No Kasano ti Mangikeddeng Kadagiti Pagannurotan Para iti Tin-edyermo

TI PROBLEMA

Kuna ti anakmo nga estriktoka unay. Ngem ti panagkunam ket saan met. Nalabit mapanunotmo a no dimo estriktuan, sigurado a maisagmak!

Mabalinmo ti mangikeddeng kadagiti nainkalintegan a pagannurotan para iti tin-edyermo. Ngem masapul nga ammuem nga umuna no apay a masuron kadagiti inkeddengmo a pagannurotan.

DAGITI MAKAGAPU

Pagarup: Sumukir amin a tin-edyer kadagiti pagannurotan; paset dayta ti kinaagtutubo.

Agpayso: Posible a saan a sumukir ti tin-edyer no nainkalintegan dagiti pagannurotan ti dadakkelna ken no ilawlawagda dagita kenkuana.

Nupay adu ti rason iti isusukir, mabalin a di madmadlaw ti nagannak nga isuda ti makagapu iti dayta agsipud ta estrikto unay dagiti pagannurotanda wenno din maitutop iti edad ti anakda. Usigem dagitoy:

• Estrikto unay. No mangaramid lattan dagiti nagannak iti paglintegan a dida man la kinonsulta ti anakda, agbalin dagita a restriksion imbes a proteksion. Kas resultana, mabalin nga ilimedna nga aramiden dagiti mismo nga iparit ti nagannak.

• Din maitutop iti edad. Mabalin nga umdasen iti maysa nga ubing ti panangibaga iti “basta,” ngem saanen nga umdas dayta kadagiti tin-edyer—kasapulanda ti eksplanasion. Ngamin, dumtengto ti tiempo a pumanawen ti anakmo iti podermo ken bukbukodnanton ti agaramid kadagiti napapateg a desision. Nasaysayaat nga ita pay laeng bayat nga adda iti podermo, masursuronan ti agpanunot a naimbag ken agaramid kadagiti umiso a desision.

Ngem ania ti aramidem no kanayon a masuron ti anakmo kadagiti pagannurotam?

TI MABALINMO NGA ARAMIDEN

Umuna, laglagipem a kasapulan dagiti tin-edyer ti panangiwanwan ken kayatda dayta uray dida ibagbaga. No kasta, mangikeddengka kadagiti pagannurotan ken siertuem a maawatan ti anakmo dagita. Kuna ti libro a Letting Go With Love and Confidence: “No nalawag dagiti limitasion a maited kadagiti agtutubo ken namnamaenda nga iwanwan ida dagiti nagannakda, basbassit ti posibilidad nga agaramidda iti kalokuan.” Ngem no sobra a nalukay ti nagannak, panunoten ti annak nga awan bibiang ti dadakkelda kadakuada isu a sigurado nga agsukirda.—Prinsipio ti Biblia: Proverbio 29:15.

Kasanoka ngarud nga agbalin a balanse? Bay-am nga iyebkas ti anakmo ti kapanunotanna kadagiti pagannurotan ti pamilia. Kas pagarigan, no makitinnawar iti oras ti panagawidna iti rabii, denggem ti rasonna. No mariknana nga ikabkabilangam, ad-adda a raemen ken surotenna ti inaramidmo a pangngeddeng uray no dina anamongan.—Prinsipio ti Biblia: Santiago 1:19.

Ngem sakbay nga agaramidka iti pagannurotan, laglagipem daytoy: Nupay kayat dagiti tin-edyer ti agkiddaw iti ad-adu a wayawaya ngem iti maiparbeng, mabalin nga ad-adda nga estriktuan ida dagiti nagannak ngem iti maiparbeng. Isu nga ikabilangam a naimbag ti kiddaw ti anakmo. Ipakpakitana kadi nga isu ket responsable? Mabalin kadi nga ikkam iti konsiderasion gapu kadagiti sirkumstansia? Sisasaganaka koma nga agpabus-oy no kasapulan.—Prinsipio ti Biblia: Genesis 19:17-22.

Malaksid iti panangikabilangam iti kapanunotan ti anakmo, siertuem met a maammuanna dagiti pakaseknam. Iti kasta, maisurom kenkuana a saan la a ti kayatna ti ikabilanganna no di ket uray ti rikna ti sabsabali.—Prinsipio ti Biblia: 1 Corinto 10:24.

Kamaudiananna, mangaramidka iti desision ken ilawlawagmo dagiti rasonmo para iti dayta. Uray no saan a maragsakan iti desisionmo, posible nga agyaman ta addaan iti nagannak a mangikabkabilangan kenkuana. Laglagipem a ti agtutubo ket masansanay nga agbalin nga adulto. No mangikeddengka kadagiti nainkalintegan a pagannurotan ken ilawlawagmo dagita iti anakmo, matulongam nga agbalin a responsable nga adulto.—Prinsipio ti Biblia: Proverbio 22:6.