Ti Pakasalakniban Dagiti Agpegpeggad a Mula ken Animal
BABAEN ITI MANNURAT TI AGRIINGKAYO! IDIAY ESPANIA
AGPEGPEGGAD dagiti mula ken animal iti intero a lubong. Pattapattaen ti dadduma a sientista a rinibu a kita ti maung-ungaw iti kada tawen. Naimbag laengen ta adda kabambantayan a natalged a pagbiagan dagiti mula ken animal a dati a naruay iti adu a lugar. Ngem uray kadagitoy a disso, agpegpeggadda latta gapu iti polusion ken panangdadael ti tattao. Nalabit awanen ti napegpeggad pay ngem iti Europa a maysa kadagiti kaaduan ti taona a paset ti daga.
Iti kabambantayan ti Pyrenees iti beddeng ti Francia ken Espania, adda nadumaduma a parke a kukua ti gobierno a pakasalsalakniban dagiti animal ken mula kadagita a lugar. Kadagitoy nga adda gundaway dagiti bisita a makakita iti napagbalinen a pakasalakniban ti adu nga agpegpeggad a kita ti mula ken animal. Kitaentay biit no ania ti adda kadagitoy a parke.
Dagiti Mula ken Animal nga Agpegpeggad a Maungaw
Sabsabong. Dadduma kadagiti kapipintasan nga atap a sabong ket agbiag kadagiti lugar a nasurok a 1,500 a metro ti kangatoda. Dagiti nakaas-asul nga snow gentian ken trumpet gentian (1), ket kasla alpombra a nayaplag kadagiti nakangatngato a bakras a din pagtubuan ti kaykayo. Iti arisadsad dagiti bakras, nagadu ken nakalanglangto dagiti agpegpeggad a lady’s-slipper orchid (2) iti nagbabaetan dagiti kayo a beech. Kada tawen, ginasut a mangipatpateg iti nakaparsuaan ti agpasiar kadagitoy a lugar isu a 14 nga oras kada aldaw a mabambantayan dagitoy tapno masierto a di madadael wenno di maparut dagitoy nga agkakapateg a sabong.
Dagiti Kulibangbang. Dagiti tay-ak nga aduan iti atap a sabong ket natalged a lugar kadagiti namaris a kulibangbang a kas iti dakkel nga Apollo (3) a nakalablabbaga dagiti turik iti payakna. Agtayabtayab dayta iti nagbabaetan dagiti kalunay. Dagiti babbabassit a sabong ti kanayon a pagdissuan dagiti kulibangbang nga asul ken maris gambang (4) a paset ti pamilia Lycaenidae. Tumanayab met dagiti kulibangbang a painted-lady ken tortoiseshell kadagiti nangatngato a rangkis.
Dagiti Animal. Adu kadagiti daddadakkel a mamalia iti Europa ti agdakdakiwas idi kadagiti nawayang a lugar iti kontinente. Ngem dandanin maungaw ti dadduma kadakuada gapu iti panaganup. Iti kabambantayan wenno iti kaamiananan a disso, manmanon dagiti oso, atap nga aso ken atap a pusa (5), bison, gamusa, ken kalding iti bantay (6). Dagiti makaay-ayo nga animal kadagiti parke iti Pyrenees ti nalawag a palagip a naruay idi dagiti atap a parsua kadagitoy a kabambantayan. Ut-utoben ti dadduma a managpanunot nga agpaspasiar no addanto pay ngata mabati kadagiti sumagmamano laengen a natda.
Adda panggapuantayo nga agtalek a ti Namarsua a ni Jehova, Daydiay “makinkukua kadagiti alimpatok ti bambantay,” ket maseknan kadagiti atap a parsuana iti kabambantayan. (Salmo 95:4) Iti maysa kadagiti Salmo, kinuna ti Dios: “Kukuak ti tunggal atap nga animal ti bakir, dagiti animal iti rabaw ti sangaribu a bantay. Pagaammok unay ti tunggal nagpayak a parsua iti bambantay.” (Salmo 50:10, 11) Ti pannakaseknan ni Jehova iti daga ken kadagiti parsuana iti dayta ti pamatiantayo a dinanto pulos ipalubos a maungaw dagiti atap nga animal iti kabambantayan.
[Dagiti Ladawan iti panid 16, 17]
1 Trumpet gentian
2 Lady’s-slipper orchid
3 Apollo
4 Maris gambang
5 Atap a Pusa
6 Kalding iti Bantay
[Credit Line]
La Cuniacha