Kartibem sa Idulinmo

20 a Pamay-an Tapno Ad-adu ti Tiempom

“Itultuloyyo ti magna a sisisirib . . . , a gatangenyo ti nainggundawayan a tiempo maipaay iti bagbagiyo.”—Colosas 4:5.

ITA ta naikeddengmon dagiti kayatmo nga aramiden iti tunggal aldaw ken oras, ti karit ket no kasanom nga itungpal dagita. Mabalin a makatulong kenka dagiti sumaganad a singasing.

1 ILISTAM TI INALDAW NGA AKTIBIDADMO. Ilistam ti agsasaruno nga aramidem. Markaam dagiti pangbusbosam iti ad-adu a tiempo. Tsekam ti tunggal nalpasmon. Aniaman a dimo nairingpas ket iramanmo iti listaan dagiti aramidem kabigatanna.

2 PAGPADAEM TI LINAON DAGITI LISTAAM. Posible nga adda malibtawam nga aramiden no saan nga agpada ti insuratmo kadagiti listaam. No adda listaam iti kompiuter ken iti selponmo, siguraduem nga agpada dagita.

3 ISURATMO AMIN NGA ADDANG ti panangitungpalmo iti proyektom sa urnosem dagita sigun iti panagsasarunoda.

4 IYUN-UNAM DAGITI KAPATGAN NGA AKTIBIDAD. Nalaklakamton a maiwayaan dagiti saan unay a napateg.

5 MANGARAMIDKA KADAGITI KALAT A KABAELAM A RAGPATEN. Dakdakkel ti maaramidam a pangpasayaat iti paglaingam iti maysa a trabaho ngem iti panagtarigagaymo nga agbalin a presidente ti kompaniayo.

6 BIGBIGEM A SAAN NGA AMIN A BANAG KET MAIWAYAAM. Ipangpangrunam dagiti aktibidad a mangyeg iti kapatgan a resulta. Dagiti ngay naganat nga aktibidad wenno nasken unayen a mairingpas? No dimo maliklikan wenno dimo maipaaramid iti sabali, kitaem no maasikasom dagita iti bassit a tiempo. Mabalin nga itantan iti adu a bulan ti dadduma a di napateg, sigun iti kasasaad, wenno di pay ketdin nasken a maaramid dagita. Mangilatangka iti adu a tiempo kadagiti talaga a napateg kenka ken maitunos kadagiti kalatmo.

7 ILISTAM DAGITI PANGUS-USARAM ITI TIEMPOM. Tapno maammuam no pakaus-usaran ti tiempom, ilistam dagiti ar-aramidem iti maysa wenno dua a lawas. Adu kadi a tiempo ti nasayang kadagiti saan a napateg nga aktibidad? Kaaduan kadi kadagiti nakasingaam ket maigapu iti isu met la a maysa wenno dua nga indibidual? Iti maysa nga aldaw wenno lawas, kaano ti masansan a pannakasingam? Liklikam dagiti dimo idi nadlaw a nangsayang iti panawenmo.

8 LIMITARAM DAGITI ARAMIDEM. No planom ti makitienda, agtarimaan iti lugan, mangsangaili iti gagayyem, agbuya iti sine, ken agbasa—iti laeng agmalem— agap-apurakanto ken nalabit awanto ti aniaman a matagiragsakmo kadagita.

9 KISSAYAM DAGITI PAKASINGAAM. Mangyeskediulka iti tiempo kada aldaw a dika pasinga malaksid no talaga a nesesita. No mabalin, iddepem ti teleponom wenno selponmo iti dayta a tiempo. Iddepem met dagiti electronic pop-up alert no makasingada iti trabahom.

10 IYESKEDIULMO TI KARIRIGATAN A TRABAHO ITI ORAS A NAKAGANGGANAYGAY KEN ALERTOKA.

11 ARAMIDEM A DAGUS TI KASURSURONMO UNAY. Apaman a nairingpasmon dayta, nagangganaygaykanton a mangaramid kadagiti nalaklaka a trabaho.

12 MANGILATANGKA ITI TIEMPO PARA ITI DI MAPAKPAKADAAN. No panagkunam ket makadanonka iti maysa a lugar iti las-ud ti 15 a minuto, ikarim nga addakanto sadiay iti las-ud ti 25 a minuto. No panagkunam ket 1 nga oras ti kabayag ti maysa nga aktibidad, mangilatangka iti 1 nga oras ken 20 a minuto para iti dayta. Mangilatangka iti panawen a bakanteka.

13 ISAMIRAM TI DADDUMA NGA AKTIBIDAD. Kabayatan ti panag-shave-mo, dumngegka iti damag wenno aniaman a nairekord. Agbasaka bayat nga agur-urayka iti lugan wenno bayat ti biahe. Siempre, mabalinmo met nga usaren dayta nga agrelaks ngem dimo sayangen tapno dimonto pagbabawyan ti napukaw a tiempo.

14 PASIMPLIEM TI TRABAHO. Iti 10 nga inlistam nga aramiden, saan ngata a 2 laeng ti kapatgan? Ti kadi maysa a trabaho ket makuna a dandanin malpas no naaramidmon uray laeng dagiti kapatgan nga aspeto dayta? Kas pagarigan, no nasken a sagadam ti nagtinnag a bulbulong iti arubayanyo, nalabit bassitto laengen ti aramidem no iyun-unam ti ayan ti kaaduan a bulbulong.

15 NO MARIKNAM A NAGABSUONANKA ITI TRABAHO, isuratmo iti bassit a papel ti tunggal aramidem sa bingayem dagita iti dua a grupo: “Aramidek Ita” ken “Aramidek Inton Bigat.” Kasta met la ti aramidem kabigatanna.

16 SAGPAMINSAN NGA AGRELAKSKA TAPNO MAPABARO TI PIGSAM. Inton subliam ti trabahom a nainanaanen ti bagim ken panunotmo, ad-adunton ti maaramidam ngem iti adu nga oras a panagobertaym.

17 ISURATMO DAGITI PAMPANUNOTEM. Isuratmo ti problemam ken no apay a burburiborennaka dayta. Ilistam ti amin a mapanunotmo a solusion.

18 DIKA AGBALIN A PERPEKSIONISTA. Ammuem no kaanoka nga agsardeng ken no kaanom nga aramiden ti sumaruno a napateg nga aktibidad.

19 AGTRABAHOKA A KAS PROPESIONAL. Dimon urayen a ganadoka nga agtrabaho. Mangrugika lattan.

20 AGBALINKA A MANNAKIBAGAY. Singasing laeng dagitoy, saan ketdi a nainget a paglintegan. Padasem, kitaem no ania ti kasayaatan, ken piliem ti maibagay iti kasasaadmo ken kadagiti kasapulam.