Panangmatmat iti Lubong
Ti Serbian Ministry of Religious Affairs inakseptarnan ti aplikasion ti pannakairehistro ti legal a korporasion a mangirepresentar kadagiti Saksi ni Jehova. Sigun kadagiti rekord ti gobierno, addan dagiti aktibo a Saksi ni Jehova iti dayta a lugar sipud pay idi agarup 1930.
Mapattapatta nga ilegal ti 95% kadagiti kanta a nai-download iti intero a lubong idi 2009.—TIME, U.S.A.
Ginggined—“Didigra a Kaaduan ti Pinapatayna”
“Ginggined ti didigra a kaaduan ti pinapatayna,” kuna ti United Nations International Strategy for Disaster Reduction, a nakabase idiay Geneva, Switzerland. Kadagidiay natay maigapu iti didigra bayat daytoy a dekada, dandani 60% ti natay kadagiti ginggined. Agtultuloy a mamagpeligro daytoy a “natural a peggad.” Ngamin, 8 iti 10 a siudad a kaaduan ti populasionna iti intero a lubong ket adda iti lugar a masansan a maginggined. Iti napalabas a 10 a tawen, nasurok a 780,000 a tattao ti natay iti 3,852 a pasamak a naklasipikar kas didigra.
Napeggad a Trabaho
“Idi 2009, agdagup iti 110 a periodista ti napapatay gapu iti trabahoda. Isu nga iti napalabas a dekada, dayta a tawen ti kaaduan iti natay” iti dayta a propesion, kuna ti International Press Institute, a nakabase idiay Vienna, Austria. Kadagiti lugar nga adda gubat, kas iti Afghanistan, Iraq, Pakistan, ken Somalia, “mapumpuntiria dagiti periodista” iti naglabas a tawtawen, kuna ti report. Gapu iti dayta, basbassit ti maipadamag ti media ken “makapadanag ta kurangen ti impormasion maipapan kadagiti . . . narikut a pasamak” kadagita a lugar. Ti Iraq ti kapeggadan a pagilian para kadagiti periodista, a sarunuen ti Pilipinas, Colombia, Mexico, ken Russia kas iti panagsasaganadda.
Nalaka a Tagilako, Bimmassit a Panagtakaw
Idiay Britania, nalabit awanen dagiti agserrek iti balay tapno agtakaw gapu iti “panagwaras dagiti nalaka nga elektroniko a tagilako,” sigun iti padamag ti Reuters idiay London, a kinotarna ti imbaga ni James Treadwell a mangisursuro iti criminology idiay University of Leicester, England. Kas pagarigan, ti nababa a presio dagiti baro a DVD player kaipapananna a dandani awan balor dagita no mailako manen. “Sayang laeng ti panangtakaw kadagita,” kuna ni Treadwell. Ngem adda latta krimen uray no bimmaban dagiti presio. Iti kasumbangirna, pumpuntiriaen itan dagiti agtatakaw ti nanginngina ken nalaklaka a mailako a ‘kas iti selpon ken iPod, nga itugtugot dagiti tattao.’ Dagiti dati nga agserrek kadagiti balay tapno agtakaw ket holdaper itan.