Ti Panangmatmat ti Biblia

Siasino Dagiti Demonio?

MARMARNA, tikbalang, bampira, sairo, demonio—sumagmamano laeng dagitoy kadagiti sasao a pangdeskribir kadagiti di katatauan. Ibilang dagiti tattao iti nadumaduma a relihion a dagita nga espiritu a persona ket mabalin a naimbag, dakes, wenno agpadpada. Adda met dagiti agkuna nga an-anito laeng dagita wenno parnuay laeng ti imahinasion. Ania ti kuna ti Biblia?

Isursuro ti Biblia a ti Namarsua ket maysa nga Espiritu ken dagiti immuna a pinarsuana ket espiritu met. (Juan 4:24; Hebreo 1:13, 14) Dinakamat met ti Biblia dagiti nadangkes nga espiritu, a pasaray tukoyenna ida kas sairo wenno demonio. (1 Corinto 10:20, 21; Santiago 2:19) Ngem dina isursuro a ti Dios ti nangparsua kadagiti demonio. Siasinoda ngarud ken kasanoda a timmaud?

Dagiti “Anghel a Nagbasol”

Idi pinarsua ti Dios dagiti espiritu a parsua, impaayanna ida iti wayawaya nga agdesision no agaramidda iti naimbag wenno dakes. Nakalkaldaang ta idi naparsuan dagiti tattao, adda dagiti anghel, nupay di nadakamat ti bilangda, a pinilida ti agaramid iti dakes babaen ti panagrebeldeda iti Dios.

Nagbalin a Satanas ti kaunaan ken kadaksan nga espiritu a persona a nagrebelde. Isu ket “saan a nagtalinaed iti pudno,” kinuna ni Jesu-Kristo. (Juan 8:44, Ti Biblia, PBS) Ania ti nakatignayan ni Satanas nga agrebelde iti Dios? Inagumanna ti panagdayaw a rumbeng a maipaay laeng iti Namarsua, ken imbanagna dayta a tarigagayna babaen ti panamagbalinna iti bagina kas karibal a dios. Iti kasta a pamay-an, pinagbalinna ti bagina a “Satanas,” a “bumusbusor” ti kaipapananna. Ginasut a tawen kalpasanna, sakbay ti Layus idi kaaldawan ni Noe, kimmanunong pay ken Satanas ti dadduma nga anghel. Pinanawanda ti nainkasigudan a saadda idiay langit ket naglasagda kas tattao ken nagnaedda ditoy daga. (Genesis 6:1-4; Santiago 1:13-15) Idi dimtengen ti Layus, dagiti naglasag nga “anghel a nagbasol” ket nabatad a nagsubli iti lubong dagiti espiritu. (2 Pedro 2:4; Genesis 7:17-24) Idi agangay, nagbalinda a sairo wenno demonio.—Deuteronomio 32:17; Marcos 1:34.

Naiduma unay itan ti kasasaad dagiti simmukir nga anghel no idilig iti kasasaadda idi sakbay a nagrebeldeda. Kuna ti Judas 6: ‘Dagiti anghel a saan a nangtaginayon iti nakaisigudan a kasasaadda no di ket pinanawanda ti bukodda nga umiso a lugar a pagnaedan ket insagana ida ti Dios kadagiti agnanayon a pannakaparaut iti sidong ti napuskol a kinasipnget maipaay iti pannakaukom iti naindaklan nga aldaw.’ Wen, saan nga impalubos ti Dios a tagiragsaken pay dagiti demonio dagiti dati a pribilehioda idiay langit no di ket inggarangugongna ida iti simboliko nga “abut ti napuskol a kinasipnget,” nga awanan a pulos iti naespirituan a pannakalawlawag.

“Mangyaw-awan iti Intero a Mapagnaedan a Daga”

Nupay nabatad a didan makapaglasag a kas tattao, nakabilbileg ken dakkel pay laeng ti impluensia dagiti demonio iti isip ken kabibiag dagiti tattao. Kinapudnona, ni Satanas ken dagiti demoniona ‘iyaw-awanda ti intero a mapagnaedan a daga.’ (Apocalipsis 12:9; 16:14) Kasano? Kangrunaanna babaen iti “sursuro dagiti sairo.” (1 Timoteo 4:1) Dagitoy a palso a pannursuro, a masansan a nagtaud kadagiti relihion, ti mangbulbulsek iti panunot ti minilion tapno dida maammuan ti kinapudno maipapan iti Dios. (2 Corinto 4:4) Usigem ti sumagmamano a pagarigan.

● Sibibiag pay laeng kano dagiti natay. Babaen kadagiti al-alia, timek, ken nasikap a taktika, dagiti demonio al-allilawenda dagiti tattao tapno patienda a kabaelan dagiti sibibiag ti makikomunikar kadagiti natay. Kanayonanna, gapu iti daytoy a nasikap a panangallilaw, kasla agpayso ti palso a sursuro nga agtultuloy latta nga agbiag ti kararua kalpasan ti ipapatay ti bagi. Ngem naglawag ti kuna ti Biblia a dagiti “natay saanda a pulos sipapanunot iti aniaman.” (Eclesiastes 9:5, 6) Gapu ta ‘bimmabadan iti kinaulimek,’ didan maidaydayaw ti Dios.—Salmo 115:17.a

● Uray ania kano ket mabalin. “Ti intero a lubong adda iti pannakabalin daydiay nadangkes,” kuna ti 1 Juan 5:19. Naan-anay nga us-usaren ni Satanas ken dagiti demoniona ti pannakabalinda babaen ti panangaramatda iti media ken ti dadduma pay a pamay-an tapno agsaknap ti dakes a kapanunotan a rumbeng a pabus-oyan dagiti tattao ti imoral a tartarigagayda. (Efeso 2:1-3) Gapuna, agraraira ita ti amin a kita ti imoralidad, agraman dagiti di natural nga ar-aramid mainaig iti sekso. Maibilangen dagita kas normal idinto ta masansan a maibilang a kadaanan ken nainget unay dagiti pagannurotan iti Biblia.

● Pannakaisaknap ti espiritismo. Adda nasabat ni apostol Pablo a maysa nga adipen a babai “nga addaan . . . sairo iti panagpadles,” isu a nabaelanna nga ‘impaayan dagiti appona iti adu a magunggona babaen ti panangannurotna iti arte ti panagpadles.’ (Aramid 16:16) Saan nga inkaskaso ni Pablo ta ammona ti pagtataudan ti naisangsangayan a pannakabalin dayta a babai. Mainayon pay, dina kayat a mapagura ti Dios, a mangibilang a nakarimrimon ti amin a kita ti espiritismo kas iti astrolohia ken panagpatulong kadagiti espiritu.—Deuteronomio 18:10-12.

Salaknibanyo ti Bagiyo Kontra Kadagiti Demonio

Kasano a masalaknibanyo ti bagiyo kontra kadagiti nadangkes nga espiritu? Kastoy ti sungbat ti Biblia: “Agpasakupkayo iti Dios; ngem busorenyo ti Diablo, ket isu agtalawto kadakayo.” (Santiago 4:7) Sursurotentayo dayta a bilin no agbiagtayo a maitunos kadagiti sursuro iti Biblia, ti kakaisuna a sagrado a libro a mangibutaktak ken Satanas, kadagiti demonio, ken kadagiti ‘pamuspusanda a mangallilaw.’ (Efeso 6:11; 2 Corinto 2:11) Ibaga pay ti Biblia nga addanto tiempo nga agpatingga dagiti nadangkes nga espiritu ken amin a bumusbusor iti Dios. (Roma 16:20) “Dagiti napalungdo isuda ti agtaengto iti daga, ket dagiti awan pakababalawanna isuda ti mateddanto iti dayta,” kuna ti Proverbio 2:21.

[Footnote]

NAPANUNOTMO KADIN?

● Ti kadi Dios ti nangparsua kadagiti demonio?—2 Pedro 2:4.

● Makasaritam kadi dagiti natay?—Eclesiastes 9:5, 6.

● Kasano a masalaknibam ti bagim kontra kadagiti demonio?—Santiago 4:7.

[Ladawan iti panid 21]

Ikagkagumaan dagiti demonio nga allilawen dagiti tattao iti adu a pamay-an