Panagsugal

Adda kadi pagdaksan ti panagsugal?

TI KUNA TI TATTAO

Para iti adu, awan pagdaksanna ti paglinglingayan a panagsugal no la ket ta legal dayta. Dadduma a legal a panagsugal, kas kadagiti loteria nga isponsoran ti gobierno, ket makapastrek iti adu a kuarta para kadagiti programa a makatulong kadagiti umili.

TI KUNA TI BIBLIA

Awan ti direkta a dinakamat ti Biblia maipapan iti panagsugal. Ngem naglaon dayta kadagiti makaiwanwan a prinsipio a mangipakita iti kapanunotan ti Dios maipapan iti dayta.

Ti kangrunaan a panggep ti panagsugal—ti panangabak a pakaabakan ti dadduma—ket maikontra iti pakdaar ti Biblia nga “agaluadkayo iti tunggal kita ti kinaagum.” (Lucas 12:15) Kinapudnona, ti kinaagum ti mangtignay iti maysa tapno agsugal. Iyan-anunsio dagiti establisimiento a pagsusugalan ti panangabak iti dakkel a jackpot, ngem dida ipakaammo ti agpayso maipapan iti bassit a tsansa dagiti tattao a mangabak. Ngamin, ammoda a kayat dagiti sugador ti bumaknang isu a matignayda la ketdi a mangipusta iti dakdakkel a gatad ti kuarta kadagiti casino. Ti panagsugal rubrubrobanna ti tarigagay ti tao nga alisto a maaddaan iti adu a kuarta imbes a tulonganna ti tao nga agaluad iti kinaagum.

Ti panagsugal ket naibasar iti nainkasigudan a managimbubukodan a panggep: panangabak iti kuarta dagiti naabak. Nupay kasta, ti Biblia parparegtaenna ti tao nga “itultuloyna koma a sapulen, saan a ti bukodna a pagsayaatan, no di ket ti pagsayaatan ti sabali a tao.” (1 Corinto 10:24) Kuna pay ketdi ti maysa kadagiti Sangapulo a Bilin: “Dika tarigagayan ti . . . aniaman a banag a kukua ti padam a tao.” (Exodo 20:17) No ar-arapaapen ti maysa a sugador ti mangabak, arigna idawdawatna a maabak koma ti dadduma tapno isu ti makaala iti kuartada.

Mamakdaar met ti Biblia maibusor iti panangibilang iti gasat wenno suerte kas datdatlag a puersa a nalabit mangted kadagiti bendision. Iti nagkauna nga Israel, adda dadduma a naawanan iti pammati iti Dios isu a rinugianda ti ‘mangidasar iti lamisaan maipaay iti dios ti Naimbag a Gasat.’ Naragsakan kadi ti Dios iti kasta a debosionda iti “dios ti Naimbag a Gasat”? Saan ta kinuna ti Dios kadakuada: “Inar-aramidyo no ania ti dakes kadagiti matak, ket piniliyo ti banag a saanko idi a pagragsakan.”—Isaias 65:11, 12.

Agpayso met ketdi nga iti dadduma a paset ti lubong, dagiti pondo nga aggapu iti legal a panagsugal ket maus-usar iti edukasion, idudur-as ti ekonomia, ken dadduma pay a programa para iti pagilian. Ngem ti panangusar kadagita a pondo dina balbaliwan no kasano a nagun-odan dagita—babaen kadagiti aktibidad nga agdadata a mangiparparegta iti kinaagum, panagimbubukodan, ken ti pananggun-od iti banag a di nagbannogan.

“Dika tarigagayan ti . . . aniaman a banag a kukua ti padam a tao.”—Exodo 20:17.

Ania dagiti dakes nga epekto ti panagsugal iti sugador?

TI KUNA TI BIBLIA

Mamakdaar ti Biblia a “dagidiay determinado a bumaknang matnagda iti sulisog ken iti silo ken iti adu a minamaag ken makapasakit a tartarigagay, a mangipalned kadagiti tattao iti pannakadadael ken pannakarba.” (1 Timoteo 6:9) Ti panagsugal ket nairamut iti kinaagum. Makadadael unay ti “kinaagum” ta uray la inraman dayta ti Biblia iti dadduma nga aramid a masapul a liklikan.—Efeso 5:3.

Yantangay ti panagsugal ket nakasentro iti alisto nga ibabaknang, patanorenna ti panagayat iti kuarta—banag a dineskribir ti Biblia kas “ti ramut dagiti amin a kita ti makadangran a bambanag.” Ti tarigagay a maaddaan iti kuarta ket nalaka nga agbalin a nakabilbileg nga impluensia iti biag ti tao nga agtungpal iti nakaro a panagdanag ken pannakadadael ti pammatina iti Dios. Sigun iti simboliko a panangdeskribir ti Biblia, dagidiay managayat iti kuarta “sinalputda ti intero a bagbagida iti adu nga ut-ot.”—1 Timoteo 6:10.

Ti kinaagum ket agresulta iti di pannakapnek. Gapu iti dayta, saan a kontento dagiti tattao iti kaadu ti kuartada ken saanda pudpudno a naragsak. “Ti managayat laeng iti pirak saanto a mapnek iti pirak, uray ti asinoman a managayat iti kinabaknang saanto a mapnek iti sapul.”—Eclesiastes 5:10.

Minilion a nagargari nga agsugal ti naigameren iti dayta a makadangran a bisio. Nasaknap dayta a problema ta sigun kadagiti panangtantiar, iti laengen United States, minilionen ti sugador.

Sigun iti maysa a proverbio, ‘ti tawid a magun-od babaen iti panangagum iti damo, ti mismo a masanguananna saanto a mabendisionan.’ (Proverbio 20:21) Ti problema a panagsugal ti nangilumlom kadagiti sugador iti utang wenno pannakabangkrap pay ketdi, ken nakaigapuan ti pannakasesanteda iti trabaho, pannakadadael ti relasionda iti assawa ken gagayyemda. No iyaplikar ti tao dagiti makaiwanwan a prinsipio ti Biblia, maliklikanna dagiti dakes nga epekto ti panagsugal iti biag ken iti kinaragsakna.

“Dagidiay determinado a bumaknang matnagda iti sulisog ken iti silo ken iti adu a minamaag ken makapasakit a tartarigagay, a mangipalned kadagiti tattao iti pannakadadael ken pannakarba.”—1 Timoteo 6:9.