Ipaayanyo Dagiti Annakyo iti Nasayaat a Pangrugian iti Biag
BABAEN ITI MANNURAT TI AGRIINGKAYO! IDIAY CANADA
◼ “Ti telebision ket nagsayaat nga instrumento iti panagsursuro,” kuna ti maysa a report a naipablaak iti The New York Times. Nupay kasta, “ti napaut a panagbuya iti dayta ket makadangran iti bagi ken isip dagiti ubbing” ta maikapisda kadagiti gundaway a mangpatanor iti abilidadda nga agpartuat, agsursuro, ken makilangen.
Kalpasan ti panangadalda iti kababalin ti 2,500 nga ubbing no maipapan iti panagbuya iti TV, dagiti managsirarak iti Children’s Hospital idiay Seattle, Washington, E.U.A., “natakuatanda a no masansan nga agbuya dagiti agtawen iti maysa agingga iti tallo, dakdakkel ti risgo a maaddaanda kadagiti problema a nainaig iti panagatension inton agtawenda iti pito,” kuna ti periodiko. Kumarkaro ti kinaagresibo dagita nga ubbing, dida makatuttutor, ken dida unay mangikaskaso. Sigun iti educational psychologist a ni Dr. Jane M. Healy, “ti adu a nagannak dagiti ubbing a nadayagnos nga addaan iti attention-deficit disorder (marigatan a makapagatension), nadlawda nga ad-adda a makapagatension dagiti annakda idi saanda idan a pagbuybuyaen iti TV.”
Ania ti maaramidan dagiti nagannak tapno malimitaranda ti panagbuybuya dagiti annakda iti TV? Dagitoy ti insingasing ti report: Ikeddengyo no kaano ken limitaranyo ti kapaut ti inaldaw a panagbuya ti anakyo iti telebision. Diyo pagbalinen ti TV a para-awir iti anakyo. Imbes ketdi, masansan nga awisenyo a tulongannakayo kadagiti trabaho iti balay. Pilienyo dagiti buyaen ti anakyo ken iddepenyo ti TV no nalpasen ti impalubosyo a buyaenna. No mabalin, kaduaenyo ti anakyo a mangbuya iti piniliyo a programa ken pagsaritaanyo ti buybuyaenyo. Kamaudiananna, limitaranyo met ti mismo a panagbuyayo iti TV.
Kasapulan ti tiempo, panagregget, ken disiplina iti bagi tapno mapatanor ti abilidad nga agpartuat ken makilangen. Makagunggona dagiti resulta dayta kas paneknekan daytoy a nabayagen a proverbio: “Sanayem ti ubing sigun iti dalan nga agpaay kenkuana; uray no lumakay saanto a sumiasi iti dayta.” (Proverbio 22:6) Ti napateg a paset ti kasta a panangsanay ramanenna ti panangisuro iti annak kadagiti nasayaat a prinsipio.
Sieepektibo nga us-usaren dagiti Saksi ni Jehova ti libroda nga Agsursuroka iti Naindaklan a Mannursuro tapno maisuroda ti nasayaat a kababalin kadagiti annakda. Wen, ti nasayaat a komunikasion ken nadungngo a panagasikaso dagiti nagannak bayat nga ubing pay ti anakda ket talaga a mangyeg kadagiti manayon a pagimbagan. Adda kadi pay banag nga ad-adda a makapnek ngem iti pannakakitayo a dumakkel ti annakyo kas mararaem ken manakem a tattao?