Ti Panangmatmat ti Biblia

Rumbeng Kadi nga Adda Klase Klero ken Klase Pasurot?

Madaydayaw Unay a Reberendo, Kasasantuan nga Ama, Santo Papa, Apo Padi, Rabbi, Pastor—sumagmamano laeng dagitoy kadagiti titulo a mangiduma kadagiti klero ti nadumaduma a relihion manipud kadagiti pasurot. Iti adu a relihion, gagangay a naiduma dagiti klero manipud kadagiti pasurot, ngem maitunos kadi dayta iti urnos ti Dios, wenno tradision dayta ti tao? Napatpateg pay, anamongan kadi dayta ti Dios?

SIGUN ken Cletus Wessels a propesor iti teolohia, “awan ti klero wenno ordinario a pasurot idi sibibiag pay dagiti apostol ken awan ti kasta a nadakamat iti Baro a Tulag.” Kuna ti Encyclopedia of Christianity: “In-inut a rimsua ti pannakaiduma dagiti klero kas addaan napateg a posision idinto ta ti dadduma ket pasurot . . . Dagiti ‘ordinario’ a miembro ti simbaan ket naibilangen nga awanan iti pannakaammo maipapan iti Dios wenno iti Biblia.” Ad-adda a nagminar ti nagdumaan ti klase klero ken klase pasurot kabayatan ti maikatlo a siglo K.P., nasurok a dua gasut a tawen kalpasan ti ipapatay ni Jesu-Kristo!

No kasta, saan kadi nga umiso ti kaadda ti klase klero ken klase pasurot gapu ta saan a naibasar dayta iti inyulidan dagiti apostol ni Jesus ken ti dadduma a nagkauna a Kristiano? Wen, sigun iti Biblia. Usigem no apay.

“Agkakabsatkayo Amin”

Ibaga kadatayo ti Sao ti Dios nga amin a Kristiano ket agserbi kas ministro ti Dios nga awan ti nangatngato wenno nababbaba ti saadna ngem iti sabsabali. (2 Corinto 3:5, 6) Kadagiti nagkauna a Kristiano, “determinadoda nga awan ti aniaman a mamaglalasin kadakuada iti agduma a klase,” kuna ti mannurat iti relihion a ni Alexandre Faivre. Dayta a ‘kinaawan ti agduma a klase’ ket maitunos iti kinuna ni Jesus kadagiti pasurotna: “Agkakabsatkayo amin.”—Mateo 23:8.

Dagiti lallaki a nataengan iti naespirituan ket nagserbi kas manangaywan. Ramanen dayta nga annongen ti panagbalinda a pastor ken mannursuro. (Aramid 20:28) Ngem saan a masuselduan dagitoy a manangaywan. Kaaduan kadakuada ket ordinario a mangmangged—assawa a lallaki ken amma. Kasta met a kualipikadoda nga agserbi kas manangaywan, saan a gapu ta nagadalda kadagiti narelihiosuan a seminario no di ket gapu ta siaanep nga ad-adalenda ti Sao ti Dios ken iparparangarangda dagiti naespirituan a galad nga ipapaannurot ti Dios. Karaman kadagita a galad ti panagbalin a “natimbeng iti panagug-ugali, nasimbeng iti panunot, naurnos, managpadagus, kualipikado a mangisuro, . . . nainkalintegan, saan a mannakiringgor, saan a managayat iti kuarta, maysa a lalaki a mangidadaulo iti bukodna a sangakabbalayan iti nasayaat a pamay-an.”—1 Timoteo 3:1-7.

No Apay a Nainsiriban ti Panangsurot iti Biblia

“Dikay lumbes iti bambanag a naisurat,” kuna ti Biblia. (1 Corinto 4:6) Nakalkaldaang ta masansan a madangran ti espiritualidad ti maysa a tao no dina suroten dayta a bilin nga impaltiing ti Dios, kas ibatad ti kaadda itan ti urnos a klase klero ken klase pasurot. Kasano? Pangngaasim ta usigem ti sumaganad nga innem a punto.

1. Ti kaadda ti klase klero ipasimudaagna a masapul a naisangsangayan ti pannakapili ti maysa nga agbalin a ministro ti Dios. Ngem kuna ti Biblia nga amin a pudno a Kristiano rumbeng nga agserbida iti Dios ken idaydayawda ti naganna. (Roma 10:9, 10) No maipapan iti panangaywan iti kongregasion, maiparparegta kadagiti amin a Kristiano a lallaki a ragpatenda dayta a pribilehio, kas iti ar-aramiden dagiti Saksi ni Jehova.—1 Timoteo 3:1.

2. Ti kaadda ti klase klero ken klase pasurot pagbalinenna a natantan-ok dagiti klase klero, kas ipakita dagiti narelihiosuan a titulo a pammadayaw kadakuada. Ngem kinuna ni Jesus: “Ti agtigtignay a kas maysa a nanumnumo kadakayo amin isu dayta ti naindaklan.” (Lucas 9:48) Maitunos iti dayta a kinapakumbaba, imbagana kadagiti pasurotna a dida agusar ken paawagan kadagiti kasta a narelihiosuan a titulo.—Mateo 23:8-12.

3. Ti kaadda ti masusuelduan a klase klero ket mangpadagsen unay iti pinansial para iti klase pasurot, nangruna no naluho ti panagbiag dagiti klero. Maisupadi iti dayta, mangged dagiti Kristiano a manangaywan tapno mapataudda dagiti pinansial a kasapulanda isu a mangipapaayda iti nasayaat nga ulidan para iti dadduma.a—Aramid 18:1-3; 20:33, 34; 2 Tesalonica 3:7-10.

4. Gapu ta sabsabali ti mangipapaay iti pinansial a suporta iti maysa a klero, mabalin a magargari a mangbalbaliw iti mensahe ti Biblia tapno maay-ayona dagiti pasurotna. Kinapudnona, impakpakauna ti Biblia a mapasamak a mismo dayta. “Addanto las-ud ti tiempo a saandanto nga anusan ti makapasalun-at a sursuro, no di ket, maitunos kadagiti bukodda a tarigagay, mangurnongdanto kadagiti mannursuro a maipaay iti bagbagida tapno gagatelenda dagiti lapayagda.”—2 Timoteo 4:3.

5. Ti kaadda ti klase klero ken klase pasurot ti mabalin a makagapu a panunoten dagiti pasurot a dagiti laeng klero ti rumbeng a mangasikaso kadagiti bambanag a nainaig iti panagdayaw, bayat a dagiti pasurot ket kontenton a makimisa iti kada lawas. Ngem amin a Kristiano ket rumbeng a sipapanunot kadagiti naespirituan a kasapulanda ken sipipinget nga adalenda ti Biblia.—Mateo 4:4; 5:3.

6. No saan nga ammo dagiti pasurot no ania ti isursuro ti Biblia, nalaka laeng nga allilawen ken gundawayan ida dagiti klero. Kinaagpaysuanna, sigun iti historia, adun a klero ti nangaramid iti kasta.b—Aramid 20:29, 30.

Tapno naan-anay a maannurot dagiti Saksi ni Jehova ti pagtuladan a nailanad iti Biblia, awananda iti klase klero ngem addaanda kadagiti di masusuelduan a naespirituan a papastor ken mannursuro a situtulok nga agserbi iti arban ti Dios. Apay a dimo padasen ti makigimong iti Kingdom Hall iti lugaryo tapno makitam a mismo dayta?

[Footnotes]

NAPANUNOTMO KADIN?

◼ Kasano ti rumbeng a panangmatmat ti amin nga agserserbi iti Dios iti maysa ken maysa?—Mateo 23:8.

◼ Ania dagiti nasken nga annuroten dagiti Kristiano a lallaki tapno kualipikadoda nga agserbi kas manangaywan iti kongregasion?—1 Timoteo 3:1-7.

◼ Apay a saan nga an-anamongan ti Dios ti kaadda ti urnos a klase klero ken klase pasurot?—1 Corinto 4:6.

[Blurb iti panid 23]

Saan a kas kadagiti klero, ni Jesus imbilangna ti bagina kas “nanumnumo”