Ti Panangmatmat ti Biblia
Adda Kadi ti Dios iti Amin a Disso?
ADU ti mamati a ti Dios ket literal nga adda iti amin a disso ken bambanag. Ti masirib a ni Ari Solomon kiniddawna ken Jehova, “Denggem koma iti disso a pagnanaedam, iti langlangit.” (1 Ar-ari 8:30, 39) Sigun ngarud iti Biblia, adda disso a pagnanaedan ni Jehova a Dios. Tinukoy ni Solomon dayta a lugar kas ti “langlangit.” Ngem ania ti kaipapanan dayta?
No dadduma, us-usaren ti Biblia ti sasao a “langit” ken “langlangit” a pangtukoy iti tangatang wenno law-ang iti aglawlaw ti daga. (Genesis 2:1, 4) Ngem yantangay ti Dios ti namarsua iti amin a banag, sigurado nga addan disso a pagnanaedanna sakbay pay nga inaramidna ti uniberso. Ngarud, adda ti Dios iti disso a saan a sakup ti material a bambanag. Gapuna, no dakamaten ti Biblia ti langit kas pagnanaedan ni Jehova a Dios, naespirituan a lugar ti tuktukoyenna, saan a literal a disso iti tangatang wenno iti law-ang.
Makapaamanga a Sirmata
Ipaayannatay ti Biblia iti makapainteres a panirpatan iti disso a pagnanaedan ni Jehova babaen iti nasirmata ni apostol Juan. Nakitana ti silulukat a ruangan idiay langit ken nangngegna ti timek a nagkuna kenkuana: “Umulika ditoy.”—Apocalipsis 4:1.
Kalpasanna, makapaamanga ti naipasirmata ken Juan maipapan ken Jehova a mismo. Kastoy ti kapaset ti nakitana: “Maysa a trono ti nakasaad idiay langit . . . Daydiay situtugaw, ti langana, umasping iti bato a jaspe ken iti napateg a nalabaga ti marisna a bato, ket iti aglikmut ti trono adda bullalayaw a ti langana umasping iti esmeralda. . . . Manipud iti trono adda rumrummuar a kimkimat ken timtimek ken gurgurruod . . . Ket iti sanguanan ti trono adda ti, no ar-arigen, maysa a simmarming a baybay nga umasping iti kristal.”—Apocalipsis 4:2-6.
Kasta ti napatak a pannakailadawan ti nakapimpintas ken awan kaaspingna a kinangayed ken kinaranga ni Jehova. Ken paliiwem ti adda iti aglawlaw ti trono ni Jehova. Ti bullalayaw ipasimudaagna ti linak ken talna. Ti kimkimat, timtimek, ken gurgurruod ipaganetgetda ti pannakabalin ti Dios. Ti simmarming a baybay itampokna ti nadalus a takder ti amin nga adda iti saklang ti Dios.
Nupay simboliko dagita a panangiladawan, adu ti maammuantayo maipapan iti disso a pagnanaedan ti Dios. Tagtaginayonen ni Jehova ti naan-anay nga urnos idiay langit ken saan a nariribuk sadiay.
Adda iti Amin a Disso iti Amin a Kanito?
Yantangay adda pagnanaedan ni Jehova, nalawag nga isu ket saan nga adda iti amin a disso ken iti amin a kanito. Kasano ngarud nga ammona ti amin a mapaspasamak? (2 Cronicas 6:39) Ti maysa a pamay-an ket babaen iti nasantuan nga espirituna, wenno aktibo a puersana. Insurat ti salmista: “Sadino ti mabalinko a papanan manipud espiritum, ket sadino ti mabalinko a pagtarayan manipud rupam? No umuliak koma idiay langit, sadiay addaka; ket no isimpak koma ti sopak idiay Sheol, adtoy! addaka sadiay.”—Salmo 139:7-10.
Tapno matarusam ti nasaknap nga epekto ti nasantuan nga espiritu ti Dios, usigem ti init. Nupay adda iti masinunuo a disso, makaiwaras iti enerhia iti nalawa a paset ti daga. Umasping iti dayta, adda pagnanaedan ni Jehova a Dios. Ngem maaramidna ti aniaman a pagayatanna sadinoman iti uniberso. Mausar met ni Jehova ti nasantuan nga espirituna tapno ammuenna ti mapaspasamak iti sadinoman a disso ken iti aniaman a tiempo. Kuna ti 2 Cronicas 16:9: “No maipapan ken Jehova, mapan nga agsublisubli dagiti matana iti intero a daga tapno ipakitana ti pigsana maigapu kadagidiay a ti pusoda naan-anay kenkuana.”
Adda met iturturayan ti Dios nga organisasion dagiti espiritu a parsua a maawagan iti anghel. Ipasimudaag ti Biblia a ti bilang dagita nga espiritu ket mabalin a ginasut a milion—nalabit binilion wenno ad-adu pay.a (Daniel 7:10) Naglaon ti Biblia iti adu a salaysay maipapan iti pannakausar dagiti anghel kas pannakabagi ti Dios. Immayda ditoy daga, nakisaritada kadagiti tattao, sada nagsubli a nagreport iti Dios. Kas pagarigan, idi kaaldawan ni Abraham, inusig dagiti anghel ti reklamo maipapan iti Sodoma ken Gomorra. Inkeddeng ti Dios a dadaelenna dagita a siudad, nalawag kalpasan a nagreport dagita nga anghel.—Genesis 18:20, 21, 33; 19:1, 13.
Ipasimudaag ngarud ti Biblia a saan a kasapulan a literal nga adda ni Jehova a Dios iti isuamin a disso. Babaen iti nasantuan nga espirituna ken dagiti anghelna, kabaelanna nga ammuen a naan-anay ti mapaspasamak kadagiti parsuana.
Nalawag a matulongannatayo ti Biblia tapno ad-adda a maam-ammotayo ti Namarsua kadatayo. Babaen iti dayta, maammuantayo a ti Dios ket agnanaed iti disso a maawagan iti langit, iti lugar dagiti espiritu a saan a sakup ti pisikal a langlangit. Kaduana sadiay ti linaklaksa a mannakabalin nga espiritu a parsua. Ken nabatad ti kinatalna, pannakabalin, ken kinasin-aw iti pagnanaedanna. Ipasigurado kadatayo ti Biblia nga iti naikeddeng a tiempo, sagrapento ti sangatauan ditoy daga dagiti natalna a kasasaad a kas iti langlangit.—Mateo 6:10.
[Footnote]
a Sigun iti Apocalipsis 5:11, adda “linaklaksa a laksa” nga anghel iti aglawlaw ti trono ti Dios. Ti maysa a laksa ket 10,000. Ti maysa a laksa a laksa (10,000 x 10,000) ket 100 milion. Ngem posible a binilion ti bilang dagiti espiritu a parsua gapu ta “linaklaksa a laksa” ti nausar iti dayta a teksto.
NAPANUNOTMO KADIN?
● Adda kadi ti Dios iti amin a disso?—1 Ar-ari 8:30, 39.
● Kasano kaadayo ti madanon ti espiritu ti Dios?—Salmo 139:7-10.
[Blurb iti panid 29]
Adda ti init iti permanente a disso, ngem nakalawlawa ti pakadanonan ti enerhiana. Umasping iti dayta, adda pagnanaedan ti Dios ngem makadanon ti nasantuan nga espirituna iti sadinoman a pilienna iti uniberso