Agimtuod Dagiti Agtutubo

Apay a Didak Kayat Dagiti Babbaro?

Ammona nga adu ti mayat kaniak ta imbagak nga adda pay dadduma a lallaki nga agkursonada kaniak. Nagkatawa idi inyestoriak ti kalokuan ti dadduma a gagayyemko. Ken ammona a nalaingak ta kinorehirko ti sumagmamano kadagiti imbagana. Kaanonto ngata nga armennak?

Napintas met ngem kasla nakarabrabaw ti panagpampanunotna. Dandani dinak pulos pagsaoen. Ken no agsaoak, korehirennak! Kasano ngata a mapanawak?

MABURBURIBORANKA kadi ta didaka kursonada dagiti lallaki? Adu a babbai ti kasta, uray dagidiay dimo pagarupen nga agproblema iti dayta! Alaentay a pagarigan ni Joanne. Isu ket napintas, nalaing, ken mayat ti panagsasaona. Ngem kunana: “Masansan a mariknak a didak kayat dagiti lallaki. Adda met dagiti kursonadak a naginteres kaniak, ngem idi kuan, didak met pulos kasarsaritan!”

Ania dagiti magustuan ken di magustuan dagiti lallaki kadagiti babbai? Ania ti mabalinmo nga aramiden a saanmo met a pakaibabainan tapno agkursonada kenka ti disente a lalaki?

Ti Aramidem

● Am-ammuem ti mismo a pusom ken isipmo. Sipud idi bimmalasangka, nalabit ad-addan nga agkursonadaka kadagiti lallaki. Mabalin a saan la a maymaysa ti magustuam. Gagangay dayta. Ngem no nakinobiokan iti damo a namagpitik ita pusom, mabalin nga insebbam ti emosional ken naespirituan nga irarang-aymo. Kasapulan ti panawen tapno mapatanormo ti nasayaat a personalidad, ‘mapabarom ti panunotmo’ iti napapateg a bambanag, ken maragpatmo ti dadduma kadagiti bukodmo a kalat.—Roma 12:2; 1 Corinto 7:36; Colosas 3:9, 10.

Pudno, adu a lallaki ti agkursonada kadagiti babbai nga inosente wenno saan pay a natibker ti panagdesdesisionda. Ngem dagiti kasta a lallaki ket interesado laeng iti pammagi ti babai, saan nga iti kinataona. Kinapudnona, ti nasimbeng a baro ket agsapul iti balasang nga addaan kadagiti nasayaat a galad a makatulong iti panagbalin a natibker ti relasionda.—Mateo 19:6.

Ti kuna dagiti lallaki: “Magustuak ti babai a makabukel iti bukodna a kapanunotan ken madlaw a natibker ti panagtalekna iti bagina.”—James.

“Kursonadak ti prangka ngem nadayaw ken saan a basta kanayon nga umanamong iti amin nga ibagak. Uray no napintas, saanak a komportable iti balasang a ti laeng ibagbagana ket dagidiay kayatko a mangngeg. Diak kayat ti kasta!”—Darren.

“Aminek a masansan a ti kinapintas ti babbalasang ti umuna a pakaatrakarak. Ngem nagbiit a mapukaw dayta no ti balasang ket awanan kadagiti masnup ken makagunggona a kalat. Nupay kasta, ad-adda nga agrayoak kenkuana no adda direksion ti biagna—nangruna no naragpatnan ti dadduma kadagiti kalatna.”—Damien.

● Patanorem ti panagraemmo iti sabsabali. No kasano a tarigagayam ti maayat, tarigagayan met unay dagiti lallaki ti maraem. Saan a naiparna a kuna ti Biblia iti asawa a lalaki a rumbeng nga ayatenna ni baketna ken rumbeng a maaddaan ti asawa a babai iti “nauneg a panagraem” ken lakayna. (Efeso 5:33) Maitunos iti dayta, idi napagsaludsodan ti ginasut nga agtutubo a lallaki, naammuan a nasurok nga 60% ti nagkuna a napatpateg kadakuada ti panagraem ngem ti ayat. Kasta met laeng ti kinuna ti nasurok a 70% kadagiti natataengan a lallaki.

Ti panagraem dina kaipapanan ti isusuko—wenno pannakapukaw ti kalintegam a maaddaan iti naiduma a kapanunotan ken mangyebkas iti dayta. (Genesis 21:10-12) Ngem agpannuray iti wagas ti panangyebkasmo iti opinionmo no magustuannaka wenno saan ti maysa a baro. No kanayon a kontraem wenno korehirem ti ibagbagana, mabalin a mariknana a bassit ti panagraemmo kenkuana. Ngem no ikabilangam ti kapanunotanna ken apresiarem dagiti nagsayaat nga imbagana, nalabit ad-adda nga anamongan ken tagipatgenna ti kapanunotam. Siempre, madlaw met ti masirib a baro no raraemem dagiti kapamiliam ken ti sabsabali.a

Ti kuna dagiti lallaki: “Kayat dagiti babbaro a ti opinionda ket tagipatgen ti sabsabali, nangruna ti balasang a kursonadada.”—Anthony.

“Para kaniak, ti panagraem ti kapatgan iti panangrugi ti maysa a relasion. Mabalin a sumarunonto laengen nga agrusing ni ayat.”—Adrian.

“No ipakpakita ti balasang a raraemennak, mariknak a sigurado a kabaelannak met nga ayaten.”—Mark.

● Agkaweska a sieemma, ken taginayonem a nadalus ti bagim. Ti panagkawkawes ken panaglanglangam ti mangipanayag kadagiti kapanunotam ken kababalinmo. Sakbay pay a makisaritaka iti maysa a lalaki, adun ti ipasimudaag ti panagkawkawesmo maipapan iti kinasiasinom. No naurnos ken naemma ti panagkawkawesmo, nagsayaat ti iparangarang dayta. (1 Timoteo 2:9) Ngem no makagargari ken saan a naurnos, saan a nasayaat ti ipanayag dagita maipapan kenka!

Ti kuna dagiti lallaki: “Nagadu ti ipasimudaag ti panagkawkawes ti maysa a babai maipapan iti panangmatmatna iti biag. No makagargari ken saan a naurnos ti panagkawkawesna, panagkunak ket kas man la agpakpakaasi a tumaliaw koma kenkuana dagiti lallaki.”—Adrian.

“Kursonadak ti nasayaat ti panangestimarna iti buokna, nabanglo, ken makaay-ayo ti tono ti bosesna. Adda idi nagustuak a napintas a balasang, ngem naupayak gapu iti kinadugyotna.”—Ryan.

“Talaga a magustuak ti balasang a dina kayat ti agmeyk-ap iti napuskol ken dina kayat ti agkawes iti nakipet wenno makagargari tapno laeng tumaliaw kenkuana ti sabsabali.”—Ethan.

“No makagargari ti panagkawkawes ti maysa a babai, sigurado a mapataliawka no damdamo. Ngem diak kayat a manobia ti kasta a babai.”—Nicholas.

Ti Dimo Aramiden

● Dika agalembong. Napigsa unay ti impluensia dagiti babbai kadagiti lallaki. Mabalin a naimbag wenno dakes ti panangusarda iti dayta. (Genesis 29:17, 18; Proverbio 7:6-23) No usarem dayta iti tunggal lalaki a maam-ammom, sigurado nga agdinamagto nga alembongka.

Ti kuna dagiti lallaki: “Ti pannakikatugaw iti napintas a babai ken panagdekket dagiti abaga ken takiag ket makaparagsak ken makaabbukayen iti rikna ti maysa a lalaki. Isu a para kaniak, ti babai a masansan a sumagid no makisarsarita kenka ket agal-alembong.”—Nicholas.

“Para kaniak, alembong ti babai a masansan a sumagid iti takiag ti tunggal lalaki a maam-ammona wenno manangiparipirip ti panangtaldiapna iti tunggal lumabas a lalaki. Awan man la ti sumgar a dutdotko iti kasta a babai.”—José.

“Makunak nga alembong ti maysa a babai no sagidenna ti tunggal lalaki a maam-ammona sa dagus nga ipamaysana ti atensionna iti asinoman a lalaki nga ad-adda a mangipakpakita iti atension kenkuana.”—Ethan.

● Dimo unay isingsinged ti riknam. No agkallaysa ti agnobio, agbalindan a “maymaysa a lasag,” kuna ti Biblia. (Genesis 2:24) Kas agassawa, tinallikudanen nga agpadpada ti lalaki ken babai ti adu kadagiti wayawayada idi baro ken balasangda pay; talaga a naikumitdan iti maysa ken maysa. (1 Corinto 7:32-34) Ngem no agnobiokayo pay laeng, awan kalintegam a mangnamnama iti kasta a kita ti pannakaikumit. No kalikagumam a dagus ti naipamaysa nga atensionna, mabalin a madadaelmo ti relasionyo.b

Ti kuna dagiti lallaki: “Panagkunak ket sobra ti kinasinged ti maysa a balasang no nasken nga ammuenna ti amin nga aramidek ken kasla dina kabaelan ti makilangen iti sabsabali ken awanen maaramidanna no saannak a kadua.”—Darren.

“No agkara-text kaniak ti balasang a nabiit pay a naam-ammok ken kayatna nga ammuen no siasino ti kakaduak, nangruna dagiti babbai a kakuyogko, pagilasinan daytan a nasken nga agannadak kenkuana.”—Ryan.

“Makaparurod ti babai a mangiparit kenka a makikadua kadagiti lallaki a gagayyemmo ken masuron no dimo kanayon nga ikuyog.”—Adrian.

Apresiarem ti Mismo a Pategmo

Mabalin nga adda babbai nga am-ammom a mangaramid iti aniaman tapno laeng madlaw ken magustuan ida ti maysa a lalaki. Dadduma ti mabalin a mangipababa iti pagalagadanda tapno laeng maaddaanda iti nobio—wenno asawa pay ketdi. Nupay kasta, agaplikar iti daytoy a banag ti prinsipio nga ‘apitem ti immulam.’ (Galacia 6:7-9) No dimo tagipatgen ti bagim ken dagiti pagalagadan nga ikagkagumaam nga annuroten, mabalin a makasarakka iti lalaki a saan a mangipateg kenka ken kadagiti pagalagadam.

Kinaagpaysuanna, saanto nga amin a lallaki ket agrayo kenka—ken nasayaat dayta! Ngem no sipapanunotka a mangparang-ay iti makinruar ken makin-uneg a kinapintasmo, maaddaankanto iti “dakkel a pateg iti imatang ti Dios”—ken agrayonto kenka ti klase ti lalaki a maikari kenka.—1 Pedro 3:4.

Ad-adu pay nga artikulo ti masarakan iti serye nga “Agimtuod Dagiti Agtutubo” iti Web site a www.watchtower.org/ype

[Footnotes]

UTOBEM DAGITOY

● Kasano a maipakitam a raraemem dagiti kapanunotan ken rikrikna ti maysa a baro?

● Kasano a maiparangarangmo a tagtagipatgem ti bagim?

[Ladawan iti panid 27]

Ti ayat ken panagraem ket kas iti dua a ligay ti bisikleta—agpadada a napateg