Ti Naandur nga Utek ti Arctic Ground Squirrel

NO MANGRUGI ti napaut a pannaturog ti maysa nga animal, lumamiis ti bagina. Kasano kalamiis? Iti adu nga arctic ground squirrels, dimmanon dayta iti -2.9°C (degrees Celsius)! Iti kasta a kalamiis, ekspektarentayo nga agyelo ti utekda. Apay a saan a mapasamak dayta iti arctic ground squirrel?

Usigem: Kada 2 wenno 3 a lawas bayat ti napaut a pannaturog ti arctic ground squirrel, agpigerger nga agsubli iti normal a temperatura ti bagina a 36.4°C ken saan a lumamiis dayta iti agarup 12-15 nga oras. Sigun kadagiti managsirarak, dayta nga ibabara uray apagbiit ket makatulong tapno saan nga agyelo ti utek. Bayat met ti napaut a pannaturogna, agtalinaed a medio nabarbara ti ulona ngem iti bagina. Idi naeksamen iti laboratorio, ti temperatura ti tengnged dagita nga squirrels ket di pulos limmamiis iti 0.7°C.

No mariingen ti squirrel, agsublin ti normal a panagandar ti utekna iti uneg ti agarup 2 nga oras. Kinapudnona, ipakita ti maysa a panagadal a nasaysayaat pay ketdin ti panagandar ti utekna kalpasan ti napaut a pannaturogna! Masdaaw dagiti eksperto iti dayta a naisangsangayan a pasamak. Yarigda dayta kadagiti kattubo a mula iti nauram a kabakiran kalpasan ti sumagmamano nga aldaw.

Mangnamnama dagiti managsirarak a makatulong ti panagadalda iti arctic ground squirrel tapno naan-anay a maawatanda ti potensial a maaramidan ti utek ti tao. Panggepda nga ad-adu pay ti maammuanda no kasano a lapdan wenno agasan ti pannakadadael dagiti selula gapu kadagiti sakit ti utek a kas iti Alzheimer’s.

Ania ti makunam? Babaen kadi iti ebolusion a timmaud ti naandur nga utek ti arctic ground squirrel? Wenno nadisenio dayta?