Ti Sagut a Musika

KASANO ngata ti biag no awan ti musika? Awan dagiti makapaturog a lallay, romantiko a harana, makapaganaygay a moderno a kankanta, makaibuyog a simponia, ken makapasaranta a melodia. Para iti kaaduan, makatuok ken makauma la ketdi ti biag no awan ti musika.

Wen, ti musika tukayenna ti gistay amin nga emosiontayo. Liwliwaen, paganaygayen, pasarantaen, paragsaken, ken pagsangitennatayo. Nabileg met ti musika ta direkta a matukayna ti pusotayo. Apay a nagdakkel ti epekto kadatayo ti musika? Simple laeng ti sungbat: Ti musika ket nagsayaat a sagut ti Dios. (Santiago 1:17) Rumbeng ngarud nga ipategtayo dayta, masapul a nasayaat, ken rumbeng a magun-odan ti amin—ubbing man wenno nataengan.

Nabayagen nga adda ti musika. Kas pagarigan, ipakita dagiti nakali ti arkeolohia a nagaramat dagiti tribu idiay Africa kadagiti tambor, tangguyob, ken kampanilia ginasut a tawen sakbay pay ti kadawyan a panawentayo. Dagiti nagkauna met a Tsino ket nagtokar iti maysa a kita ti silindro ken mapuyot a pito. Arpa met ti us-usaren dagiti umili ti Egipto, India, Israel, ken Mesopotamia. Nalabit ti maysa kadagiti kaespesipikuan a pannakatukoy ti musika sigun iti historia ket ti masarakan iti Biblia iti Genesis 4:21. Maammuantayo sadiay a ti lalaki nga agnagan iti Jubal “ti namunganay kadagidiay amin nga agar-aramat iti arpa ken pito.” Kalpasan ti adu a siglo, ni Ari Solomon iti Israel magusgustuanna unay ti musika isu a nagpaala iti kasayaatan a kayo a pagaramid kadagiti arpa ken dadduma pay a de kuerdas nga instrumento.—1 Ar-ari 10:11, 12.

Siempre, tapno makangngegka idi iti musika, masapul nga agtokarka wenno dumngegka iti sabali a makapagtokar. Ngem ita, maysa la a talmeg wenno click iti mouse, minilionen ti makangngeg iti musika. Kinapudnona, amin a klase ti musika ket mabalinen nga irekord wenno i-download ken patokaren kadagiti gadyet a maibulsam. Sigun iti surbey idiay Estados Unidos idi 2009, dagiti agtawen iti 8 agingga iti 18 ket nasurok a dua nga oras kada aldaw a dumngeg iti musika ken dadduma pay nga audio recording.

Gapu iti daytoy nasaknap nga uso, ti musika ken dagiti pagpatokaran a gadyet ti kangrunaanen a mailaklako a produkto. Dakkel ngarud a negosio ti musika. Ngem napanunotmo kadin no kasano nga agbalin a nakalatlatak ti maysa a kanta?

[Kahon/Ladawan iti panid 3]

Musika iti Internet

PANAG-DOWNLOAD: Kadawyan nga agbayad dagiti user iti tunggal file nga i-download-da ket kukuadanton dagita. Agbayad met ti dadduma iti subscription a masansan a naipakuyog iti kontratada iti selpon wenno dadduma pay a produkto tapno mai-download ken mapatokar dagiti music file bayat laeng ti tiempo a sakup ti kontrata.

STREAMING: Digital a musika a dagus a mangngeg uray saanen nga i-save dagiti file. Libre ti kaaduan kadagita, nupay ti dadduma ket mangngeg laeng no subscriber-ka.

[Tsart/Dagiti Ladawan iti panid 3]

(Para iti aktual a pannakaurnosna, kitaem ti publikasion)

Agkakapateg a Pasamak iti Panagirekord iti Musika

1880’s

Phonograph record

1890’s

Steel wire

1940’s

Reel-to-reel tape

1960’s

Compact cassette tape

1980’s

Compact disc (CD)

1990’s

Digital audio files (MP3, AAC, WAV, kdpy.)