Umuna a Sekreto: Dagiti Umiso a Prioridad

‘Siguraduenyo ti napatpateg a bambanag.’—Filipos 1:10.

No ania ti kaipapananna. Kadagiti naballigi a panagasawa, tunggal maysa kadagiti agassawa iyun-unana dagiti kasapulan ti asawana sakbay ti mismo a bagina, sanikua, trabaho, gagayyem, ken uray ti dadduma pay a kabagianna. Ti agassawa mangbusbosda iti adu a tiempo para iti maysa ken maysa ken kadagiti annakda. Agpadada a sidadaan nga agsakripisio agpaay iti pagimbagan ti pamilia.—Filipos 2:4.

No apay a napateg. Isursuro ti Biblia a nakapatpateg ti pamilia. Kinapudnona, insurat ni apostol Pablo a ti tao a di mangipaay kadagiti kasapulan ti pamiliana ket “dakdakes ngem ti tao nga awanan pammati.” (1 Timoteo 5:8) Ngem iti panaglabas ti panawen, mabalin nga agbaliw dagiti prioridad ti maysa a tao. Kas pagarigan, nadlaw ti maysa a mamalbalakad iti pamilia nga adu kadagiti immatendar iti inangayna a komperensia ti kasla ad-adda a naipamaysa iti propesionda ngem iti pamiliada. Kinunana a kas man la mangnamnamada a makasursuro kadagiti pangbiitan a solusion ti aniaman a parikut ti pamiliada tapno maiwaksidan iti panunotda ti maipapan iti pamilia, ket maipamaysadan ti panunotda iti propesionda.” Ania ti maadaltayo? Nalaklaka ti mangibaga nga ipangpangrunatayo ti pamiliatayo ngem ti mangipakita iti dayta.

Padasem daytoy. Usigem no kasano ti kapateg kenka ti pamiliam babaen iti panangsungbatmo kadagiti sumaganad a saludsod.

◼ No kayat ti asawak wenno ti anakko ti makisarita kaniak, dagus kadi a makisaritaak?

◼ No makisarsaritaak kadagiti sabsabali maipapan iti ar-aramidek, masansan kadi a ti ar-aramidenmi a sangapamiliaan ti sarsaritaek?

◼ Pagkedkedak kadi ti kanayonan a responsabilidad (idiay pagtrabahuan wenno iti sadinoman) no kasapulan ti pamiliak ti panawenko?

No wen ti insungbatmo kadagita a saludsod, mabalin nga ipapanmon nga umiso dagiti prioridadmo. Ngem ania ngata ti makuna ti asawam ken dagiti annakmo maipapan kenka? Saan la a ti mismo a panangmatmattayo iti bagitayo ti pagrukodan no umiso dagiti prioridadtayo. Dayta a prinsipio ket agaplikar met iti dadduma pay a sekreto ti panagballigi a mailawlawag kadagiti sumaruno a panid.

Mangngeddengka. Mangpanunotka iti maysa wenno dua a pamay-an a maipakitam nga iyun-unam ti pamiliam. (Kas pagarigan: Ikeddengmo a kissayan ti panawen nga us-usarem kadagiti banag a mabalin a mangag-agaw iti tiempo a para koma iti asawam ken annakmo.)

Apay a diyo pagsasaritaan a sangapamiliaan dagiti pangngeddengmo? No adda miembro ti pamilia a sidadaan nga agbalbaliw, dakdakkel ti posibilidadna a kasta met ti aramiden ti dadduma.

[Ladawan iti panid 3]

Ti naballigi a nagannak ipangpangrunana ti asawa ken annakna