Watchtower ONLINE A LIBRARIA
Watchtower
ONLINE A LIBRARIA
Iloko
  • BIBLIA
  • PUBLIKASION
  • GIMONG
  • g 8/12 pp. 10-12
  • Kuarta nga Uppat ti Sakana

Awan video-na ti napilim.

Pasensiakan, adda problema iti pannakai-load ti video.

  • Kuarta nga Uppat ti Sakana
  • Agriingkayo!—2012
  • Umasping a Material
  • Baboy
    Pannakatarus iti Kasuratan, Tomo 1
  • Padasentayo ti Luau Dagiti Taga Hawaii
    Agriingkayo!—2002
  • Dagiti Masursurok iti Biblia
    Ti Pagwanawanan Mangibumbunannag iti Pagarian ni Jehova—2012
  • Leksion 2
    Dagiti Masursurok iti Biblia
Kitaen ti Ad-adu Pay
Agriingkayo!—2012
g 8/12 pp. 10-12

Kuarta nga Uppat ti Sakana

“DITOY lugarmi, ti baboy ket dakkel a gameng ti pamilia. Dakkel ngarud a responsabilidad ti panagtaraken iti dayta,” kuna ti 17 anyos a balasang a ni Enmarie Kani, nga agnanaed iti kabambantayan ti Papua New Guinea. “Idi adda burias nga impataraken kaniak ni Tatang, naragsakanak ngem madanaganak. Nagbassit isu a diak ninamnama nga agbiag.”

Kasano a tinaraken ni Enmarie ti nagbassit a baboyna? Ken apay a dagiti baboy ket kas kapateg ti kuarta kadagiti agnanaed iti aw-away ti Papua New Guinea? Kastoy ti imbagana iti Agriingkayo!

Di la mabalin a deskribirem ti lugar a pagnanaedam?

Agnanaedak a kadua ti pamiliak​—ti nagannakko, dagiti adiek a 2 a babbai ken 2 a lallaki​—iti bassit a kalapaw a naatepan iti pan-aw iti nasulinek a purok iti Western Highlands. Agkakabagian amin ti agarup 50 a kapurokanmi. Asideg dayta iti bassit a karayan nga agayus iti katurturodan nga aduan iti kaykayo.

Mannalon ti kaaduan iti purokmi. Adda nalawa a kanatengan ti pamiliak. Namulaan dayta iti kamote, karabasa, pipino, kape, ken dadduma pay. Magusgustuak ti agmula iti nateng ken agtrabaho. Siak met ti mangas-asikaso iti dadduma pay kas iti panagdalus iti balay, panaglaba, ken siempre, ti panangtaraken iti baboy ti pamiliami.

Kasanom a tartaraknen ti baboymo?

Idi ginatang ni Tatang ti baboymi agarup makatawenen ti napalabas, nakabasbassit nga uray la umanay iti dua a dakulapko. Inaldaw a pinakanko iti napaglalaok a nadekdek nga ikan, binugbog a bagas ti kamote, danum, asin, ken tubbog ti unas. Gapu ta nalamiis ti rabii ditoy lugarmi, pinaturogmi iti sako ti bagas a nakabitin iti asideg ti pagapuyan iti balaymi. Naturogak iti asidegna. Isu a saan la a dimmakkel no di ket simmalun-at pay!

Awan ti naidumduma nga impanaganko iti baboymi. Basta inawagak lattan iti Baboy, ket daytan ti naganna. Tinarakenko a kas man la anakko​—pakpakanek, digdigusek, ken kaay-ayamko iti sumagmamano nga oras. Simminged kaniak ni Baboy ken sursurotennak sadinoman ti papanak.

Idi dimmakkelen, inruamko iti baro a rutina a sursurotenmi agingga ita. Babaen iti tali, iwaywayko iti kanatenganmi, nga agarup 15 minuto a pagnaenmi manipud idiay balay. Igalutko ti talina iti puon ti kayo sa bay-ak nga agsubsob iti agmalem. Babaen iti napigsa a tengnged ken nakidser a sungona, agkali kadagiti ramut ken alinta isu a masukay ti daga ken agbalin a nadam-eg. Sakbay a sumipnget, iyawidkon sa pakanek iti di naluto ken naluto a kamote sakbay nga ipanko iti kayo nga ubongna.

Apay a nakapatpateg ti baboy kadagiti agnanaed iti bantay?

Adda pagsasaomi ditoy a Ti baboy ket kuarta isu a ti kuarta ket baboy. Sakbay pay a dimteng ti kuarta iti kabambantayan, nabayagen a baboy ti us-usaren dagiti umili kas pannakakuartada. Ar-aramidenda pay la dayta agingga ita. Kas pagarigan, iti paglakuan iti lugan iti kabambantayan, maipakuyog idi ti maysa a sibibiag a baboy iti kada magatang a baro a lugan. Kadawyanna a risuten dagiti tribu dagiti dida pagkikinnaawatan babaen ti panagsinnukatda iti kuarta ken baboy. Adu met a nobio ti mangted iti baboy kadagiti agbalin a katuganganda ken pakaikamanganda kas paset ti sab-ongda.

Kasla gayam ib-ibusem ti urnongmo no sidaem ti baboymo!

Hustoka! Tangay nakapatpateg dagiti baboy, agsidakami laeng iti karne no adda espesial nga okasion, kas iti pumpon ken dadduma pay a napateg a seremonia. Nupay kasta, ginasut a baboy ti partien ti dadduma a tribu iti kabambantayan kadagiti dadakkel a seremonia a nairanta a mangiparammag iti kinabaknang ti tribu wenno kas panagyaman iti naawat a pabor.

Pangusaran ti pamiliam kadagiti baboyyo?

Husto ti panangibagam a “kadagiti baboyyo.” Adun ti inyanak ni Baboy. Nabiit pay nga inlakomi ti maysa iti 100 a kina (agarup ₱1,700). Dayta ti pinagpletemi iti bus idi timmabunokami iti tinawen a kombension distrito dagiti Saksi ni Jehova iti Banz a kabangibangmi nga ili. Ilakonto met ni Tatang ti dadduma nga anak ni Baboy para iti inaldaw a kasapulan ti pamiliami.

Apay a dikay laengen agtaraken iti ad-adu a baboy tapno ad-adu ti kuartayo?

Saankami nga agpabpabaknang. Kayatmi laeng ti maaddaan iti kasapulanmi a kas iti taraon, kawes, ken pagnaedan. Napatpateg iti pamiliami ti naespirituan a bambanag kas iti panagserbi iti Diosmi a ni Jehova; itatabuno kadagiti Nakristianuan a gimong; panangtulong iti dadduma​—iti naespirituan ken namaterialan​—aginggat’ kabaelanmi, ken ti panagkakaduami a sangapamiliaan iti nadumaduma nga aktibidad. Simple ti biagmi ngem naragsak ken nasingedkami.

Kinapudnona, adda pamastrekak​—panagmula iti natnateng ken panagtaraken iti baboy​—ngem sideline-ko la dayta. Ti kangrunaan a pangus-usarak iti panawenko ket ti panagserbik kas Kristiano nga ebanghelisador, nga iranranudko kadagiti kaarrubak dagiti kinapudno nga isursuro ti Biblia. Dayta a trabaho nga imbilin ni Jesus nga aramiden dagiti pasurotna ti pakakumikomak iti sumagmamano nga aldaw ti lawas. (Mateo 28:19, 20) Arapaapko ti agtrabahonto met iti sanga nga opisina dagiti Saksi ni Jehova idiay Port Moresby. Sadiay a maipatpatarus dagiti literatura a naibasar iti Biblia kadagiti pagsasao iti pagilianmi. Ngem uray no saan a mapasamak dayta, ammok a kanayonakto latta a nakaragragsak iti panagserbik ken Jehova ken iti panangyun-unak kadagiti naespirituan a banag. Agyamanak met ta makaaw-awatak iti material a suporta manipud iti kuarta nga uppat ti sakana.

[Kahon/Ladawan iti panid 12]

AMMOM KADI?

● Iti isla ti New Guinea, adda di kumurang a 2 a milion a matartaraken a baboy, agarup 1 iti kada 3 nga umili.

● Adda baboy ti nasurok a 50% kadagiti taga-away.

[Mapa iti panid 10]

(Para iti aktual a pannakaurnosna, kitaem ti publikasion)

INDONESIA

PAPUA NEW GUINEA

AUSTRALIA

INDONESIA

PAPUA NEW GUINEA

PORT MORESBY

WESTERN HIGHLANDS

AUSTRALIA

[Ladawan iti panid 11]

Mapankami iti kanatengan

[Ladawan iti panid 11]

Agdigdigusak

[Ladawan iti panid 11]

Makiay-ayamak

    Dagiti Publikasion iti Iloko (1984-2025)
    Ag-log out
    Ag-log in
    • Iloko
    • I-share
    • Ti Kayatmo a Setting
    • Copyright © 2025 Watch Tower Bible and Tract Society of Pennsylvania
    • Pagannurotan iti Panagusar
    • Pagannurotan iti Kinapribado
    • Privacy Settings
    • JW.ORG
    • Ag-log in
    I-share