Ti Nasilap a Kolor ti Pollia Berry

TI BASSIT a bunga ti Pollia condensata a masarakan iti intero nga Africa ti makuna pay laeng nga addaan iti kararaniagan nga asul a kolor a nakita iti mula. Ngem awanan daytoy iti blue pigment a substansia a makaited iti asul a maris. Ania ti sekretona?

Panunotem: Dagiti pannakadiding ti selula iti ukis ti Pollia berry ket naglaon iti babassit a linabag (thread) a naurnos a kas kadagiti agaabay a posporo. Matuontuon dagitoy a linabag. Tunggal katuon ket adda bassit nga anggulo a diperensiana iti nakaituonanna isu nga agparang a kasla nagkawikaw nga agdan ti langada. Saan a talaga nga asul dagitoy a linabag ngem agparang a kasta gapu iti pannakaurnosda. Isu a saan a pigment ti sekreto ti naraniag, nasileng, ken bimmullalayaw nga asul ti Pollia berry no di ket ti estrukturana. Agparang nga asul ti kaaduan a selula. Ngem no iti sabali nga anggulo, adda dagiti makita a berde, duyaw, wenno pink gapu iti babassit a panagbaliw kadagiti katuon. Maysa pay, no sukimaten a naimbag, saan a napino ken saan nga agpapada ti pannakaiwaras dagiti kolor no di ket pixelated a kas kadagiti kolor iti iskrin ti kompiuter.

Gapu ta awan ti pigment dagiti Pollia berry, saan nga agkupas ti kolorda uray no matnag wenno mapurosda. Adda pay ketdi dagiti berry a nasuroken a sangagasut a tawen a napuros ngem nasileng latta ti kolorda a kas kadagiti kappuros! Sigun iti panagadal, uray no awan ti parte ti berry a makan ta puro bukel ti nagyanna, maengganio latta dagiti billit nga umasideg.

Mamati dagiti sientista a ti estruktura ti Pollia berry ket makatulong iti panagdisenio kadagiti produkto a kas iti di agkupas a pangtina ken espesial a papel a narigat a mapeke.

Ania ti makunam? Resulta kadi ti ebolusion ti nasilap nga asul a kolor ti Pollia berry? Wenno adda nangdisenio iti dayta?