo . . . Apay Koma nga Annurotek Dagiti Pagalagadan ti Biblia? (Nobiembre 2007) Impagarupko no awan pagdaksan ti makideyt basta la ketdi diak agar-aramid iti imoralidad. Ngem diak napnek iti basta pannakideytko iti nobiok. Timmanor ti di umiso a nainlasagan a tarigagayko. Pagyamanan unay iti panangilawlawagyo kadagitoy a pannursuro ti Biblia iti wagas a nalaka a maawatan dagiti agtutubo nga agkurang pay laeng iti kapadasan.

E. F., Japan